Электр станциялары мен тораптарын техникалық пайдалану ережелері

Электр станциялары мен тораптарын техникалық пайдалану ережелері

Нормативтік құжаттардың ережелерін орындау электр қондырғыларының қажетті техникалық деңгейін және дер кезінде енгізілуін, сапасын, сенімділігін, үнемділігін және пайдаланудағы ыңғайлылығын, сонымен қатар жұмыс істеушілердің денсаулығын қорғауды және еңбегінің қауіпсіздігін қамтамасыз етуге мүмкіндік жасайды. Төменде негізгі нормативтік құжаттардың сипаттамасы келтірілген.

Электр қондырғыларын орнату ережелері (ЭОЕ) электр жабдығығын таңдау, электр қондырғыларын құру және оларды сынау тәртібін анықтайтын негізгі нормативтік құжат болып табылады. Оларда электр қондырғыларының және электр қабылдағыштардың терминдері, анықтамалары және жіктемесі; сымдарды, кабельдерді, электр аппараттарын, өлшегіш аспаптарды таңдау бойынша талаптар; қызмет көрсетуші персоналдың қауіпсіздігін қамтамасыз ету бойынша ұсыныстар келтірілген.

Барлық негізгі электр жабдығы үшін қабылдау-тапсыру сынақтарының түрлері мен нормалары, сонымен бірге сынақтарды жүргізу мен нәтижелерін рәсімдеу реті белгіленген.

Құрылыс нормалары және ережелері(ҚНжЕ) ұйымдастыруға, басқаруға, жобалаудың ретіне және нормаларына, құрылыс және монтаждау жұмыстарын жүргізуге және қабылдап алуға қойылатын негізгі талаптарды, смета нормалары мен материалдық және адам ресурстарының шығындалу нормаларын белгілейді.

Электр техникалық қондырғыларда монтаждау жұмыстарын жасау және қабылдап алу жөніндегі ережелер 3.05.06-85 Электр техникалық қондырғылар ҚНжЕ-де баяндалған. Оларда:

• электр жабдығының негізгі түрлерін сақтауға,
• нысандарды монтаждауға дайындауға және тапсыруға,
• монтаждау ұйымдарының жобалық-смета құжаттарын қабылдауына,
• жұмыстардың электр монтаждау ұйымдары мен басқа қатарлас мамандандырылған ұйымдар арасында бөлінуіне,
• электр монтаждау жұмыстарын орындаудың жалпы тәртібіне,
• электр жабдығын жөнге келтіруге тапсыруға және құжаттарды жұмыс бабындағы комиссияның қабылдауына ұсынуға қойылатын талаптар баяндалған.

Тұтынушылардың электр қондырғыларын техникалық пайдалану ережелері(ТПЕ) электр қондырғыларын пайдалану жөніндегі персоналдың міндеттері мен тапсырмаларын және оған қойылатын талаптарды, жалпы мақсаттағы электр жабдығын және арнайы электр қондырғыларын пайдалану және жөндеу кезінде жұмыстарды орындау ретін, сондай-ақ пайдалануда тұрған электр жабдығын сынаудың мерзімдерін, көлемдерін және нормаларын анықтайды.

Тұтынушылардың электр қондырғыларын пайдалану кезіндегі қауіпсіздік техникасының ережелері (ҚТЕ):

• электр қондырғыларындағы қауіпсіз жедел қызмет көрсету және жұмыстар жүргізу талаптарын;
• ұйымдық және техникалық шараларды орындаудың ретін;
• электр қозғалтқыштарға, коммутациялық аппараттарға және жинақы бөлгіш қондырғыларына қызмет көрсету кезіндегі, электр берілісінің кабельді және әуе желілеріндегі жұмыстар кезіндегі, жабдықты сынақтарды және өлшеулерді жүргізген кездегі қауіпсіздік техникасының ережелерін және т.б. белгілейді.

Электр монтаждау және реттеу жұмыстары кезіндегі қауіпсіздік техникасының ережелері (ЭРҚТЕ) электр монтаждау және жөнге келтіру ұйымдары орындайтын жұмыстардың өзгешелігін қамтиды және ҚНжЕ, ТПЕ және ҚТЕ талаптарын толықтырады.

Оларда:

• электр монтаждау жұмыстарын жүргізген кездегі ұйымдастыру және қауіпсіздік техникасы;
• жекелеген электр қондырғыларын және электр жабдықтарын монтаждау;
• монтаждау және жүк көтеру машиналары мен механизмдерімен, такелаж құрылғыларымен және аспап-саймандарымен жұмыс істеу;
• тиеу-түсіру, дәнекерлеу жұмыстарын және биіктіктегі жұмыстарды;
• жөнге келтіру жұмыстарын орындау бойынша талаптар қарастырылады.

Электр және жылу қуатын пайдалану ережелері қуатпен жабдықтаушы ұйымдардың электр және жылу қуаты үшін есеп айырысу кезіндегі тұтынушылармен өзара қарым-қатынастарын анықтайды.

Олар тұтынушылардың электр қондырғыларын қуатпен жабдықтайтын ұйымдардың желілеріне қосу, шарттарын, жағдайларын, электр қуатын тұтыну, бақылау аспаптарын орнату, электр қуатын пайдаланғандығы үшін есеп айырысу, электр қуатына, реактивтік қуатқа өтемақыға тарифке жеңілдіктер және үстеме ақы режимдерін белгілейді.

Пайдалану құжаттары заттарды және оны пайдалану (қолдану, техникалық қызмет көрсету, тасымалдау және сақтау) ережелерін зерттеуге арналған.

Олар арнайы дайындығы бар қызмет көрсетуші персоналға есептелген.

Пайдалану құжаттары:

- техникалық сипаттаманы (ТС),

- пайдалану жөніндегі нұсқауды (ПН),

• заттарды оны қолданатын жерде монтаждау, іске қосу, ретке келтіру және жүргізіп байқау жөніндегі нұсқауды (МН),
• қосалқы бөлшектердің, құрал-сайманның және құрылғылар мен т.б. формулярын, паспортын, ведомосттарын қарастырады.

Жөндеу құжаттары - бұл жөндеу өндірісін дайындауға, заттарды жөндеуге және жөндегеннен кейін бақылауға арналған конструкторлық құжаттар. Олар ағымдағы және күрделі жөндеуге жасалады.