Мурат Шовгенов- Л1ыхъужъыр ренэу щэрэ1

Насыпыр къэзыухъумагъэмэ

Щытхъур адэжь!

Хэгъэгум псэр фэзытыгъэмэ

Щытхъур адэжь!

Щытхъоп зыфэбэнагъэр -

Тищы1эныгъ.

Дышъэп яхъопсэп1агъэр -

Шъхьафитыныгъ...

Щэш1э Казбек

Мак1эп къызэрэхэк1ырэр ц1ыфыр щэ1эфэ амыш1эу , ау щымы1эжь зыхъурэм и1офш1агъэхэр къэнэфэжьхэу ык1и ахэмэ ц1ыфым ыц1и къа1этыжьэу. Ау Шэуджэн Мурат мы гущы1эхэр еп1ол1эшъущтхэп. Ащ ищы1эныгъэ гъогу к1эк1ыгъэ нахь мыш1эми, ц1ыф хьалэлэу, 1эдэб хэлъэу шъхьэк1афэ афиш1эу щытыгъ.Гъэш1э гъогоу къык1угъэр мак1эми, иш1уш1агъэк1и, л1ыгъэу зэрихьагъэмк1и Шэуджэн Мурат лъэуж хэхыгъэ къыгъэнагъ. Къош Абхъазым ишъхьафитныгъэ фэбанэзэ, л1ыхъужъэу фэхыгъэ нарт хъулъфыгъэр зэрэныбжьык1эу нэгум к1эт.

1992- рэ илъэсым, шыщъхьэ1у мазэм и 14-м Грузием иу1эшыгъэ купхэр заок1э Абхъазым ич1ыгу ихьагъэх. А къэбарым рэхьатэу укъигъэнэнэу щытыгъэп , ык1и къош республикэм 1эпы1эгъу фэхъущтхэм зэу ахэхьагъэмэ ащыщыгъ Мурати.

Мурат хьылъэу къау1агъ , к1оч1аджэ хъугъэ . Тидзэк1ол1хэр 1эпы1эгъу зэфэхъужьхэзэ Мурат зэуап1эм къырахыгъ, ау ылъакъомэ атеуцожьынэу амал и1эжьыгъэп...

Къыхэзгъэщымэ сш1оигъор Мурат ыгук1и, ыпсэк1и лъэпкъхэм язэпхыныгъэ игъэпытэн , адыгабзэм игъэлъэп1эн лъэшэу пылъыгъ.Мак1эп ащ усэу ытхыгъэри.

Тэ Кощхьаблэ гурыт еджап1эу Мурат ыц1э зыхьырэм тыщеджэ.Л1ыхъужъым ыц1э зэрэдгъэлъэп1эщтым ренэу тыпылъ. Бэдзэогъум и19-м Мурат къызщыхъугъэ мафэр хэдгъэунэфык1ыгъ.Иныбджэгъухэр, и1ахьылхэр, ибынхэр еджап1эм къырагъэблэгъагъэх. Къош Абхъазым щыщ л1ык1охэри а зэ1ук1эм щы1агъэх. Бэ гукъэк1ыжьэу къа1отагъэр, гущы1э дахэу къыфа1уагъэр. Тэри еджап1эм ч1эс еджак1охэм ащ ти1ахьыш1у хэтш1ыхьагъ. Мэфэк1ым игъэхьазырын тыгу етыгъэу тыхэлэжьагъ. Мурат иусэмэ ащыщхэм тыкъяджагъ.

Шэуджэн Мурат къытхэтыгъэмэ, мы мафэхэм ыныбжь илъэс 60 хъущтыгъэ . Л1ыхъужъым пц1эшъуащэр къытефи ыгу къыгъэуцугъэми, непэ иш1уш1агъэхэмк1э къытхэт. Ныбжьык1эхэм щысэ къытфэхъу.

Л1ыхъужъныгъэр жъы хъурэп. Къош Абхъазыр непэ мамырэу мэпсэу. Зэкъошныгъэр къэзыухъумэгъэ дзэк1ол1хэр ренэу тыгу илъыщтых. Тэри зэрэтфэлъэк1эу мамырныгъэм тыфэбэнэщт.