Сценарий театрализованного обряда "Гущэхэпхэ"

«Гущэхэпхэ»

Учитель кабардинского языка и литературы

Люева Мадина Азраталиевна

Гущэхэпхэ

Ведущэм:

Нобэ дэ ди гуф1эгъуэшхуэщ.

Зэхэзыххэр къытхуохъуахъуэ.

Къытхэхъуащи сабий дыгъэ

идощ1эк1ыр гущэхэпхэ.

Къыддэф1эттэм ди гуф1эгъуэр,

Зыщывгъазэм ди утыкум,

Нани дади фщ1ынт я гуапэ,

Пыщэт джэгум, ажэгъафэ.

(Гупыр къофэ,анэшхуэм ц1ыхубз хьэщ1эхэр сабий зыщ1элъ пэшымк1э щ1ешэ.)

Анэшхуэм:

Фыкъыщ1ыхьэ ,си хьэщ1эф1хэ,

Феплъ мы дыгъэ къытхэхъуам.

Нобэ сэ си гуф1эгъуэшхуэщ,

Жьыщхьэмахуэ сэ сыхъуащ.

(Ц1ыхубзхэр сабийм иоплъ,нэ темыхуэн щхьэк1э ар дахэу жа1эркъым. ).

1. Щхьэхупц1апц1эм т1ат1ий хэфлъхьэ е.к1эгъуасэ нат1эм щыфхуэ,мазэм хуэдэщ,пу,1еижь.

2. Сабий дыгъэщ, пу,гъуамэжь ц1ык1у,а-ды-дыд,1еижь ц1ык1у , тхьэм укъигъэхъу.

3.Пу-пу,дыгъэ шырщ, дзыгъуэжь ц1ык1у,удахэхэкъым,Тхьэм укъигъэхъу.

4. Си нэхунэ,феплъыт мы 1еижь ц1ык1ум,дзыгъуэхэм ягъэдыхьэшх.

Анэшхуэм:

Уэ Лалусэ,угъурлыуэ

Бынипщ1 зэуэ зэдуп1ащ,

Къуэрылъху ц1ык1ур схухэппхэну

Сыпщыгугъыу укъезджащ.

Лалусэ:

Алыхь,Гуащэ,а уи лъэ1ур

Сф1экъабылу згъэзэщ1эным.

Нысэ ц1ык1ур к1элъызгъэплъу

Дзадзур гущэм фхухэспхэным.

Лалусэ:

Гущэ дэгъуэщ мы фи гущэр,

Пхъэр мэзышхуэм къифшагъэнщ.

Анэшхуэм:

Нысэм и чейм дзыгъуэ хищ1ауэ къызэрищ1эу

Л1ыжьыр к1уэри пхъэр къишат.

Хьэмк1ут1ейр пхъэ угъурлыкъэ,

Гущэ дэгъуэ къищ1ык1ащ.

Лалусэ:

Къыщ1эфшэ нысащ1э ц1ык1ур,абы псори илъагъун хуейщ. Згъэзэнщ гущэм и п1эщхьагъыр псы къежэхым и къежьап1эмк1э

Къафщтэ мыдэ зы къамэдзэ,

е гъущ1 к1апэ, и п1эщхьагъым к1эщ1эддзынщ.

Гущэ къуапэм блащхьэ ф1эддзэм,

сэбэп хъунущ,тэмакъыдзэ дзэдзур хъуамэ,

иревгъафэ псы ,хъужынщ.

К1эщ1эзвгъалъхьэ амдэч ц1ык1уи,

бзэджэнаджэр игъэщтэнщ.

Фыщ1эгуф1э фи сабийр

1умахуэу,жьэнахуэу,

хэхуэныгъэр и бжаблэу,

Благъэу и1эр игъэгуф1эу,

нанэ и щ1асэу,дадэ и гупсэу,

и анэ зэрышынэ мыхъуу,

И адэ зэрыгугъэм тету,

Л1ыф1 хъуауэ Тхьэм дигъэлъагъу!

Джэдур хипхэ хуэдэу зещ1.Иужьк1э "Быдзышэ жей нок1уэ» же1эри сабийр гущап1эм хегъэгъуалъхьэ.

Къафщтэт мыдэ цы 1уданэ,

1эпщэ ц1ык1ум ар исщ1энщ

Нэ темыхуэу къэхъумэ щ1алэр,

Л1ы емынэ къыхэк1ынщ.

Къаплъэ,нысэ,уигу иубыдэ.

И п1эщхьагъыр лъахъшэ пщ1ымэ,

Дзэдзур щхьэукъэу къэнэнщ.

Лъагэ пщ1ымэ, и щхьэр щ1и1уу,

Егъэзыхауэ зиужьынщ.

И 1э ц1ык1ухэр умыукъуэдиищэ,

пщэк1ыхь,дамэ гуэлэл хъунщ.

И 1э ц1ык1ухэр к1эщ1эбгуэ1уэмэ,

Дамэдууэ къыпхуэнэнщ.

Лъакъуэ ц1ык1ухэр зэпкъузыл1эм,

Лъэгуажьэ к1энауэу зиужьынщ.

Къэбгъэт1асхъэм, лъакъуэ 1ушэ

хъунщи, дзадзур бгъэунэхъунщ.

Лъакъуэ ц1ык1ухэм я зэхуакухэм

пл1ащ1э- тхуащ1эу хъыдан дэлъхьэ.

Шэщ1 лъэтхьэмпэр,и лъэгу дыгъуэр

Дахэу,куууэ хъуным папщ1э.

Мыр щыбгъашхэк1э,нысащ1э,

Зы лъэныкъуэм иомыгъасэ,

Къызыхэк1ыр арщ щхьэп1ащ1эр.

Лъэныкъуит1ымк1э гъурыгъуэу

ует1ысыл1эм утыншынщ,

Уэрк1и ахэр сэбэп хъунщ,

Анэшхуэм:

Жьыщхьэмахуэ ухъу, Лалусэ,

Уэ си лъэ1ур бгъэзэщ1ащ.

Нысэ ц1ык1ум илъэгъуахэр

ищ1эжыфмэ дехъул1ащ

(Ц1ыхубзхэр щыхьэт тохъуэ нысэм илъэгъуахэр зэрищ1эфынум).

Анэшхуэм:

Иджы ,си хьэщ1э лъап1эхэ,

1энэмк1э фынысхуеблагъэ.

Си ерыскъым фысхухэ1эбэ,

Ди сабий дыгъэм фыкъысхуехъуэхъу.

Джэгур ажэгъафэм зэхеублэж.

Ведущэм:

Гуф1эгъуэр ди куэду,

Джэджьей быну дыбагъуэу,

Махуэл дэмык1ыу ди гущэхэпхэу,

Сабий гъы макъ къэмы1уу,

Къэзылъхуахэм зэдап1ыжу,

Ди лъэпкъыр узыншэу ,

Илъэс минк1э псэуну сохъуахъуэ !

8