Нохчийн мотт
3-чу классехь йиллина урок
Урокан ц1е:"Къасторан хьаьркаш"
Х1оттийнарг а, д1ахьошверг а:
Зайтемиров Сайдик
27.10.2018 ш.
Нохчийн мотт
Урокан ц1е: "Къасторан хьаьркаш"
1алашо: къасторан хьаьркийн маь1на, церан дашехь йолу меттиг йовзийтар; 1амийнарг карладаккхар; йозанан а, барта а къамел кхиор; г1иллакх- оьздангалла 1амор.
Урокана оьшу г1ирс: къасторан хьаьрках лаьцна кечйина презентаци, тептарш, къоламаш, компьютер, экран, проектор, учебникаш, ловзаран кепана лерина кехаташ, урокан жам1 даран г1ирс.
Юкъара дешаран ардам (УУД):
Предметни: дешархошна 1емар ду дешнашкахь къасторан хьаьркаш язъян а, церан меттиг дашехь йовза а. Дешархошна 1емар ду учебникаца а, тобанашкахь а болх бан, оьшург лаха, цунах пайдаэца, 1амийнарг карладаккха, г1иллакх оьздангалла 1ама.
Метапредметни:
Регулитивни: хьехархочун г1оьнца урокан коьрта 1алашонаш, т1едехкарш билгалдаха; уьш кхочушдарехь нийса некъаш каро; хуур ду шайн белхан план х1отто.
Коммуникативни: 1емар ду хьехархочун хаттаршна нийса жоьпаш дала; шайн хаарш масалшца т1еч1аг1дан; 1емар ду шайн оьшург хатта, вовшашца къамеле бовла.
Х1ума довзаран: 1емар ду учебникаца болх бан, оьшу г1ирс (материал) каро, цуьнах пайдаэца; ойлаяр, тидам бар кхуьур ду.
Личностни: нохчийн меттан башхаллаш евзаш, нохчийн мотт дика 1амо лаам кхуьур бу дешархойн.
Урок д1аяхьар.
l. Догдаийтаран мур.
- Де дика хуьлда шун!
- Диканца дукха вехийла хьо!
-Охьаховша бераш, х1инца вай нохчийн меттан йиллина урок ю. Вайна урокехь оьшу г1ирс схьаоьцуш кечамбе урокана.
ll. Ц1ера болх таллар.
-Муьлха шардар дара шуна ц1ахь кхочушдан делларг?
- Тхуна деллера шардар 64.
-Муха кхочуш дира аш и шардар?
-Оха х1етал -металан жоп лехира. Карийначу жоьпана мукъаза шиъ шалхачу элпана к1ел сиз хьаькхира.
- Х1ун дара цуьнан жоп?
- Цуьнан жоп дара "чкъург".
- Мукъаза шиъ шалха элп т1аьхьий- хьалхий нисделча муха яздан деза?
- Мукъаза шиъ шалха элп хьалха - т1аьхьа нисделча, хьалхарчу шалхачу элпан шолг1а хьаьрк ца яздо, ткъа шолг1а хьаьрк дуьззина д1аяздо.
( Дешархоша бакъо схьаюьйцу)
Тобанашкахь болх.
Т1едиллар : "Дайна элп караде".
Х1ора тобано т1адамийн метта дайна элп каро деза и каро дика хаа еза вай хьалха 1амийна бакъо.
1-ра тоба:
Ле...къа
ба...хьаш
2-г1а тоба:
...къес
ри...къ
3-г1а тоба:
т1е...т1а
ни...къ
4-г1а тоба:
Т1а...кха
до...кха
-Д1адеша аш яздина дешнаш.
-Оцу дешнашкахь муьлха элпаш дихкина аш?
-Муьлха аз хеза цигахь шуна?
-Ткъа аш «ч» х1унда яздина?
- Мукъаза шиъ шалха элп хьалха - т1аьхьа нисделча, хьалхарчу шалхачу элпан шолг1а хьаьрк ца яздо, ткъа шолг1а хьаьрк дуьззина д1аяздо.
Х1инца д1аяздо вай терахь , классера болх.
lll. Ц1енаяздаран минот.
Дика йо1 ю Айман,
Шеца долуш…(ийман)
- Ийман бохучу дашна хьалха муьлха элп хеза вайна?
-Ткъа тахана вайга хьошалг1а муьлха элп деана?
Ии
- Мукъа ду и я мукъаза ду ?
-Мукъа ду?
-Х1унда ду и мукъа?
-Багахула олучу хенахь цхьа новкъарло йоцуш хецна д1аалало и.
-Маса меженах лаьтта "И" элп?
-Шина меженах лаьтта.
(Хьехархочо яздаран бакъонаш гойту. Дешархоша тептарш т1е д1аяздо.)
lV. 1алашо йовзийтар. Дешаре шовкъ кхоллар.
-Бераш, д1адеша х1етал-метал.
Мукъачеран, мукъазчеран,
Нагахь юкъахь далахь дов,
Машар барца дехьа, сехьа,
Кхуссу оха, доккхий ков.
Алал, доттаг1, дов д1адерзош,
Х1ун дан деза сиха ахь?
Жоп : (Къасторан хьаьркаш)
Зайтемиров Сайдик
-Стенах лаьцна дара и х1етал метал, х1ун дан деза дов д1адерзош , муха бийр бара аш царна юкъахь машар?
-Къасторан хьаьркаш йохкур яра.
-Ткъа, бераш, тахана вайн урокан тема х1ун ю аьлла хета шуна?
- Тахана вай урокан тема "Къасторан хьаьркаш"ю аьлла хета.
-Бераш, аш нийса боху, вай тахана урокан тема ю "Къасторан хьаьркаш.
V. Керла тема хьехар.
а) Бакъо таллар.
-Д1аеша 32 аг1он т1ера бакъо.
-Муьлха элпаш лела къасторан хьаьркийн маь1нехь?
-Элпаш ь, ъ къасторан хьаьркийн маь1нехь лела.
- Цара х1ун гойту?
- Мукъа аз мукъазчух д1ауьйш ца хилар гойту.
-Муьлхачу элпана т1ехьа бен ца яздо къасторан «ь»?
-Къасторан «ь» хьаьрк «к» элпана т1ехьа бен ца яздо.
2.Шардарехь къасторан хьаьркийн тидам бар.
- Д1адеша 66 шардаран т1едиллар.
- Муха кхочуш дан деза вай и шардар?
- Ъ,ь элпашна а, цара къастош долчу мукъаза а, мукъа а элпашна к1ел сиз
хьакха дезаш ду.
- Муьлхачу элпашна хьалха яздина ъ,ь элпаш?
-Мукъазчарна т1ехьа, мукъачу элпашна е-ний, я-ний, яь-ний хьалха яздина.
-Муьлхачу элпана т1ехьа язйина аш къасторан хьаьрк?
(Уьн т1ехь кхочуш йо. Цул т1аьхьа дешархоша шайн тептарша т1е д1аязйо.)
Vl.Сада1аран минот.
- Цхьа жимма сада1ий вай ?
Г1иллакхе верг наха лору,
Г1оза ваха цара олу.
Г1атта ваг1ахь воккханиг,
Г1иллакх ма ду коьртаниг.
-Бераш, шуна муьлха г1иллакхаш девза?
- Воккханиг вог1уш, охьахиъна велахь, хьалаг1атта веза, воккхачунна некъ хадо мегар дац.
Иштта кхин масалаш даладо дешархоша.
Vll. 1амийнарг т1еч1аг1дар.
1. Тобанашкахь болх.
Мила ву тидаме.
-Бераш, вай х1инца тобанашкахь болх бийр бу. Маь1нехь т1еоьшу -елла, -яьлла а, къасторан хьаьркаш а йоьхкуш, д1аязде шайн тобанера дешнаш.
1-ра тоба:
Т1ех...
ч1аг1...
цец...
2-г1а тоба:
Мац...
(шел...
лах...
3-г1а тоба:
Гал...
сен...
ц1ан...
4-г1а тоба:
Хьаг...
йох...
йиц...
Х1ора тхьамдано шаьш девлча шайн тобано яздина дешнаш схьадуьйцу.
-Муьлха къасторан хьаьркаш йихкина аш?
аь) Шаьш бен болх.
-Д1адешша шардар 71.
- Муха кхочуш дан деза иза?
-Оьш- оьшучу къасторан хьаьрк ъ,ь дуьллуш, схьаязъян езаш ю.
- Оцу предложенехь муьлхачу дашна йиллина аш къасторан хьаьрк?
- Шекьяьлла дашна.
-Шекьяьлла дашна муьлха къасторан хьаьрк йиллина аш?
- Къасторан к1еда "ь" хьаьрк.
- Нийса боху, х1инца шайн тептарш т1е д1аязде шардар.
Vlll. Рефлекси.
-Х1ун керланиг девзи шуна тахана урокехь?
-Х1ун хазахийти шуна тахана урокехь?
- Вай х1оттийна 1алашо кхочуш хилла аьлла хетий шуна?
- Т1ейог1у урок муха хила лаара шуна?
- Шайна урок хазахеттехь самукъане смайлик хьалаайба, шайна урок хаза ца хеттехь г1айг1ане смайлик хьалаайба.
lХ. Урокан жам1 дар.
-Муьлха элпаш лела къасторан маь1нехь?
-Элпаш ъ,ь къасторан маь1нехь лела.
-Цара х1ун гойту?
-Мукъа аз мукъазчух д1ауьйш ца хилар гойту.
Х. Ц1ахь бен болх.
Шардар 70, аг1о 34.
- Т1ера схьаязъе шайца къасторан хьаьркашца дешнаш долу предложенеш. Къасторан хьаьркаш долу дешнаш билгалдаха къоламца, 1амае бакъо.