Хос эһэм Захаров В.Н.

Хос эһээм Захаров Василий Николаевич

Мин, Алексеева Надя, Майа №1 В.П. Ларионов аатынан орто оскуола 9 «в» кылааһын үөрэнээччитэбин.

Эһиэхэ хос эһэм, Захаров Василий Николаевич туһунан кэпсиэм.

Василий Николаевич Илин-Хаҥалас улууһун Чыамайыкы нэһилиэгэр 1920 сыллаахха сэтинньи 25 күнүгэр дьадаҥы ыалга төрөөбүтэ. Ийэтэ – Марфа Ивановна, аҕата – Николай Петрович Захаровтар. Бииргэ төрөөбүт алтыалар: 5 уол Бүөтүр, Михаил, Афанасий, Николай, хос эһэм Баһылай уонна балта – Дария.

Чыамайыкы 7 кылаастаах оскуолатын төрдүс кылааһын бүтэрэн баран Аммаҕа Өнньүөс 7 кылаастаах оскуолатыгар 5 кылааһы бүтэрбитэ. Эһиилигэр Амма орто оскуолатыгар 6 кылааска үөрэнэн баран, нуучча тылыгар хаалан, салгыы үөрэммэтэх. Төрөппүттэрэ эрдэ өлөн, холкуос араас үлэтигэр үлэлээн барар.

1940-41 с.с. – ферма сэбиэдиссэйинэн анана үлэлиир.

1942 с. – холкуоска суоччутунан үлэлиир.

1943 с. – ыам ыйын 10 күнүгэр бэбиэскэ тутан сэриигэ барар. Забайкальетааҕы байыаннай уокурук 36 дивизиятын 855 строевой полкатын саппаас чааһыгар түбэһэр. Байыаннай сэби-сэбиргэли харабыллыыр сулууспа этэ.

Хос эһэм , баһылай бэйэтэ суруйбут ахтыы суругуттан ахтан ааһыам.

«... Уута суох Монголия кырылас кумах истиэбинэн, арыт иккилии хонукка уу испэккэ, күҥҥэ алталыы көһү хаамар этибит. Киһи кэспэт кумаҕын нэһиилэ туоруурбут. Большой Хинган хайатын туораан, Кытай хоту өттүнэн кыра нэһилиэнньэлээх сирдэринэнэ барбыппыт. Аны ардахтаах сайын буолан, ат соһор аспыт куукуната биһигини сиппэккэ хаалан иһэрэ, онон аһаабакка эрэ бара турарбыт. Сүрдээх эрэйдээх, илистиилээх хаамыы этэ. Манна дизертирдэр да, куттастар да бааллара.

Япония кыраныыссатыгар тиийбиппитигиэр, ити балаҕан ыйын 2 күнүгэр, Япония армията бэриммитин биллэрбиттэрэ. Биһиги, саллааттар, «Ураа» хаһыытаан үөрбүппүт, эҕэрдэлэспиппит. ...»

Сатыы төннөн кэлэн Монголия сиригэр «Канчикал» диэн күүстээх сүүрүктээх сиргэ кэлэн куруус үлэтигэр сылдьыбыт. Манна 1 ый үлэлээбит. Саас ыам ыйын 10 күнүгэр 1946 сыллаахха Хабаровскайга кэлэн боеприпас харабыллаабыт.

Бэс ыйын 9 күнүгэр 1946 сыллаахха 1 ый устата айаннаан, от ыйын 6 күнүгэр дойдутугар тиийэн кэлэр.

1946-1947 с.с. – холкуоска үлэлиир.

1948-1950 с.с. – холкуоска суоччутунан ананар.

1952 с. – биригэдьиирдиир.

1953 с. – столярнай мастерскойга сэбиэдиссэй буолар. Хаһыа да буолан уһаналлар.

1954 с. – сылгы биригэдьииринэн үлэлиир.

1955 с. – быыбарданан сэбиэт сэкэрэтээринэн талыллар.

1956 с. – от ыйыттан маҕаһыыҥҥа атыыһыт буолар.

Пенсияҕа тахсыар диэри дойдутугар маҕаһыыҥҥа атыыһытынан үлэлиир. Таһаарыылаахтык үлэлээн эргиэн систиэмэтин туйгуна буолар. Кэлин, доруобуйата мөлтөөн 2-с группалаах инбэлиит буолар. 1995 сыллаахха 75 сааһын туолуон эрэ иннинэ олохтон барбыт.

Хос эһэм наҕараадалара:

«Японияны кыайыы» иһин мэтээл, «Доблестный труд» мэтээл, Аҕа дойду сэриитин II ст. Ордена, «Ветеран труда» мэтээл, «Ударник коммунистического труда», «Отличник торговли» уонна үбүлүөйүнэй мэтээллэр. Чыамайыкы нэһилиэгин бочуоттаах олохтооҕо.

Хос эһэм ахтыы суруга

«Сэрии саллаата» диэн Степан Марков «Саха сирэ» хаһыакка 2015 сыллаахха тохсунньу 23 күнүгэр таһаарбыт ахтыыта

Хос эһэм 1947 сыллаахха I Наахараттан (Тиэлигиттэн) төрүттээх, 14 оҕолоох Анастасия Михайловна (Саввина) уонна Василий Степанович Сивцевтэр кыыстарын Өксүүһү (Аксинияны) кэргэн ылбыт. Кинилэр 5 оҕоломмуттар: 2 уол 3 кыыс. Улахан кыыстара мин эбэм Марфа Васильевна буолар. Оҕолоро бары үөрэхтэнэн, үлэһит дьон буолбуттара.

Василий Николаевич бу сиргэ дьоллоох олоҕу олорон ааста. Ол курдук, билигин 13 сиэн, 30 хос сиэн баар. Биһиги эһэбитин, хос эһэбитин ытыктыыбыт, таптыыбыт. Хос эһэм олоҕун суола өрүү сырдык холобур буолуо. Кини олоҕо салҕанар!

Болҕомтоҕут иһин баһыыбаларын!