Эссе "Монь тиринь велем"

Муниципальное общеобразовательное учреждение

«Средняя общеобразовательная школа с углубленным изучением отдельных предметов № 32»

городского округа Саранск

Вечкса тиринь Чугур велем, вечкса тиринь эрзянь келем!

Автор: Ведяскин Роман, ученик 7А класса

Руководитель: Осипова Галина Анатольевна,

учитель эрзянского языка

Саранск, 2022

Эрьва ломаненть ули истямо малавикс, истямо валдо тарказо, косо сон марясы прянзо сехте уцяскавкс. Масторлангсо арась истямо ломань, кона а вечксы эсензэ тиринь ёнксонзо, косо сон чачсь ды кассь, косо ули мелезэ лоткамс, оймсемс весе тевензэ эйстэ. Моньгак ули истямо таркам. Те монь вечкевикс ды мазыйдеяк мазый Чугур велем.

Мон чачинь ды эрян Саранск ошсо, ялатеке седеем свал терди тиринь велезэм, косо чачсь ды кассь монь авам, косо нейгак эри монь вечкевикс бабам, косо весе кортыть тиринь эрзянь кельсэ. Учан каникулатнень эйсэ, штобу самс инжекс монь Чугур велезэм. Ды ансяк тесэ монь оймем моры, а седеем кеци!

Тиринь велесэм мон содасынь весе янтнэнь ды ужотнень, тесе весе монень малавикс. Кизна валске марто, начко тикшенть потмова якан Дожга ды Черменейка лейтнень чирев, косо тетянь марто кундсетяно эрьва кодат калт. Авань марто якан лисьмапряв, косо ведесь, мерят, менельдеяк ванькс. Бути симат те веденть эйстэ, рунговат маряви виень совамось. Зярдо бабань марто ютан церькованть вакска, оймем пешкеди валдосо.

Вана виреськак. Истят мазый вирьть косояк арасть! Ансяк соват потмозонзо, стувтовить весе апаро арсемат. Вана аштить, теке маралят, эчке тумотне, вакссост касыть човине, виде рунго килейнентне, келей лопасонзо вадяшы прячерем пештечувтынесь, пильгем ало якстердить тантейдеяк-тантей ягодатне, а лопатнень алдо невтнить пряст тюжа прине пангинетне. Коштось вирьсэ истямо ванькс, што седеем морыця нармунекс ливтяволь! Сезнян аванень ды бабанень мазый вирень цецят. Сынст тантей чинедест, маряви, прямгак чаракады. Вана истямо пертьпельксэсь минек Чугур велесэ.

А кодат тесэ кизэнь чокшнетне! Менелесь прок валозь сырнесэ. Тешттне тесэ цитнить седеяк валдосто. Паряк, сыньгак кецить, што ваныть монь мазый велем лангс.

Аволь ансяк кизна велем мазый, тельняяк тесэ пертьпельксэсь истямо, што мазычидензэ ойметь потмозот а кельги. Бабань лембе кудосонзо вечкан аштеме каштомонть икеле ды ваномо, кода палы якстере толось. Бути варштан вальматнень лангс, абунгадан, истят мазый артовкст мон костояк эзинь некшне. Ушосонть якшамо, а бабань лембе кудосонзо качады тантей чине. Те бабам пидесь прякат топо, капста ды чевге марто. Истят тантей прякат, кодат панить тиринь велесэм, кодамояк питней рестарансто а муят!

А кодамо бабань кудопотмозо! Сехте питней таркась – пазаваикельксэсь, кона мазылгавтозь викшнезь нардамосо. Те бабам сонсь викшнинзе. А стяко кортыть, Чугур велень аватне пек ёроковт, маштыть эрьва мезень тееме. Зярдо бабам панжсы эрямопарензэ, сельмемгак, натой, покшолгадыть мазычинть эйстэ. Тесэ сон вечкезь кирди оршамопелензэ, конань анокстызе сонсь. Вишка пингстэ саезь эрьва эрзянь тейтернесь маштсь стамо, кодамо, викшнеме. А монь бабань кедензэ, мерить, сырнень. А ёвтави валсо потмоёжом, зярдо ванан эрзянь авань оршамоленть лангс! Вана бабань руцязо, панарозо, икельпацязо ды сехте мазыесь – пулаезэ. Мик кургом автеви те мазычинть эйстэ. Седей потсом истямо уцяска, ведь те монь тиринь Чугур велесэм эрясть ды нейгак эрить важодемань вечкиця пазонь ломанть! Ды секскак, арсян, мон седеяк пек вечкса тиринь ёнксом.

Мон а содан, ков пачтьсамам эрямось, зярдо касан. Ансяк максан вал: мон а стувтса тиринь эрзянь келем, конаь эйсэ корты весе семиям. А вечкевикс Чугур велем свал карми седейсэм-превсэм!