На юбилейном вечере Минатуллаева М. А. – 80-летие известного кумыкского поэта- баснописца.
Гюн яхшы болсун, гьюрметли къумукъ халкъымны вакиллери!
Къаягент районну администрациясыны ва халкъыны атындан сизге къайнар салам гелтиргенмен.
Бугюн къазанышлилени – шат гюнлерини бириси.
Къазаныш юрт –тарихлени теренинде язылып гелген, къумукъ элибизни оьктем этеген, безейген юртларыны бириси. Бу юртдан кеп эревюллю уланлар ва къызлар чыкъгъан( алимлер, шаирлер, язывчулар, кочаплар…)
Бугюн бизин гьюрметге лайыкълы шаирибиз Магьамматшапи Акаевич Минатуллаевге 80 йыл тамамланды.
М.Акаевич! Сизин бугюнге ерли яза гелген асарларыгъыз булан танышбыз, оланы кёп сююп охуйбуз, яшланы да таныш этебиз. Сизин поэзия бавугъуздагъы емишлени татывун билгенбиз. Олар ана Ватанын сюймеге, ягьлы-намуслу болмагъа, гертиликни, адамлыкъны сакъламагъа ва шолай башгъа асил къылыкълагъа уьйрете.
«Насип»
Къылыч йимик къышларда
Боранлагъа тюшмейли,
Исси уьйде янтайып,
Ким тапгъан экен насип?!
Яллавлу яйлавда да
Ялынында бишмейли,
Терек тюпде янтайып,
Ким тапгъан экен насип?!
Балдай татли юхуну
Гьеч хатирин этмейли,
Йыл чакъы гечелени
Юхусуз оьтгермейли,
Ким тапгъан экен насип?!
Насип къайда экенни
Билме сюйсенг эгер де-
О инсандан булакъдай
Агъылагъан къан терде
М.Акаевич! Гьакъ юрекден сизге яшавда савлукъ, языв ишигизде дагъы да уьстюнлюклеге етишмеге насип болсун!
«Уьстюнлюклер биз ёрайбыз дагъы да» ( М.Минатуллаевге багъышлана)
Дюньябыз къонакълыкъ уьй йимик,
Инсанны геливю-гетивю битмей.
Яхшылыкъ урлугъун чачгъан адамлар
Даимге эслерде, эслене, гетмей.
Байлыкъ недир? Ол аяда сув йимик,
Инсанлар да байлыкъдан гермеген пайда.
Дюньябыз тумангъа чырмалар эди,
Гьакъыллыкъ бюрюшюп, токътаса сайда.
Гьар китап яшавда – битмейген хазна,
Насипли хазнаны къоллама билген.
Тюз къоллап , хадирин билгенлер
Разилик билдирип, башларын ийген.
Ругь байлыкъ – тав башда янагъан маякъ,
Маякъны есиси – пагьмулу шаир.
Инсанны чакъыра яхшылыкъ этме
Юхламай, гечелер сиз язгъан гьар йыр.
Йырларынг инг яхшы ёллагъа сала,
Яхшыгъа – яхшысан, ямангъа – толпан.
Язбашда жыйылгъан солакъ балыдай,
Йырларынг эдепден, къылыкъдан толгъан.
Яшавдагъы язбашыгъыз минг болсун,
Бизин якълар сизин гёрме сагъына.
Ёлугъузгъа гёзсув себип, алгъышлап,
Уьстюнлюклер биз ёрайбыз дагъы да!
Эльмира Исаева 23 май 2017 йыл
Буйнакский район, Н. Казанище