Հնագույն կերպարվեստ

       Առանձին կուռքերի թևերի վրա քանդակված է բուսական զարդ, որը վկայում է նրանց կապը երկրագործության և պտղաբերության հետ։ Հանդիպում են նաև ֆալատիպ կուռքեր, որոնք կապվում են արական սկզբունքի և դարձյալ պտղաբերության պաշտամունքի հետ։ Արվեստի բնագավառին վերաբերող առարկաներ են նաև կիսաթանկագին գունավոր, մեծ մասամբ կարմիր, վարդագույն, դեղին, սև և այլ երանգի քարերից պատրաստված ուլունքները, որոնց տրվել են տարբեր արտահայտիչ ձևեր։ Ուլունքները պատրաստվել են նաև ոսկուց, արծաթից, բրոնզից, ապակուց։ Զանազան նյութերից, մանավանդ կիսաթանկագին քարերից պատրաստված ուլունքներն ու կախիկները դամբարանների պեղումների ժամանակ հայտնաբերվող առարկաներ են, որոնց վերագրվել է պահպանիչ, բախտի, հաջողության և այլ խորհրդանշական հատկություններ։