Հինդուիզմը ժամանակակից Հնդկաստանում

Հինդուիզմը ժամանակակից Հնդկաստանի քաղաքական կյանքում. Հնդուիզմի ակտիվ ներգրավումը երկրի քաղաքական կյանքում սկսվեց XIX դարում, հնդիկ ժողովրդի գաղութարարների դեմ պայքարի համատեքստում և զուգահեռաբար ընթացել է այս կրոնի ձևափոխությունների հետ, որոնք պայմանավորված էին հնդկական հասարակական կյանքում տեղի ունեցող արմատական փոփոխություններով, առաջին հերթին կապիտալիստական հարաբերությունների հաստատումով և զարգացումով։

Հնդկաստանի XX դարի 80-ականների քաղաքականության մեջ «հինդուսիտական գործոնը» դրսևորվում է առաջին հերթին հինդուիստական կոմունալիզմի տեսանկյունից, որը ներառում էր ավանդությանը դիմումը, քաղաքական նպատակներին հասնելու համար հինդուիզմի գաղափարների, հասկացությունների և արժեքների կիրառումը, կրոնական և էթնիկական հանրույթների նույնականացումը (հնդկաստանցի-հինդուիստ-հնդիկ): Հստակորեն ի հայտ է գալիս հինդուիստական և մուսուլմանական հակամարտությունը, որը ներառում է համապատասխանաբար երկրի բնակչության մոտավերապես 83% և 11%-ը: Հինդուիստական համայնքի փոխհարաբերությունները կրոնական փոքրամասնությունների հետ (սիկհեր, քրիստոնյաներ և այլն) լարված չեն, սակայն կոմունալիստների ուշադրությունը սևեռված է այդ կրոնների հետևորդների ընտրական վարքի վրա:

Դեռ մինչև անկախությունը Հնդկաստանում ծագել են երկու խոշոր կոմունալիստական կազմակերպություններ՝ Հինդու Մահասաբհա (փաստացի դադարել է գոյություն ունենալ 1947 թ.-ից հետո) և Ռաշտրիա Սվայամսեվակ Սանգհ (ՌՍՍ), որը այսօր միավորում է տասնյակ հազարավոր հնդիկների և կատարում է հինդուիստական կոմունալիստների կադրերի պատրաստման դեր։ Լինելով արգելված կազմակերպություն՝ ՌՍՍ սերտ կապի մեջ է քաղաքական պայքարին ազատորեն մասնակցող մի շարք կուսակցությունների հետ։ 80-ական թթ. սկզբից ՌՍՍ քաղաքական ձգտումների արտահայտողը դարձավ Բհարտիա Ջանատա Պարտին, որը տասնամայակների ընթացքում ուժ և ժողովրդականություն էր ձեռք բերել, և 1991թ. խորհրդարանական ընտրություններում հասավ ֆենոմենալ հաջողության: 80-ական թթ. առանձնահատկություններից մեկը դարձավ բնակչության ճնշող մեծամասնության հասարակական-քաղաքական գիտակցության դավանաբանականացումը, որի մասին է վկայում զանազան կոմունալիստական կազմակերպությունների և խբմերի աճը: Երկրում հաշվում են մոտավորպես 500 հինդուիստական կոմունալիստական միավորումներ, որոնց գործողություններին մասնակցում են միլիոնավոր մարդիկ: