Правіла 1
Злучальная літара е у складаных словах пішацца на падставе марфалагічнага прынцыпу:
- не ў першым складзе перад націскам: боепрыпасы, зернебабовы, вуглепрамысловасць, землекарыстанне, ценелюбівы;
- незалежна ад націску, калі другая частка пачынаецца з ў (нескладовага): зернеўборачны, землеўласнік, своеўладны, вогнеўстойлівы, вільгацеўстойлівы, землеўпарадкаванне, усеўкраінскі, хмелеўборка.
ЗАЎВАГА! Злучальная галосная я пішацца замест е у першым складзе перад націскам (фанетычны прынцып): баяздольны, краявід, зернясховішча, сталявар, земляроб, жыццярадасны, ценялюбны, крэменязол, крывятворны, глыбіняметр.
Правіла 2
У першай частцы складаных слоў славянскага пахлджання заўсёды пішацца літара я у першым складзе перад пабочным націскам, калі асноўны націск прыпадае не на першы склад другой часткі складанага слова (фанетычны прынцып): Вялікабрытанія, вялікадзяржаўны, вялікагаловы, вялікалітоўскі, вялікафарматны; бярвёнаўкладчык, нядобразычлівы.
Літара я пішацца незалежна ад націску ў другой частцы складаных слоў, калі першая частка ўяўляе сабой слова ў яго першапачатковай форме (марфалагічны прынцып). Да іх адносяцца, напрыклад, часткі:
авія… |
авіямадэль, авіяпошта, авіяканструктар |
аўдыя… |
аўдыязапіс, аўдыякасета, аўдыяплэер |
каля… |
калякветнік, калянавуковы, калясардэчны |
гелія… |
геліяграма, геліяграфічны, геліяцэнтрычны, геліяэнергетыка |
медыя… |
медыябізнес, медыясупольнасць, медыяэнцыклапедыя, медыязорка |
мякка… |
мяккасардэчны, мяккацелы |
мяса… |
мясаед, мясакамбінат, мясапрадукты, мясарубка, |
саляна… (які мае адносіны да салянай кіслаты) |
салянакіслы |
семя… |
семявывяржэнне, семязавязь, семяўтварэнне, семяўваход |
святло(а)… |
святлабоязь, святлолюбівы, святлоадчувальны, святлафор |
хімія… |
хіміятэрапеўтычны, хіміятэрапія |
цяжка… |
цяжкавагавы, цяжкапраходны |
Правіла 3
Літара е пішацца ў першай частцы складанага слова славянскага паходжання, калі пад націскам знаходзіцца першы склад другой часткі (такі правапіс адпавядае правапісу е у словах, простых па структуры): Белавежскі, белабрысы, велікодны, светапогляд, сенажаць, велікадушны, велікарускі, велікамучанік, велікасвецкі, лесаруб, цеплатраса; у тым ліку і замест літары ё: легканогі (лёгкі), ледарэз (лёд), медасбор, меданосны (мёд), цемнавокі, цемнаскуры (цёмны).
Правіла 4
Калі ў складаным слове першая частка неславянскага паходжання, то яна незалежна ад націску ў другой частцы пішацца з літарай е: бензапіла, веерападобны, велазавод, бетонамяшалка, лексікаграфічны, мегакалорыя, метагалактыка, метафізіка, семасіялогія, серавадарод, фенагенетыка, ферамагнітны і інш.
Правіла 5
Літара е захоўваецца пад націскам у першай двухскладовай частцы складанага слова, калі асноўны націск падае не на першы склад другой часткі: вераадступнік, верхнезубны, ветрарухавік, зверагодоўля, лесазнаўства, лесанарыхтоўка, першааснова, лесазнаўства, лесанарыхтоўка, першааснова, севазварот, сенакасілка, серпападобны, цеплалюбівы, цестамясільны.
Правіла 6
Калі націск падае не на першы склад другой часткі або другая частка пачынаецца з ў (нескладовага), то ў першай частцы пад націскам захоўваецца літара ё:
- лёгка…: лёгкаатлетычны, лёгкадарожны, лёгкаўзброены;
- лёда…: лёдагенератар, лёдагрунтавы, лёдадрабілка;
- мёд…: мёдаварэнне, мёданарыхтоўка;
- мёртва…: мёртванароджаны;
- цёмна…: цёмнавалосы, цёмналісцевы;
- верацёна…: верацёнападобны.
Незалежна ад націску ў другой частцы складанага слова пішуцца нязменна наступныя першыя часткі:
- лёна- (тое, што ільно-): лёнаапрацоўка, лёнавалакно, лёнатраста, лёнаводчы, лёнамялка, лёнаўборачны, лёначасалка; дапускаецца варыянтнае напісанне: ільнамялка, ільноапрацоўка, ільнавод, ільновалакно, ільнотраста;
- жывёла-: жывёлагадоўля, жывёлавод, жывёлаводства, жывёланарыхтоўка;
- радыё-: радыёаматар, радыёэфір, радыёхвалі, радыётэхнічны, радыётэлефон, радыёэлектроніка;
- цепла-: 1) абазначае адносіны да цяпла, цеплавой энергіі, яе атрымання і выкарыстання: цеплаабмен, цеплазабеспячэнне, цеплаўстойлівасць, цеплааддача; 2) адпавядае слову цеплавы: цепластанцыя, цеплатраса і інш.;
- усё-: (адпавядае па значэнні займенніку усё і паказвае, што дзеянне і ўласцівасць, выражаныя другой часткай слова, пашыраюцца на усё): усёабдымны, усёбачны, усёвед, усёедны, усёзнайка, усёзнішчальны, усёпераможны.
Першыя састаўныя часткі складаных слоў усе- (уся-) пішуцца, калі яны адпавядаюць па значэнні:
- займеннікам увесь, уся, усе: усеагульны, усебаковы, усялітасцівы;
- слову агульна: усенародны, усеславянскі, усебеларускі.
Правіла 7
У складаных словах, утвораных ад колькаснага лічэбніка ў форме роднага склону і іншага слова, першая частка пішацца так, як яна пішацца ўродным склоне лічэбніка, незалежна ад націску ў другой частцы слова: пяціметровы, сямітысячны, сямімільённы, дзевяцікласнік, дзесяцірублёвы, сямнаццаціпавярховы, васямнаццацігадовы, дзевятнаццацідзённы.