Առարկայական չափորոշիչների և օրինակելի ծրագրերի նախագծի վերաբերյալ քննարկում
Տարրական մասնախումբ
Դասվար ` Նարինե Անանյան
Մայրենիի ուսուցման մեջ բեռնաթափված է լեզվական բաղադրիչը: Իմ սուբյեկտիվ կարծիքն է, որ պետք է ապահովել լեզվական գիտելիքների ամբողջական կառույցի փոխկապակցված ուսումնասիրությունը, պետք է լինի տարրական գիտելիքների և կարողությունների ուսումնասիրման համակարգ, սկզբունքներ: Եթե աշակերտը բանավոր և գրավոր խոսքում պետք է պահպանի քերականական պարզ կանոնները, ապա ինչո՞ւ է քերականական գիտելիքը բացակայում I-IV դասարանների լեզվական գիտելիքների բովանդակությունից: Պիտի լինի բեռնաթափում, բայց այն պետք է լինի գրագետ: Խոսք չկա նաև ուղղագրական կարողությունների ձևավորման մասին, միայն ուղղախոսություն է: Ինչ ուղղախոսություն, եթե ուղղագրական գիտելիքներ ձեռք չբերեն: Մինչդեռ վերնաարդյունքում գրված է գրագետ խոսք կառուցելու կարողության ձևավորում:
Ինչևէ, մեր` ուսուցիչներիս ամենամեծ խնդիրն է սեր և հետաքրքրություն առաջացնել կրթության հանդեպ: Ուղղակի կարելի է փաստաթղթում գրվածը ճիշտ կիրառել. ուսուցչին բավականին ազատություն է տրված: Պիտի փոխենք մեր մարտավարությունը. Արմատական փոփոխություններ մտցնենք մեր մտածողության, մեր գործողությունների մեջ:
Դասվար ` Դիանա Մանուկյան
Կարիք կա վերանայելու IV դասարանի «մաթեմատիկա» առարկայի թեմաները: Այն բավականին դժվար է ու ծանրաբեռնված: Աշակերտները դեռ չեն հասցնում յուրացնել մի թեման, երբ ուսուցիչն արդեն ստիպված է անցնել հաջորդ թեմային:
«Շախմատ» առարկայի ուսուցիչ ` Վարդուհի Ամիրխանյան
«Շախմատ» առարկայի դասավանդման համար ըստ նոր ծրագրի նախատեսված է II,III, IV դասարանների համար լրացուցիչ գործնականի համար տետր, որտեղ հանձնարարությունները պետք է լինեն ամբողջությամբ խաղի տեսքով, որը էլ ավելի կնպաստի աշակերտների ստեղծագործական մտքի զարգացմանը:
Դասվար ` Գայանե Դալլաքյան
Հույս ունեմ, որ քննարկումների արդյունքում կունենանք այնպիսի առարկայական չափորոշիչներ, որը ուսուցչի ձեռքի ամենօրյա գործիքը կդառնա` ապահովելով ուսուցման արդյունավետությունը և շարունակական զարգացումը:
Մենք և մեր երեխաները արժանի ենք որակյալ կրթություն ունենալու:
Դասվար ` Արևիկ Վարդանյան
Քանի որ հանրակրթական չափորոշչում նշված է, որ ուսումնական շաբաթները III և IV դասարաններում կրճատվում են 2 շաբաթով, ապա առարկայական չափորոշիչներում ևս պետք է ժամերը հաշվել 32 ուսումնական շաբաթվան համարժեք:
Դրական ու ողջունելի եմ համարում, որ առարկա, հատկանիշ, գործողություն ցույց տվող բառերը ամբողջ տարրրական աստիճանում խոսքի մասերի անուններ չեն ստանում, կարևոր է, որ աշակերտը կարողանա դրանք տարբերակել:
III դասարանի ծրագրում Ստեղծարարության բաժնի Կապակցված խոսք և տեքստ ենթաբաժնի 2-րդ և 3-րդ կետերը անհասկանալի են շարադրված:
«Մաթեմատիկա» առարկայից կարևոր է վերջնարդյունքների համապատասխանությունը, վիճելի կետեր կան. Օրինակ` համակարգչով անկյուն, ուղիղ, հատված , …. գծելը:
Դասվար ` Նորա Չատինյան
Կրթության նախարարության նախաձեռնած չափորոշչային փոփոխությունները ողջունելի են: Դպրոցն , առհասարակ, վաղուց բարեփոխումների կարիք ունի, մանավանդ հեղափոխությունից հետո:
«Մայրենի» առարկայի շրջանակներում կարևորում եմ զգայական, խոր և հուզիչ թեմաներով պատմվածքների ընդգրկելը, օրինակ, «Դրա կարողը կա՞» կամ « Վաղը ուշ կլինի»: Հանվեցին այս պատմվածքները, մինչդեռ բարոյախրատական , դաստիարակչական ահռելի կնիք էին թողնում աշակերտների վրա: Քերականական նյութեր ևս պիտի ընդգրկել դասագրքում, և անպայման ուսուցանող գրավորների միջոցով պետք է ամրապնդել և հիմնավորել սովորածը: Կողմ եմ գրավորների ժամեր ավելացնելու գաղափարին:
«Ես և շրջակա աշխարհը» առարկան որքան հետաքրքիր , նույնքան էլ բարդ է: Հատկապես IV դասարանում աշխարհագրական գիտելիքների տարափը և քանակը: Ողջունելի է այդ հատվածի վերանայումը և բեռնաթափումը: «Ով ենք մենք» թեմայի շրջանակներում երեխան պիտի կարողանա պատմել ընտանիքի մասին, բայց արժեհամակարգը` հայ լինելը, տոհմը, ազգը, ինքնությունը կարծես չի կարևորվում: Այստեղ հմուտ ուսոցչի ջանքերով է դա արվում, դասագիրքը նման նյութեր չունի, չի նախատեսում:
«Տեխնոլոգիա» առարկայի առաջին դասարանում նախատեսված ողջ նյութը համարում եմ տարիքային առանձնահատկություններին անհամապատասխան, և անհնարին է նման աշխատանքը կազմակերպել 35 աշակերտների հետ: Այդ աշխատանքը կարելի է հրամցնել գոնե 2-րդ դասարանում: 6-ամյա երեխան մկրատով աշխատելու և մատների մանր մոտորիկայի զարգացման խնդիր ունի:
Մեթոդմիավորման նախագահ` Նարինե Անանյան
_____2020թ.