Презентация на тему: Жеңіс

Қызылорда облысы

Жаңақорған ауданы

Тақырыбы:

“ Ешкім де, ешнәрсе де ұмытылмайды”

Орындаған: Битасов Темірлан

7-сынып оқушысы

Жетекшісі: Бутакулова Гулназа

тарих пәнінің мұғалімі

№ 3 мектеп-интернат

Соғыс.... Соғыстың аяқталғанына да биыл міне, 70 жыл толғалы отыр. Сонда да осы сөзді естігенде денең түршігіп, тұла бойың мұздап сала береді. Осынау қиын-қыстау заманда өз Отанын, Атамекенін, Халқын қасық қаны қалғанша қорғаған ата-апаларымыз қаншама! Неше алуан соғыс дүниені дүр сілкіндірді, бірақ екінші дүниежүзілік соғыс, қаншама адамзатты қисапсыз қасіретке ұшыратқан өлімімен мәңгілік есте қалды.

Жеңіс елімізге оңай келген жоқ. Ұлы Жеңіс бабаларымыздың биік патриотизм сезімдері мен рухтарының  мықтылығымен келді. Уақыт зымырап өтіп жатыр. Уақыт өткен сайын заман өзгеруде, бірақ өткен өмір тарихы мәңгі есте сақталуда. Мен соғысқа қатысқан жоқпын, менің ата-анам да соғысқа қатысқан жоқ, бірақ біздің ата-апаларымыз ауыр күндердің тауқыметін тартты. Қаншама хабарсыз кеткен, соғыс майданында қаза болған бабаларымыз Еліне, Туған жеріне оралған жоқ! Біз неге оларды ұмытуға тиіспіз?! Олар болашақ ұрпағы үшін жанын қиды! Осынау тыныш, бейбіт өміріміз, міне, солардың арқасы емес пе?!

Ерлігіңді қастерлейді жас ұлан,

Ерлігіңе арналады асыл ән.

Сіз бар кезде шын батырдың үлгісі,

Теңіздегі толқындай боп тасыған!

Мен сұрапыл соғыста қайтыс болған боздақтардың сол кездегі тағдырын көз алдыма елестетемін. Ал біз соғыстан аман-есен оралған жауынгерлердің соңғы буынын көретін ұрпақпыз. Соғыс ардагерлері жыл өткен сайын сиреп барады. Біз оларды тек жеңіс күні ғана емес, әрдайым еске алып құрметтеуіміз керек. Себебі, олар біздің осы бақытты өміріміздің негізін қалады.

Мен осы сұрапыл соғыс туралы қайдан білемін? Мектебімізде жыл сайын 9 мамыр Жеңіс күніне арналған салтанатты жиын өтеді. Бұл күні мектебімізге Ұлы Отан соғысының ардагерлері келіп, бастарынан өткен қиын күндерді жалықпай бізге айтып береді. Біз ардагерлерге, Ұлы Жеңістің құрметіне арнап концерттік бағдарлама ұйымдастырамыз. Ал аудан орталығында Ұлы Жеңіске арналған үлкен жиын болады. Аудан әкімі ардагерлерімізге сый-сияпат үлестіріп, айтулы мерекелерімен құттықтайды. Жылында бір рет Ұлы Жеңіске арналған тәрбие сағатын сынып жетекшісімен бірге өткіземіз. Соғыстың қалай басталып, аяқталғанын, батырлардың ерлігін әңгіме етеміз. Ата-апаларымыздың ерлігіне баға береміз.

1945 жылдың 1 мамырында Рейхстаг күмбезіне Жеңіс Туы тігілді. 2 мамыр күні – Берлин гарнизоны тізе бүкті. 8 мамырда – Германияның сөзсіз тізе бүгуі туралы Актіге неміс фельдмаршалы Кейтель қол қойды. 9 мамыр – Жеңіс күні боп белгіленіп, Кеңес Одағы халқының Ұлы мерекесіне айналды. Ауданымыздан аттанған 4949 адамның 2289-ы кіндік қаны тамған еліне оралмай, туған жердің топырағы бұйырмай қалды. Жерлестеріміз Әнуар Әбутәліпов пен Александр Дмитриевич Романов Кеңес Одағының Батыры атағына ие болды. Аудан орталығындағы Жеңіс саябағында боздақтарға арналған тақта мен ескерткіш бар. Саябаққа барған сайын батырларымыздың ерен ерлігі есімізге түседі

5-сыныпты бітірген жылы (2013 жылы) Алматы қаласындағы “28 панфиловшылар” атындағы саябаққа бардым. Мені анам апарған еді. Жазғы демалыстан келгеннен кейін тарихтан сабақ беретін апайыма осы жайлы айтып едім, панфиловшылардың ерлігі, Панфилов деген кім екенін, Клочков туралы бәрімізге әңгімелеп берді. Олардың ерлігіне таңқалыстық.

Ұлы батырларымыздың ерлігі ешқашан ұмытылмақ емес. Бір өкініштісі, жылдан жылға олардың қатары азайып бара жатқандығы. Батырлардың аттары тарих бетінде алтын әріптермен жазылып, сақталады деген үміттемін. Болашақ ұрпаққа еш өзгеріссіз осы тарихты жеткізу біздің парызымыз.

Саябақта “Мәңгілік алауды” да тамашаладым.

Ұсыныстарым:

• Қатары азайып бара жатқан ардагерлердің үй шаруасына көмек ұйымдастырылса;
• Ұлы Жеңіске байланысты конкурстар, байқаулар саны арта түссе;
• Ұлы Жеңістің құрметіне факультатив сабақтар ашылса.