Дохутыр 1эщ1агъэм хущ1окъу

Бэрбэч Хьэт1ут1э и ц1эр зезыхьэ Къэбэрдей-Балъкъэр къэрал университетым Налшык къалэ дэт езанэ гимназием дохутыр 1эщ1агъэм щыхуагъэхьэзырыну пэш къыщызэ1уихащ.

Мы зэ1ущ1эм кърихьэл1ахэщ Къэбэрдей –Балъкъым узыншагъэр хъумэнымк1э и министр Хубий Мурат, КъБР-м лэжьыгъэмрэ социальнэ дэIэпыкъуныгъэмкIэ и министр Асанов Алим, Налшык къалэ администрацэм егъэджэныгъэмк1э Департаментым и унафэщ1 Бэрокъуэ Эдуард, КъБР егъэджэныгъэмк1э,щ1эныгъэмк1э,щ1алэгъуалэ 1уэхухэмк1э министым и къуэдзэ Ачемез Мокаев,университетым и лэжьак1уэхэу К1эрашэ Аксанэ,Къамбэчокъуэ Заретэ,Насып Артур сымэ. Зэ1ущ1эр псалъэ гуапэк1э къызэ1уихащ гимназием и унафэщ1 Уэрдокъуэ Лидия.Унивеситетым лэжьыгъэ щхьэпэ гимназием къызэрыдищ1ыл1эмк1э арэзыт ар. Дохутыр 1эщ1агъэр гугъуу ик1и нобэрей зэманым ар я 1эщ1агъэу ц1ыху куэдым къызэрыхахым,абы щхьэк1э куэд пщ1эн зэрыхуейм,ф1ыуэ узэреджапхъэм,еджап1эм къыщызэ1уаха «дохутыр классыр» еджак1уэхэм сытк1э сэбэп яхуэхъунуми и псалъэмакъым къыхигъэщащ Къэбэрдей –Балъкъым узыншагъэр хъумэнымк1э и министр Хубий Мурат.Еджак1уэ ц1ык1ухэм министертвэм сытк1и закъыдыщ1игъэкъуэну мурад зэращ1ами щыгъуазэ ищ1ащ абы. КъБР-м лэжьыгъэмрэ социальнэ дэIэпыкъуныгъэмкIэ и министр Асанов Алим гимназием хъуэхъу псалъэк1э зыкъыхуигъэзащ ик1и псалъэ итащ еджап1э нэхъыщхьэр къэзыуххэм я лэжьыгъэ 1энат1э хъунымк1э и сэбэп хилъхьэну. Налшык къалэ администрацэм егъэджэныгъэмк1э Департаментым и унафэщ1 Бэрокъуэ Эдуард, КъБР егъэджэныгъэмк1э,щ1эныгъэмк1э,щ1алэгъуалэ 1уэхухэмк1э министрым и къуэдзэ Ачемез Мокаев сымэ зэ1ущ1эм кърихьэл1ахэм хъуэхъу псалъэ къыхуапсэлъащ.Университетым и студентхэмрэ еджап1эм и еджак1уэ ц1ык1ухэмрэ зэгъусэу тхутепсэлъыхьащ студент гъащ1эр гъэщ1эгъуэну зэрыщытым,къэфахэщ,уэрэдхэри щыжа1ащ.Абыхэм ящ1а «флэшмобым» къыхэщащ къэралыр лъэщу щытын папщ1э ц1ыхухэр зэкъуэту зэрыщытыпхъэр,1эщ1агъэ тэмэм къызэрыхахыпхъэр.«Дохутыр классым» щеджэну мурад зыщ1а еджак1уэ 42-м университетым къыбгъэдэк1ыу тыгъэ ц1ык1ухэри иратащ.Хьэщ1эхэр зэбгрык1ыжа нэужь,еджак1уэхэм езанэ урокыр драгъэк1уэк1ащ университетым дохутырхэр щагъэхьэзыр факультетым деканым и къуэдзэ Къамбэчокъуэ Заретэрэ Насып Артуррэ.Еджак1уэ ц1ык1ухэр арэзыуэ,щ1э куэди къащ1ауэ япэ урокым къыщ1эк1ыжахэщ.