Математика сабақтарында қолданатын жаңа әдіс-тәсілдер

 Мен математика сабақтарында үнемі жаңа әдіс-тәсілдерді қолданамын. Мұғалім уақытын өткізу үшін әдістер қолданбайды, сабақ мақсатына жету үшін, әр жүрекке бір сәуле жағу үшін әдістер пайдаланады. Осы орайда сабақты тиімді ұйымдастыруда баланы оқу ісіне қызықтыруға, қабілетін арттыратын жағдай туғызуға, өз бетінше білім алу процесінде бірлесе әрекет етуге ықпал ету қажет. Негізінен күнделікті сабақта осы деңгейлік оқытудың бір элементін болсада қолданыпы отырамын, оның ішінде көбіне бағалау критерийі бойынша өз-өзін бағалау. Оқушылар өздерін әділ бағалауға машықтанды. Сыни тұрғыдан ойлауға үйрету, оқыту мен оқудағы жаңа тәсілдер, АКТ модулі, Блум таксономиясын сабақтарымда жиі қолданамын. Оқушылардың жас ерекшеліктеріне сәйкес білім беру және оқытуды көбіне деңгейлік тапсырмалар арқылы жүзеге асырып отырамын. Бұл әдістің ерекшелігі - мұғалім бағыт беруші, ол оқушылардың өз бетімен тақырыпты меңгеруіне жағдай жасайды. Ал оқушылар ізденуші, зерттеуші ретінде ақпарат мағынасын өз бетінше жете түсіне алады, өткен тақырыппен салыстыра отырып, қорытынды жасай алады.

Оқушылардың негізгі құзыреттілігі ретінде:  құндылық-бағдарлық, жалпы мәдени, оқу-танымдық, ақпараттық технологиялық, әлеуметтік-еңбек, коммуникативтік, өзін-өзі тұлғалық дамыту құзыреттіліктері белгіленген. Яғни, мектепте алған терең білімдерін болашақта пайдалана білуге бағытталған іс-әрекеттерді жүзеге асыру қабілеттерін дамытуға күш салуымыз керектігі баса айтылған.

Оқушының өзі еңбектеніп алған білімі есте жақсы сақталатындығы, тақырып оңай және игерілетіндігі белгілі. Математика сабағында оқушылар өз бетінше жұмыс жасау дағдыларын дамыту – баға жетпес құндылықтардың бірі. Жаттығуларды өз бетінше тексеріп, қорытынды жасай білетін тұлға қалыптастыру мақсатында жаңа технологиялар әдістерін кеңінен қолдану қажет деп білемін. Мен өз тәжірибемде проблемалық оқыту технологиясын қолданамын, өйткені ол маған сабақтарымда интерактивті оқытуды ұйымдастыру мүмкіндігін береді.