Юбилейный номер школьной газеты "Вуюись"

9-10 (88-89)-тӥ номер.

Толшор, 2016-тӥ ар.

«ВУЮИСЬ» газетмылы – 5 ар

Туннэ газетмы пусъе аслэсьтыз нырысетӥ юбилейзэ. Юбилей – со сыӵе вакыт, куке луэ ортчем аръёслэсь вунонтэм нуналъёссэ сэрттыны-пертчыны,визь-кенеш сётыны, азьланезлы выль ужпумъёс пуктыны. Газет улэ, сое кулэ карись, лыдӟись, гожъясь муртъёсыз вань ке. Та аръёс ӵоже милемын артэ вамышъязы, пӧртэм турлы ужъёсынызы, иворъёсын шумпоттылӥзы матысь эшъёсмы-юнкоръёсмы: Вадим ДАВЫДОВ, Сергей ВЕРЁВКИН, Татьяна БАХТИЯРОВА, Владимир ДАВЫДОВ, Дарья БЕССОГОНОВА, Кристина МАКСИМОВА, Вадим РЫСОВ, Константин РОМАНОВ. Туннэ газетэз поттыны юртто Дарья ИВАНОВА, Настя ДАВЫДОВА, Алина ВАХРУШЕВА, Юлия ИВШИНА, Маша БАЙСАРОВА, Света БАЙСАРОВА, Лена ЗАГРЕБИНА. Соос котьку но улонлэн азьпалаз вамышъяло,ас синъёсынызы чеберзэ, пусйымонзэ, ӟечсэ адӟо но лыдӟисьлэн сюлэмаз пырыны, вутскыны дырто.

Газетлы луыса, нылпиос мылпотыса пырисько ёрос, элькун, улоскуспо, Росси конкурсъёсы. Вормисьёслэн радъёсазы сюро.Кылсярысь, ӟеч кусыпъёсмы «Ӟечбур!» газетэн:солэн бамъёсаз котьку но интызэ шедьто милям гожтэм чуръёсмы, кылбуръёсмы.

Сюлмысь потэм тау карон кылъёсмы тӥлед жильыртӥсь анай кылмес дунъямды, творчество удысын пуж-пуж пыласькемды,солэсь ческытсэ шӧдэмды-валамды понна! Оскиськом, гожъяськыны яратон мылкыдды азьланяз но уз сӥя, выль вормонъёсы валтоз, улон сюрес вылтӥ йыгмыт вамышъяны юрттоз! Оскиськом, азьланяз но ӵошен, ваче ки кутскыса, чебересь малпанъёсмес улонэ пыӵатыса вамышъялом, удмурт кылэз тодэм-дунъяммы выль вормонъёсы валтоз шуыса!

Ортчемезлы тау карыса но вуоноезлы оскыса – АЗЬЛАНЬ!

Гажаса, газетлэн валтӥсь редакторез

Милемлы – шуныт ӟечкыланъёс

К отьку тау шуыны дась

Котькин, дыр, тодэ но шӧдэ али поттэм газетлэсь ческыт зынзэ. Кутӥськомы киямы газетмес, кыӵе дыртыса шедьтӥськом асьмелы инты, выльзэ чалякгес «ньылон» вылысь, но тани выль ивор одӥгез сьӧры мукетыз бызе ни син азьын…

Нош тодӥськоды-а тӥ со лӧптэм мылкыдэз, куке газетлэн бамысьтыз адӟиськод аслэсьтыд гожъямдэ, нимтулдэ?... Мон тодӥсько. Сюлэм дыректымон со. Нырысетӥ гожъямъёсме адӟи мон школа газетысь. Кызьы ке пичи нылпиез китӥз куто анай-атаез, озьы ик монэ валтӥз "Вуюисьлэн" редакторез Пётр Владимирович, соин ӵош мон лэсьтӥ нырысетӥ вамышъёсме та секыт, но соин ӵош ик шумпотон кузьмась гожъяськон удысын.

Кутӥськод кияд та газетэз, нырысь со пичи потэ, нош кутскы лыдӟыны, мар гинэ уд шедьты татысь! Кык бам, нош кыӵе пӧзе улон! Кӧня выль малпан шедьтыны луэ, тунсыко ивор. Эн кышкалэ гожъяськыны, шара вераны мылкыддэс, нош "Вуюись" котьку дорады, котьку юрттоз.

Бадӟыма но буд, пичи газетэ, вордскем нуналэныд!

Татьяна БАХТИЯРОВА, ИГМА-ысь студентка

- «Вуюись» газетлэсь ужзэ синйылтӥз ГТРК «Удмуртия».

- «Юнкор» кружок «Ӟечбур!» газетын.

2 - толшор - «Вуюись»

Шумпотты азьланяз но
Шумпотыса потэ вераме,туэ Юськи школаын потӥсь газетмылы тырме вить ар. Паймыса али тодам вайыса пукисько: тани-тани потӥз кадь, ачим школаын дышетскыкум отчы гожъясько вал пӧртэм статьяос , кылбуръёс... Уг оскиськы… 5 АР!
Озьы ке но ӟечкыламе потэ быдэс коллективез, кудӥз тырше газет поттон уж бордын, нырысь ик шуныт кылъёс потэ вераме валтӥсь редакторезлы Пётр Владимирович Давыдовлы! Мон шумпотӥсько, асьме пӧлын вань интыысь вырӟись адямиос Пётр Владимирович кадь. Дышетӥсь висъяз аслэсьтыз дырзэ пиналъёс, дышетскисьёс понна. Именно солэн инициативаезъя кылдӥз школаямы "Вуюись" газет. Тунсыко лыдӟыны та газетэз, ведь отын печатласько эшъёсылэн гожтэм ужъёссы, кызьы озьы уд шумпот эшед понна, кудӥз чебер но вольыт гожтыны быгатэ аслэсьтыз малпанъёссэ газетэ.
Сӥзисько газетэлы азьланяз но шумпоттыны аслэсьтыз лыдӟисьёссэ, ведь газет луло, куке вань гожъясь но вань лыдӟись. Газетэ гожъяськисьёслы сӥзисько умой дышетскон, нош кин бадӟым классын - умой экзаменъёссэ сётыны. Мон данъяськисько, вордскем гуртам, школаям вань таӵе газет шуыса.

Сергей ВЕРЁВКИН, УдГУ-ысь студент

Т унсыко но данъяськымон

Паймоно кадь, Юськи шор ёзо школа пичи школаос пӧлы пыртэмын ке но, кӧня паймымонэз, данъяськымонэз вань солэн. Асьмеос пичи школа шуиськомы ке, син азямы пуктӥськом аслаз улонэныз улӥсь, адӟиськонтэм школаез. Мон шуысал, со чылкак озьы ӧвӧл. Зэм но, котькуд пичи школалэн аслаз улонэз, аслаз пичи шумпотонэз, вормонъёсыз. Юськи шор ёзо школалэн аслаз «Вуюись» газетэз но вань. Вуюисьлэн трос буёлэз, татын но маиз гинэ ӧвӧл: пиналъёслэн творческой ужъёссы, школаын ортчись пӧртэм ужрадъёс пыртэмын, нылпиослэн малпанъёссы но трос мукет. Нош кӧня туспуктэмъёс! Мон чылкак пайми!

Туж тунсыко но данъяськымон. Азьланяз, кин тодэ, бамъёсыз но тросгес луозы, гуртоосмы но лыдӟыны быгатозы. Сӥзем потэ азьланяз но мед газетты шумпоттоз лыдӟисьёссэ, мед будоз но паськыталоз, мылкыдды котьку мед луоз кутскем уждэс азьланьтыны!

Татьяна КАМЕНЩИКОВА, дышетӥсь. Ижкар

У СТО УЖЪЁСЫНЫЗ

ДАНЪЯСЬКИСЬКОМ

"Вуюисьлы" вить ар тырмиз!
Со котьку но шумпоттӥз.
Ми сое туж яратском,
Усто ужъёсыныз данъяськиськом.
Туж кельше адямиослы 
"Вуюисьмес" лыдӟыны.
Нош тужгес кельше отчы
Пӧртэм статьяос гожъяны.
"Вуюисьлы" тау шуиськом,
Шуныт ӟечкыланъёс кузьмаськом!

С

УЖЪЁСЫД УНО МЕДЛО!

Потэ тыныд гажаса

Вераме та чуръёсме.

Озьы ик мед нылъёс-пиос

Возьматозы быгатонзэс,

Данъялозы анай кылзэс.

Ужъёсыд уно медло,

Бергаса ветлод, оло,

Нылпиосты бурдъялод,

Чеберезлы дышетод!

Даша ИВАНОВА, 8-тӥ класс

С ветлана БАЙСАРОВА, 9-тӥ класс

Дорогая наша Газета!

Сегодня твой юбилей, тебе исполнилось 5 лет! Я хочу тебе пожелать, чтобы выпуск твой никогда не заканчивался, рос и процветал, много интересных сюжетов из нашей школьной жизни на твоих страницах!

Юбилей твой отмечаем

И «спасибо» говорим!

Ободрить всех нас умеешь,

Школьную историю создаёшь!

Алина ВАХРУШЕВА, 5 класс

- Даша Иванова но Настя Давыдова газетлэсь выль номерзэ радъяло.

- Юськиысь юнкоръёс «Шундыберган» праздникын.

3 - толшор - «Вуюись»

Тазьы кылдэм Юсь гурт

выжыкыл Вадим Давыдов

Улэм-вылэм Лопшо Педунь. Улэм со кышноеныз пичигес удмурт гуртын, улэм туж куанер.

Огпол со мынэм нюлэскы губияны. Быдэс куды октэм вылэм ини, шӧдтэк шорысь со зарни бурдо бубылиез адӟем. Паймем Лопшо Педунь, малпам со бубылиез кутыны но гуртаз нуыны. Кудызэ куштэм но бубыли сьӧры уйиськыны кутскем. Тани кутэм, пе, сое но гуртаз нуэ ини, шуак бубыли солы адями куараен вазем: «Лэзь монэ, Лопшо Педунь, лэземед понна тынэсьтыд куинь косэмдэ быдэсто». Кышкам Лопшо, куаляк луыса усиське вал ини: «Осто, Инмаре, огпол но адями куараен вераськись бубылиез адӟылэмэ ӧй вал на. Я бен, иське. Мон тонэ лэзё, но со понна сёт мыным дас миллиард манет, Сьӧд зарезь дорын коттедж но мерседес». Бубыли соку бурдъёсыныз шонтэм но, Лопшо Педунь соку ик аслаз выль корказ вуэм.

Уло ни, пе, таос шумпотыса но номырлы ёрмытэк. Ресторанъёстӥ ветло, кӧё-вӧё сисько, чебер дӥсясько…

Аръёс ортчо но ортчо, нош пиналзы ӧвӧл но ӧвӧл. Соку Педунь нош ик мынэм нюлэскы губияны, нош ик адӟем со бубылиез, нош ик сое кутэм но шуэм солы: «Мынэсьтым куронъёсме берен берыкты, нош со интые мыным пинал сёт». Нош бубыли солы шуэм: «Мон тыныд пинал сётыны уг быгатӥськы, тонэ ведӥн каргам, пинал кулэ ке, тыныд сое вормыны кулэ луоз, но озьы гинэ тон сое уд вормы, нырысь ик тыныд кулэ луоз со дорын медъяськыса ужаны, тодыны, кызьы сое вормыны кулэ шуыса». Педунь малпаськем, малпаськем но шуэм: «Нош кызьы мон со ведӥнэз шедьтом?» - «Таиз сярысь эн сюлмаськы, - вазем бубыли. – Отчы тонэ ачим нуо». Озьы гинэ шуэм, Лопшо кыӵе ке бадӟым корка азе вуэм. Нош со корка азьын, пе, ты, но отын туж трос юсьёс, пе, уяло.

Пырем Педунь корка, вединэз шедьтыны малпаса. Пырем гинэ, ведӥн сое соку ик адӟем но шуэм: «Ӟеч но бур, Лопшо Педунь, медъяськыны лыктӥд-а? Озьы ке, тод: мон тыныд куинь уж сёто, ваньзэ быдэстӥд ке, узырмыто но пинал сёто. Ӧд ке, юсьлы пӧрмыто».- «Ярам», - шуэм Лопшо.

Ӵуказеяз ведӥн чортэм Педунез но шуэм солы: «Нырысетӥ ужед таӵе: кулэ луоз мушъёсылэсь чечызэс басьтыны». Педунь шумпотэм, уж таӵе капчи луоз шуыса. Мынэм со мушъёс доры но адӟе, пе: мушъёс ӟольгыри быдӟаесь! Соку шуэм со мушъёслы: «Мушъёс, мушъёс, эн лекалэ монэ, мон тӥлесьтыд трос чечыдэс уг куты, ӧжыт гинэ». Кылзӥськиллям сое мушъёс, ӧвӧл лекаллям. Ведӥн туж паймем таӵе ужлы, со малпа вылэм, Педунез мушъёс кулытозяз ик лекалозы шуыса.

Мукет нуналэ ведӥн косэм Лопшо Педуньлы гидзэ сузяны, нош отын, пе, солэн бадӟым лек ошез вылэм. Мынэм Педунь отчы, адӟем ошез но шуэм солы: «Эн иса монэ, бадӟым ош, мон тынэсьтыд гиддэ сузяло, тыныд аслыд ик улыны умойгес луоз. Нош сузяны лэзид ке, мон тыныд чылкыт ву но выль турын сёто». Кылзӥськем солэсь ош, ӧвӧл исам Педунез. Ведӥн, тае тодыса, чылкак паймем, кышканы кутскем: «Нош куинетӥ ужме но быдэстӥз ке?»

Нош ик чортэм ведӥн Педунез, сётэм солы таӵе уж: шурысь куинь зарни чорыгез, пе, кутоно. Нош со шурын улэ вылэм туж лек Вумурт, со нокинлы но отын чорыганы ӧвӧл лэзьылэм. Мынэм Лопшо шур дуре но кеськем Вумуртлы: «Быдӟым но кужмо Вумурт, эн иса монэ, эн выйты, мон тынэсьтыд куинь чорыгдэ гинэ куто, кӧня мыным ведӥн косӥз, аслым огзэ но уг куты». Адӟем Вумурт, Лопшо зэм вера шуыса но жалям сое, ӧвӧл исам.

Улэп Педунез адӟыса, ведӥн сыӵе паймем но кышкам, интыяз ик ваньмем. Соку ик ваньмыз тыын уясь юсьёс адямиослы пормиллям, соос Педуньлы тау кариллям но татын асьсэлы коркаос пуктӥллям, озьы гурт кылдэм – Юсь. Нош Педунь, кышнозэ ӧтьыса, ведӥнлэн корказ улыны кутскем, ваньзэ солэсь зарнизэ калыклы сётӥллям, нош собере вордскиллям соослэн вить кузя нылпиоссы: Олексан, Светӥ, Окси, Макси но Ксюши.

Туж мусо мыным та гурт

Дас куать арес дунне вылын

Улӥсько мон та гуртын.

Туж мусо мыным та гурт,

Туж дуно мыным та юрт.

Кытын мон вордски, будӥ,

Нырысьсэ ветлын дыши.

Нырысьсэ мынӥ мон школае,

Собере потӥ бадӟым сюрес вылэ.

Но гуртме уг вунэты ноку,

Сюлэм уго кыске татчы котьку.

Ялан тодам мынам лыкто

Вордскем юртэ, кытын улко.

Ульчае, кытын мон шудылӥ,

Школае, кытын мон дышетски,

Тымет, кытын пыласькылӥ,

Лудӟи шур, кытын чорыг мон кутылӥ.

Тӥни кыӵе мынам гуртэ,

Чебер, паськыт Юськие!

Ӧз удалты

Куазь шуныт, шунды пиштэ,

Тӧл каллен гинэ пельтэ.

Векчи лымы пырыос

Зарни кадь ик чиляло,

Гурезьын нош пиналъёс

Ӵукнаысен нискылало.

Мон но куасъёсме кутчай –

Нискыланы мон малпай.

Гурезь доры вуыса,

Йылаз каллен тубыса,

Ӧжытак дасяськыса,

Нискылтӥ гурезь улэ.

Чу-у! гинэ мон васькисько,

Улӥяз ни вуисько.

Шӧдтэк шорысь мон уси,

Лымы люке бекмыльски.

Туж кема потны выри,

Чигем куасэн гуртам бертӥ.

4 - толшор - «Вуюись»

«Вуюисьлы» - 5 ар» конкурслы йылпумъянъёс

К онкурсамы вуэм ужъёслэн лыдынызы та рад сокем ик ушъяськеммы уг поты. Лыдӟисьёсмы яке адӟытэк-шӧдытэк кылиллям, яке тунсыко тема шедьтӥллямтэ. Озьы ке но… Вуэм ужъёс пӧлысь тужгес но шумпоттӥз Даша ИВАНОВА. Шуныт пальпотонэн ыртэ солэн «Сюрло ышем!» ужез (коньывуон, 4(83) номер). Дашалэн ужез дунъямын 1-тӥ интыен.

2-тӥ интыын – Лена ЗАГРЕБИНА. Синйылтытэк ӧд кыле, дыр, классэз сярысь «Серекъянэн, спортэн эшъяськиськом» нимо рос-прос гожтэмзэ (коньывуон, 3(82).

3-тӥ интыен дунъямын Алина ВАХРУШЕВАЛЭН «Вунонтэм сюрес», «Яратӥсько семьяме» ужъёсыз (коньывуон, 3(82), толсур, 7 (86) но Настя ДАВЫДОВАЛЭН «Кызьы бен тонтэк?», «Байгурезь йылысен» кылбуръёсыз (толсур, 7(86); 8(87).

Ӟечкыласьком вормисьёсты! Азьланяз но конкурсъёсмес синйылтытэк эн кыле! Тӥледыз витё Дипломъёс но синпель кузьымъёс!

С амой матысь эшед – аслад мемиед

малпамтэ верос

Вазь ӵукна монэ шундылэн тылсиосыз сайкатӥзы. Каллен бичатыса, соос тэтчало вал ымныр вылтӥм. Мынектӥ, валес вылам кӧня ке кылльыса, соку ик сазьтӥськи: туннэ 8-тӥ Март, дуннеысь вань нылкышноослэн праздниксы, нош мон анаелы кузьым но ӧй лэсьты на. Ялан берлолы кельтылӥ. Табере нокытчы уд пыры. Йырам одӥг малпан: ма меда кузьмано? Син азям анаелэн небыт киосыз, шуныт мынектэмез. Туннэ мынам туж потэ мед со серектоз, тау, нылы, шуоз, шуныт киосыныз йырме маялтоз но юн ӟыгыртоз. Мон бордаз ӝиптисько но уг лэзиськы ни, нош мар кузьманы йырам номыр уг пыры. Эшелы жингыртӥ, ӟечкылай но юай, мар со анаезлы сётӥз: открытка, пе, анаез туж шумпотэм. Озьыез озьы но, кытысь мон открытка шедьтом, мар шуыса магазинэ мыном, собере уксёе но ӧвӧл, анаелэсь уд куры ук. Агае доры мынӥ, учкисько вал мар каре шуыса, но ӧз возьматы, секрет, пе. Йырме тӥяй-тӥяй но ӟеч малпанэ вуи. Анае туж яратэ «Лымы тӧдьы» калык кырӟанэз. Я, малпасько, кырӟало но тӥни, мынам но табере кузьыме вань. Тани ӝыт но вуиз. Атай шуныт кылъёсын ӟечкылаз, агае аслаз киосыныз бумагалэсь лэсьтэм кечсин сяськаоссэ сётӥз мыным но, анаелы но. Мон каллен пукисько ӝӧк сьӧрын, номыр вазьылытэк, кырӟаны кепырасько. Мынэсьтым номыре но уг юало, уг куро, анай аслэсьтыз изюмен пыжем пирогзэ но поттӥз ни, вандылыса ваньмылы тыриз, нош мынам ымам сиёнэ уг мыны, бадӟым комок дугдӥз кадь чыртыям. Тани синкылиосы одӥгез бӧрсьы мукетыз бамъёсы вылтӥ бызьыны кутскизы. Анай мон шоры учкиз но кышкаса юаз:

- Танюш, мар луиз? Кытӥыд ке висе шат?

- Уг… Ы-ы-ы!..

- Мар бен луиз? – анай дорам лыктӥз но небыт киосыныз бамъёсы вылысь синкылиосме ӵушылыны кутскиз.

- Мон… мон ӧдъясько вал тыныд кырӟан кырӟаны, но возьдаськи. Кыл но ӧй потты ук. Ваньзы тонэ ӟечкылазы, нош мон ӧй. Урод маке малпад, дыр.

- Эн бӧрды, нуные, мон тонэ туж зол яратӥсько! Ваньдэс тӥледды. Нокыӵе зарниен но уг вошты!

Мон ӝиптӥськи анае борды но викышъяны кутски.

- Я, я, дугды,- буйгатӥз анай. – Ойдолэ ваньмы ӵош кырӟаломы!

Ми борды кылъёссэ тыро-пыдо тодӥсьтэм атай но итӥськиз. Озьы ми мусо анаймылэсь яратоно кырӟанзэ кырӟам, праздникеныз ӟечкылам.

Татьяна БАХТИЯРОВА

М ынам Удмуртие

Улӥсько мон Удмурт шаерын,

Нюлэсъёс, ошмесъёс котырын.

Кошкисько ке дырлы, мозмисько,

Анай-атайме тодам вайисько.

Кинлэсь ке но кылӥ: Москваын чебергес,

Мукетыз чагиське: ти палан, пе, шимес.

Соослэсь кылъёссэс мон ӧй поны йырам,

Удмурт шаерме возисько сюлэмам.

Кытчы ке дышетскын пырыны ке малпай,

«Кыдёке мон уг кошкы»,- тыныд вералляй.

Кельшиськод тон мыным, муспотон дор палэ,

Тонэн мон котьку, вордӥськем шаере!

Сергей ВЕРЁВКИН

Гажано дышетӥсе

(акрокылбур)

Гажано дышетӥсе, ӟечкылам потэ тонэ.

Адӟисько мон тыршемдэ,

Жадёнэз валасьтэмдэ.

Аспал муртме ӟечкыласько:

Нош вормон мон сӥзисько.

Оглом ваньзэ умойзэ,

Данак шудо нуналзэ!

Ымнырад шумпотон мед луоз,

Шудо нунал мед вуттоз!

Етӥн сяська кадь будӥськом,

Тынэсьтыд кылъёстэ йырамы понӥськом.

Инбамлэсь но чылкытсэ, шундылэсь но яркытсэ

Сюресмес азьлане бырйиськом паськытсэ.

Емышъёс кадь кисьмаськом, тӥледлы тау кариськом!

Кристина МАКСИМОВА

5 - толшор - «Вуюись»

ДЫШЕТӤСЬЛЭН АРХИВЫСЬТЫЗ

Литературной геройлы гожтэт (Г.Красильниковлэн «Вуж юрт» дилогиезъя)

Ӟечбуресь, Александр Макарович!

Мынам потэ вал вераме Тӥляд сямъёсты сярысь малпанъёсме но куд-ог визь-кенеш сётэме.

Нырысь ик сюлмаськыто анай-атаеныды кусыпъёсты. Коть Тӥ малпаськоды, анай-атайды мыдлань улӥллям шуыса, Тӥ соосты гажаны кулэ. Анайды но атайды будэтӥзы Тӥледыз, вордӥзы, адямие поттӥзы. Одно ик малпаське, эн вунэтэ та сярысь!

Эшшо Тӥ туж чурыт кариськиськоды кышноеныды, Глафира Григорьевнаен. Со нош Тӥледыз туж яратэ, коркадэс котьку шуныт но чылкыт возьыны тырше, бакча ужъёсты но ваньзэ ас вылаз кыске. Ку атаез нылзэ дораз нуиз, Тӥ со понна ӧд но сюлмаське, ачиз бертоз шуыса малпады. Нош со вакытэ Тӥ туж кулэ вылэмды кышнодылы, солэн нылпиез кулӥз.

Тӥляд чурыт луэмды адӟиське на отын, кытын Тӥ пудо-животэз гидысь жугыса улляськоды. Пудо янгыш ӧвӧл ук, Гирой соосты тӥ доры вайиз шуыса. Уйлы ке но луысал животэз кельтыны, мукет нуналаз берен дораз келясалды яке фермае.

Но мыным кельше, Тӥ туж ужась шуыса, колхоз понна сюлмаськиськоды, солэн ӵуказе нуналыз понна висиськоды.

Йырдэс кур эн каре, гажано Александр Макарович, мон меӵак тазьы ваньзэ гожтӥсько шуыса. Малпаське котькуд вамышты сярысь, янгышаны эн сётске! Оскисько, азьланяз ваньмыз югыт, чылкыт, шуныт, шулдыр луоз! Ог-огдэс валаса, гажаса улэ, секыт учыръёсын ог-огдэс буйгатыны тырше. Соку гинэ улон тӥледлы пальпотоз, капчи, шудо луоз!

Ӟеч луэ, Александр Макарович! Гажаса, Ксения ХРИСТОЛЮБОВА

Шудӥм-бызьылӥм, бекмылляським…

Улонысьтым тямысэтӥ тол каникулъёсме шулдыр но пайдаё, аспӧртэмлыко ортчытӥ. Нокытчы палэнэ ӧй вуылы ке но, сюлмам со ӟеч тодэ ваёнъёсын пыриз, кемалы тодэ кылиз. Гурт котырын анай-атаелы юрттӥ, мычиськи, корка пушкын утялтӥськи, трос мукет ужъёсты быдэстӥ. Выль арез куать кузя ваньмы семьяенымы ӵош пумитам-ортчытӥм, чебер ӝӧк сьӧрын пуким. Корка пушмес чеберъяса, хоровод лэсьтӥм, кырӟанъёсмес быдэстӥм. Нош вож кызмес Катя но Маша сузэръёсыным пӧртэм буёло конвертикъёсын тырмытӥмы, Тол бабайлы ӵектон, сӥзён-куронъёсмес гожъямы. Анай-атаймы милемлы быдэн пельугы, хрусталь кӧльылэсь чиртывесьёс кузьмазы. Та нунал нокин кузьымтэк ӧз кыльы. Мылкыдмы юзыр-кезьыр вал.

Феерверк учкимы, туспуктэмъёс лэсьтылӥм. 9-тӥ толшоре сузэрелэн классэныз Яблонька гурезямы нискыланы ветлӥ. Шудӥм-бызьылӥм, кӧт тырымонамы бекмылляським.

Ваньмон дыръям гожъяськыса пуки, эшъёсы сярысь кылбуръёс гожъяй. Ужъёсы анайлы но, атайлы но, сузэръёсылы но кельшизы.

Мукет каникулъёсы но таӵе ик паймымон но тунсыко мед луозы!

Даша ИВАНОВА, 8-тӥ класс

М ынам дуно гуртэ

Гуртэлэн нимыз – Юськи. Со туж чебер но мусо. Гуртлэн шораз бадӟым тыметэз интыяськемын. Со ву вылэ тулысысен бер сӥзьылозь вуыло вылэм туж йӧно тӧдьы юсьёс. Соин но, лэся, гуртмес нималлям со нимен – Юсь. Али но вуыло на юсьёс, но соослэн лыдзы ӧжыт.

Гуртамы вань на черкмы. Со туж пересь ини, дыръёс ортчемен, кирпич борддоръёсыз но пырдыны кутскемын. Нош данъяськонмы – нылпи садикен шор ёзо школа. Со син азьын ӝутскиз 2008-тӥ арын. Татын тодон-валанзэс будэто 97 нылпиос.

Ульчаос кузя мынӥськод ке, коркаосмы ог-огенызы ӵошатско кадь, сыӵе чебересь, йӧноесь сыло соос.

Мон туж яратӥсько аслэсьтым гуртме, ужась калыкме! Котьку потэ тон вӧзын луэме!

Тимофей МИХАЙЛОВ, 5-тӥ класс

6 - толшор - «Вуюись»

1 – Пушин Николай Семёнович – хозяйствоя директорлэн воштӥсез

2 – Чернов Роман (5 класс)

3 – Петрова Людмила Афанасьевна - утялскись

3 – Петров Пётр Наумович - слесарь

3 – Ившина Юлия (4 класс)

4 – Чернова Олеся (3 класс)

4 – Петрова Владислава (2 класс)

4 – Скоробогатов Артём (3 класс)

5 – Будина Марина Викторовна – физкультурая дышетӥсь

7 – Братухин Александр Викторович - водитель

7 – Иванова Елена Васильевна – покчи классъёсты дышетӥсь

7 – Веревкина Мария Александровна - секретарь

12 – Богомолов Владислав (8 класс)

13 – Митрошина Венера Шамилевна – гурт лыдӟиськоннилэн кивалтӥсез

14 – Медведева Ирина Владимировна - пӧрась

15 – Орехова Лидия Алексеевна – удмурт кылъя дышетӥсь

16 – Обухова Полина (1 класс)

16 – Фалалеев Виталий (3 класс)

18 – Ильина Татьяна Васильевна – шеф-повар

22 – Погосян Алина (1 класс)

27 – Первухина Анастасия (1 класс)

29 – Кольцов Станислав (6 класс)

Гажано Николай Семёнович!

Вань сюлмысьтымы ӟечкыласькомы чебер, дано юбилееныды!

Вордскем нунал араз огпол луэ,

Но котьку ик аръёс милем йылтэ.

Аръёс – со узырмы гинэ,

Пурысь йырси – азвесь.

Кин вань меда бен тынэсьтыд но узыргес?

Котьку но лу сыӵе ик мылкыдо,

Шӧртчи, чупрес, капчи сямо!

Тӥляд эшъёсты.

Редактор: Давыдов П.В.

Адрес: МБОУ «Юськинская СОШ», ул. Школьная,10.

Выходит с января 2011 года 2 раза в месяц. Тираж свободный.