Сценарий мероприятия "Наврез байрам"

« Наврез кельди» йырынынъ музыкасынен балалар санагъа кирерлер ( эллеринде кягъыттан япылгъан сепетчиклер Наврез чечеклеринден – акъбардакъларлар) ве зал ортасында мусафирлерге къаршы туралар.

Алып барыджы:

Селям алейкум, сайгъылы мусафирлер, севимли балалар! Бугунь бизге энъ гузель, энъ дюльбер, севимли баарь байрамы – « Наврез» кельди. Эвель заманлардан берли бу байрам янъы кунь, янъы йыл байрамы сайыла.

Мубарек олсун йылбаш, баарь байрамы – «Наврез»!

1-нджи бала:

Сувукъ къыш мевсими шиддети кечти

Башкъа ренкке кирди земане, достум

Баарь демлерининъ къокъусы тюштю

Дагъытты анбери джиане, достум.

2-нджи бала:

Хош кельдинъиз бизим байрамгъа

Азиз мусафирлер, севимли балалар!

Хайырлы олсун Наврезимиз

Кельген янъы йылымыз.

3-нджи бала:

Не гузель Къырымнынъ баари

Багъ-багъча гуль-чечек ачкъанда

Чочамий торгъайлар чырылдай

Чёллерге экинлер сачкъанда.

4-нджи бала:

Бакъыныз – ем-ешиль орталыкъ

Кийинип-къушангъан чайырлар

уль топлап бахтияр балалар

Наврезнинъ йырыны йырлайлар.

«Наврез кельди» йырыны бутюн балалар йырлайлар. Акъбардакъларнен сепетчиклерни мусафирлерге багъышлайлар. Сонъ эки тарафтаки отургъычларгъа ерлешелер.

5-нджи бала:

Йылбаш, йылбаш,

Йылбашынъыз къутлу олсун,

Сыгъырлар сютлю олсун,

Балалар сагълам оссин,

Эвлер берекет толсун!

6-нджи бала:

Биз ойле бир балалармыз,

Эм ойнаймыз, эм йырлаймыз,

Шенъликсиз байрам кечмез,

Оюн-кулькю ич битмез.

Алып барыджы:

Эвель-эзельде къырымтатарлар байрам арфесинде айрыджа темизлик ишлерини япа тургъанлар. Джумледен, адамлар Наврез байрамы арфесинде дагъларгъа барып, чокъракъларны, ирмакъларны темизлей экенлер. А-на, бакъынъыз, бизим балалар да чокъракъ темизлемеге кетелер.

Шенъ ава алтында огълан балалар «Куреклерненоюн» инсценировкасыны иджра этелер.

Алып барыджы:

Къызларымыз исе эвде аналарына бойле ярдым этелер.

«Анама ярдым этем» йыр инсценировкасы.

Алып барыджы:

Балалар, билесинъизми, Къырымнынъ Мисхор коюнде Арзы деген бир къыз яшагъан. Арзы о къадар дюльбер экен ки, онынъ дюльберлиги акъкъында ябанджы улькелерде биле эшиткенлер. Иште, Наврез байрамы акъшамында Арзынынъ тою оладжакъ куню денъиз айдутлары къызны алып къачалар ве султан сарайына саталар. Шу сарайда Арзыгъа татлы, лезетли ашлар берелер, дюльбер урбалар кийдирелер. Амма Арзы, эписи бир, догъгъан коюне, севгилисине асретлик чекип, айырылыкъкъа даянмай озюни юксек къаледен денъизге ата да, сув анасына чевириле. О, эр йыл Наврез байрамы озь коюнинъ ялысына ялдап чыкъа ве асретли козьлеринен койге бакъа. О кельген куню чокъракълардан, чешмелерден сув номай акъа экен.

Бугунь да чешмелерде, чокъракъларда сув чокълашты.

Къызлар, айдынъыз, гугюмлеринъиз алынъыз да, сувгъа барайыкъ.

«Гугюмлернен оюн»

Алып барыджы:

Балалар, баарь кельгенде къушлар, айванлар, тереклер, отлар, боджеклер, табиат уяна. Дюнья дюльберлеше.

Наврез кельди,къушлар оте

Багъчаларда,багъларда.

Азбарларда ишлер ете,

Сабакътан акъшамгъадже.

чечеклер ачылды

Ангимиз аля чечектир.

2-нджи чечек:

Ляле дер ки, - Мен лялейим,

Джумленъизден мен аляйим.

Эм ярашыкъ, эм сефайым,

Ангимиз аля чечектир?

3-нджи чечек:

Къаранфиль:- Мени экерлер,

Бейлер эвин безетирлер,

Алып черепке дикерлер,

Ангимиз аля чечектир?

4-нджи чечек:

Мелевше:- Мен дженнет багъры

Ашыкълар сёйлерлер догъру.

Нечюн меним бойнум эгри?

Ангимиз аля чечектир?

5-нджи чечек:

Сумбуль дер ки,- Къаным акътыр,

Ичимде ич ким ёкътыр.

Джумлени яраткъан хакътыр,

Ангимиз аля чечектир?

6-нджи чечек:

Умер туты сумбуль сёзюн,

Кетирсин чечегин юзюн.

Гъондже тенби этсе, козюм,

Ангимиз аля чечектир?

Алып барыджы:

Машалла балаларгъа. Шиир окъумагъа, ойнамагъа яхшы биле экенсинъиз. Мен энди сизинъне къадар чевик олгъанынъызны корьмек истейим. Шимди «Ким тез сачар» деген бир оюн ойнайыкъ. Шимди сиз эки группагъа болюнмек керексинъиз. Залны да гуя эки «тарлагъа» болейик. Башта урлукъларыны сайламакъ керексинъиз ве он дане къарпыз урлукъ сачыла.

«Ким тез сачар» оюн.

Алып барыджы:

Къарпыз сачылды, энди кельди вакъыт багъшышлар алмагъа. Гъалибе къазангъан группагъа къарпызгъа ошагъан топ. Ве эписи татлы эдиечиклер аладжакъ. (Къарпызгъа бензеген топ ичине канфет толдурмакъ ве оны сойып балларгъа даркъатмакъ).

Алып барыджы:

Халкъымызда эр бир той-дюгюнни, байрамны хораннен екюнлемек адет олгъан. Айдынъыз, биз де бир хоран тепейик!!!

Хоран .