Конкурс “А ў нашай хаце свята”

Галоўнае ўпраўленне па адукацыі Брэсцкага аблвыканкама

Установа адукацыі

«Пінскі дзяржаўны прафесіянальны ліцэй сельскагаспадарчай вытворчасці»

Рэспубліканская акцыя навучэнскай моладзі “Жыву ў Беларусі і тым ганаруся”

Конкурс “А ў нашай хаце свята”

Каардынатар правядзення конкурсу – рэдакцыя газеты “Пераходны ўзрост”

Творчая работа “Калядныя пірагі з душамі”

Аўтар работы: Цеплавухава Аксана Віктараўна, навучэнка УА “Пінскі дзяржаўны прафесійны ліцэй сельскагаспадарчай вытворчасці”, група 13

Кіраўнік: Факадзей Таццяна Сямёнаўна, выкладчык УА “Пінскі дзяржаўны прафесійны ліцэй сельскагаспадарчай вытворчасці”

Адрас: 225766, Брэсцкая вобл., Пінскі р-н, в.Жабчыцы, УА “Пінскі ДПЛ СВ”,

тэл. (0165) 30-55-90; (29) 358-17-23

Пiнск, 2018

Калядныя пірагі з душамі

Усе мае сяброўкі мараць пра лета. А я летам чакаю зіму… Спытайце мяне: чаму? Думаеце, што ў мяне дзень нараджэння? …- Не. Што я хачу падарункі пад Новы год? … - Не.

Я люблю зіму больш за ўсё за снег. Таму што ёсць шмат забаваў: гуляць у снежкі, ляпіць снежную бабу, слізгаць па лёдзе на каньках, катацца на санках ці на лыжах, рабіць анёла на снезе і г.д. Зіма– чароўны і святочны час, а самае галоўнае –зімой прыходзіць маё любімае свята – Каляды. Эх, Калядачкі! Бадай, самыя вясёлыя святы!

Мы жывем у XXI стагоддзі, сёння святкаванне Нараджэння Хрыстова адрозніваецца ад таго, як яго адзначалі ў мінулым, таму мы штогод адпраўляемся да бабулі ў вёску Гарадная Столінскага раёна Брэсцкай вобласці, дзе можна па-сапраўднаму дакрануцца да мінулага. Заўсёды ўсёй сям'ёй ставім ялінку, упрыгожваем хату, рыхтуем смачныя стравы на святочны стол. Бабуля гаворыць, што стол “павінен быць багатым, каб наступным годам мець добры ўраджай і здароўе дзеля людзей і жывёл”.

Стол перад  Ражаством налічвае 12 посных страў. Ого! Нямала! Бабуля дастае са схованак розныя пачастункі: арэхі, яблыкі, мёд, бярозавік, печаны хлеб, потым гатуе куццю, грыбны квас, узвар, кісель, пірагі і інш.

Пад абрус на стол кладзем сена, якім пасля частуецца каза Брошка, бо “яно павінна зберагчы жывёлу ад ваўкоў і паспрыяць павелічэнню надоеў малака”. Таксама сенам звязваюцца лыжкі на стале, каб усе сямейнікі былі разам і падтрымлівалі адзін аднаго ў цяжкія хвіліны.

Калі на небе з’яўляецца першая зорка, то пачынаецца святочная вячэра. Дзед запальвае свечку, “запрашае” за стол усіх продкаў, а бабуля ціха распавядае пра Калядныя традыцыі беларусаў. І ў нашай хаце пачынаецца свята…

Галоўная страва на Калядным стале, канечне, куцця. Але мая любімая – гэта пірагі, а дакладней – пірагі з душамі! На першы погляд, яны нагадваюць звычайныя варэнікі, але гатуюцца па-асобаму. Бабуля гаворыць, што пірагі ўсё “адчуваюць”, да іх трэба падыходзіць з добрым настроем і прыгожа апранутым, а таксама можна напяваць песню. На Каляды пірагі гатуюцца з розным начыннем: бульбай, грыбамі, капустай. А іншыя сустракаюцца і з запіскамі з жартоўнымі пажаданнямі – вось тады пацеха пачынаецца!!!

Калядныя песні, шчырыя віншаванні, гульні і забавы, смачныя пачастункі, прыемныя падарункі, доўгачаканыя госці, прыемныя сустрэчы, чароўныя здарэнні – усё дорага майму сэрцу. І я люблю Каляды, таму што гэта свята сямейнае, яно аб’ядноўвае за сталом усіх родных і блізкіх, а гэта і ёсць адна з галоўных каштоўнасцяў для чалавека.

Цеплавухава Аксана, навучэнка УА “Пінскі ДПЛ СВ”

ДАДАТАК 1. ФОТАМАТЭРЫЯЛЫ

Сям’я за святочным сталом

Пачынаецца вечар перад Калядамі (падрыхтоўка стала)

Зімовыя забавы

Калядуем, калядуем, каўбасу чуем!