7...Адеп- ахлак
8...Кесип тандоо
9...Убакытты туура пайдалануу
7.Адеп- ахлак – адамдын көркү.
А: Окуучуларга суроолор.
Конок күткөндө биз эмнеге көңүл бурабыз?
Бирөө менен кантип учурашабыз?
Карыларыбызга кандай мамиле кылышыбыз керек?
Б: Теманын түшүндүрүү.
Адеп, коомдо салт-санаа жана белгилүү эрежеге айланган жүрүш-туруш жана кыймыл аракет же теориялык билим дегенди түшүндүрөт. “Адаб” сөзү араб тилинен кошулган сөз. Арапчадагы мааниси чакыруу, назиктик, кичипейилдик, суктануу мактоо деген маанилерди берет. Ал эми ислам дининдеги мааниси, Кудайдын жана Пайгамбарыбыздын буйрук жана тыйу салууларына ылайыктуу баш ийип жашоо.
Эми төмөндө адеп-ахлакка ээ болуп жашоо үчүн кээ бир мүнөз жана эрежелерге, салт-санааларга өзүнчө токтолуп өтөлү.
Кичипейилдүүлүк (жумшак мүнөз): Кичи пейилдүүлүк - жагымдуу мүнөз, эмоцияга алдырбоо, жинденбөө, кечиримдүү болуу, ар кандай жаман абалда өзүн кармоо жана оор бастырыктуу болуу.
Кичипейилдүүлүк адеп-ахлактын фундаментин түзөт. Чындыгында кичипейилдүү киши коомдо урмат-сыйга ээ болот. Коомдо кичипейилдүү кишилердин саны көп болсо проблемалардын саны азаят. Коомдун проблемаларын чечүүүчүн ар бирибиз кичипейилдүү болууга аракет кылышыбыз керек.
Карыларга урмат-сый: «Карысы бардын ырысы бар» - деген сөз бар элибизде. Ал эми «Бели бүкчөйгөн карылар, сүт эмген бөбөктөр, оттогон айбандар болбогондо силерди балээлер сел сыяктуу каптамак» дейт динибизде. Коомубузда карыларыбыз болгондугу үчүн биз тынчтыктабыз жана ырыскыбыз мол. Карыларга урмат-сый коомдук транспорттордо орун бошотуу, оордугун колунан алуу, көпчүлүктүн ичинде алгач сөздү аларга берүү, алардын жанында жогору үн менен сүйлөбөө, адеп ахлаксыз кыймыл аракет жасабоо, төрдөн орундук көрсөтүү болуп эсептелет. Ар бирибиз картаябыз, ошондуктан жаштыгыбызда карыларга урмат-сый көрсөтсөк, карыганда биз да урмат-сый көрөбүз.
Саламдашуу адеби: Саламдашуу адамдардын арасында жылуу мамилени күчөтөт. Динибизде салам берүү сүннөт, алик алуу фарз деп айтылат. Бири-бирибизди дагы жакындан таанып билүүүчүн, достукту күчөтүүүчүн арабызда саламдашууну адатка айландыралы.
Саламдашуунун эрежелери:
Жолукканда саламдашкан сыяктуу, коштошоордо да саламдашыңыз.
Жолугуп калган эки кишинин жашы кичинеси чоңуна, саны аз болгон кишилер саны көп болгондоруна, жаштар карыларга, ат үстүндө болгон жөө болгондорго, басып бараткандар отургандарга, аркадан келгендер алдыдагыларга салам беришет.
Көпчүлүккө берилген саламдын алигин бир киши алса болот.Эч бириси алик алышпаса баары салам берген кишиге карыз болушат.
Саламга дароо жооп берүү, салам берген киши уга тургандай үн менен алик алуукерек.
Салам берген кишинин саламын укмаксан болуу туура эмес.
Салам берип, алик алуу достуктун белгиси
Чүчкүрүү адеби: Чүчкүрүү бардык адамдарда болотурган физикалык абал жана муктаждык. Чүчкүргөндө оозу жана мурдунан чыгып кете турган нерселер айланасындагы кишилердин тынчын албашы үчүн колу менен жүзүн жабуусу туура болот. Эстегенде алакандын аркасы менен оозду жабу туура болот.
Тамактануу адеби: Тамактанууучурунда көңүл бура турганнерселер:
Тамактанаардан мурда жана тамактангандан кийин колду таза жууш керек
Тамакты оң кол менен жеш керек. Тамактанууну баштаганда «Бисмиллах» жана бүткөндө «Алхамдулиллах» деш керек.
Тамак жеп жатканда шашылбоо керек, майда чайнап анан жутуукерек.
Тамак жей баштаардан мурда улуу кишинин биринчи башташын күтүүкерек.
Кашыгындагы тамакты суутуу үчүн ага үйлөгөн туура эмес. Ар ким өз алдынан жеш керек. Ооздо тамак менен сүйлөбөө керек.
Тамакты бышырган кишиге ырахмат айтуу керек. Дасторконду салганда жана жыйганда жардамдашуукерек.
Элдер менен сүйлөшүү жана насаат айтуу адеби: «Жылуу сөз жыланды ийинден чыгарат», «Жакшы сөз жан эргитет, жаман сөз жан кейитет»-дейт элибизде. Инсандар сүйлөшүү аркылуу бири-бирин түшүнүшөт.Элдер менен сүйлөшүүдө кээ-бир эрежелерге көңүл буралы.
Салам айтуу менен сөздү баштоо керек.Ал абалын суроо туура болот.
Сүйлөшүп жаткан кишиге жараша атын атагандан кийин мырза,эжей,агай….. деп кошуп айтуу туура болот.
Сен деген сенек сөз, сиз деген сылык сөз,өзүңөн чоңдорго ар дайым сиз деп кайрылуу туура болот.
Сүйлөшүп жатканда үн тонуна көңүл буруп, катууайтып алуудан сактануу керек.
Чакырылган кишиге келиңиз деп кайрылып орундук көрсөтүүкерек.
Бирөө жөнүндө сүйлөп жатканда өтө мактап же өтө жамандагандан этият болуу керек.
Көп сүйлөгөндүн көп катасы болот.Аз жана саз сүйлөө туура болот.
Өзүң эле сүйлөй бербей башкаларды да уга бил.
Конок күтүү жана коноко баруу адеби: Коомчулук арасында бири-бирине конокко баруу, конок күтүү салты достукту, туугандык карым катнашты бекемдейт. Коомдогу социалдык проблемалардын чечилишине себепкер болот.Албетте коноко баруу, конок күтүү биздин динибизде да, салтыбызда да бар адат. Ошондуктан ата-энебизден баштап, ага-карындаш, урук-туугандардын баарын зыярат кылып, ачуу-таттуу күндөрүндө ар дайым алардын жандарында бололу. Эч мүмкүнчүлүк болбоду дегенде туугандарыбыздын акыбалын сурап, жылуу сөз айтып, жакшылыктарды каалап, алар жөнүндө жакшы ойдо бололу. Мүмкүнчүлүк болгондо үйлөрүнө зыярат кылып, жашоо шарттарын жакындан көрүп, алыбызга жараша жардам берели, кары-картаңдардын кызматын кылалы.
Үйгө конок келгенде көңүл бурула турган эрежелер:
Конок келгенде үй ээси тосуп алып, кайра өзү узатып коюу туура болот.
Үй ээси сакал-мурутун түздөп, чачын тарап, кийим кечесине көңүл бурган абалда коногун тосуп алуу тура болот.
Конок тосо турган бөлмөлөрдүн тазалыгына, абалына көңүл буруу керек.
Үй ээлери келген конокко «кош келиңиздер» деген жылуу сөздөр менен ыраазычылыгын билдирип тосуп алуу туура болот.
Дасторконго конокту жалгыз калтырбоо керек, жанында үй ээлеринен бирөөсү чай куюуп, сөзгө тартып отурганы тура болот.
Коноктун жанында үй ээлери бири-бири менен урушпай, кату сөз сүйлөбөй, сылык болгону жакшы.
Коноктун жанында үй ээлери өз ара шыбырашып сүйлөбөө керек. Каткырып күлбөшү керек.
Чогуу отурганда улам-улам саатка карабоо керек.
Конокту узатып жатып дароо эшикти жаап койбош керек.Конок узак кеткенге чейин эшикте узатып туру керек.
Эгерде конок ошол түнү кала турган болсо, жатканга жай көрсөтүп, ыңгайлуу шарт түзүү керек.
Коноккобарганда көңүл бура турган эрежелер:
Конокко барган үйдүн коңгуроосун үч жолу каккылап күтүү керек. Эшик ачылбаса тынчын албоо керек. Үй ээси уруксат бергенде гана үйгө кирүү керек.
Үйгө киргенде саламдашуукерек.
Чакырылган жерге кеч калбоо керек.Айтылган убакта так баруукерек.Эрте да барбоо керек.
Конокко таза жана жарашыктуу кийинип баруу керек.
Конокко мүмкүн болсо белек алабаруу керек.
Конок улам эки жагына карана бербөөсү керек. Көрсөтүлгөн жайга отуруп, үй ээсинин тынчын албоо керек.
Сыртка чыкканга жана кол жууганга уруксат суроо керек.
Конокко сунулган сый тамакта кемчилик издебөө керек.Болсо да унчукпаганы туура болот.
Конок үй ээсинин уруксаты менен үйүнө кайтканы туура болот.
Үй ээсинин иши болсо,көп отура бербей эртерээк уруксат суроо керек.
Конокко алдын ала айтып барган туура болот. Башка иштер чыгып калса, алдын ала үй ээсине билдирип коюу керек.
В: Аңгеме
Бир акылман ар дайым шакирттерине туура жол көргөзүп, накыл сөздөрүн айтып турат. Бир күнү да адаттагыдай шакирттерин чогултуп алып: «Силер ачууңар келгенде адамга кандай сөз айтасыңар?» - деп сурайт. Ар ким ар кандай жооп айтат: бири тилдейбиз дейт, экинчиси жазалайбыз дейт, дагы бири туура эмес экендигин сөз менен айтып жеткизебиз дейт. Ошондо акылман адам аларга кайрылып: «Бирөөгө жаман сөз айтып жатып бир нерсени эсиңерден чыгарбагыла: акмак адам гана башканы акмак деп тилдейт. Себеби, акылы кыска адам өзүнө тааныш мүнөздү башкага ыйгарат, өзүнө тааныш сөздөр менен гана тилдейт. Жөндөмсүз адам гана башканын жасаганына акылы жетпей, аны жамандайт. Коркоктор гана өзүнүн коркоктугун билдирбеш үчүн колунан келген учурда башкаларга чоң сүйлөп калат. Көп нерсени билбеген адам өзүн көрсөтүүүчүн көптү көргөндөй сүйлөп, өз кемчилигин билдирбегенге аракет кылат да, башкаларга өйдөсүнүп сүйлөйт. Башкача айтканда, алар айткан сөздөрү менен өздөрүнүн ким экендигин билдирип коет. Ошондуктан, адамга ар дайым бийик болгуула жана жаман сөз айтпагыла» - деп насыйкат кебин айтат.
Г. Накыл сөздөр.
Адамдар менен жакшы мамиледе бол.
Конок өз ырыскысы менен келет.
Үйүңө канча бут кирсе ошончо кут кирет.
Адамга баарынан кыйыны – күн сайын адам болуу... (Ч. Айтматов)
Бөлмөнү кооз гүлдөр көрктөндүргөндөй эле, жылуу сөздөр жана таамай айтылган ой пикирлер да адамдын жан дүйнөсүн көрктөндүрөт. (С. Жигитов)
Д: Ыр саптары
Абийирди таза жыйган бар,
Ал үчүн жанын кыйган бар.
Кадырлайт адам бир-бирин,
Кантсе да ичте ыйман бар. (Н. Алымбеков)
Өмүр адамга энчиленген марттык
Адамгерчилик андан да артык. (Конфуций)
8. Кесип тандоо: Келечекте ким болгум келет.
А: Окуучуларга суроолор.
Өзүңөрдү келечекте кандай сапаттарга ээ болгонуңарды элестетесиңер?
Бир адам үчүн ээ болгон кесиби маанилүүбү же сапаттарыбы?
Келечекте кандай мүнөздөгү адам болгуңар келет?
Б: Теманын жүрүшү.
Жакшы болуш аста-аста, жаман болуш бир паста дегендей, адам өзүнүн жашоо нугун туура жолго буруп, инсандык сапаттарды толугу менен багынтуу максатында акырындап кадам ташташы керек. Жашоо ар-түрдүү сынак жана сюрприздер менен толо. Каерде, качан, кандай сынакка туш болоор экенибизди күн мурунтан билиш кыйын. Ошондуктан, күндө туш болгон окуялар биздин тажрыйба деген канатыбызды күчтөндүрүшү керек. Албетте бул биздин ар-дайым туура кадам таштаганга аракет кылышыбыз менен байланыштуу. Жашаган ар-бир күнүбүздү кечинде жатканда анализ кылып, ошол күнкү иш-аракеттерибизге туура баа бере билишибиз керек. Эгерде бир жакшылык кылган болсок, ага сүйүнүп, ката иш кылган болсок, аны мойнубузга алып, эртеси күнү оңдогонго аракет кылышыбыз керек. Адам деген кээдэ ката да кетириши мүмкүн. Бирок ички дүйнөсүндө, көкүрөгүндө “мен туура эмес иш кылбашым керек, байкабастан туура эмес ишти жасасам да аны мойнума алып, оңдоону билишим керек” деген сезими болуш керек. Коомубуздагы ар-бир адам көкүрөгүндө ушул сезимди алып жүрсө анда, эки адам урушмак эмес, эки коом урушмак эмес, уурулук, адам өлтүрүү, бирөөнүн акысына кол салуу болмок эмес.
Залкар жазуучу Чыңгыз Айтматовтун белгилүү сөздөрү ушул багытта жарык төгөт. Ал мындай дейт: “Адамга эң кыйыны күндө адам болуу”. Бул, күнүнө чөйрөсүндөгү адамдар менен мамиле кылганда адамдык сапатыбызды, касиетибизди сактап калуу керек, дегени.
Атасы баласынын тарбиясы начар болуп калгандыктан, чөйрөсүндөгү адамдарга мамилеси жаман болгондуктан: “Сен адам болбойсуң” деп койчу экен. Баласы бул сөздү уккан сайын ызырланып, “көрөсүңөр” деп койчу экен. Ал бала атасына өчөшүп, окуп, амбицияга берилип, чөйрөсүндөгүлөрдүн көңүлүнө карабастан бийликтин ар-бир тепкичин басып өтөт экен. Акырында өзүнүн районуна аким болуп дайындалып келет экен. Келип креслосуна чалкалап, мына эми ким адам болгонун көрсөтөөр убакыт келди деп атасын кабинетине чакыртат экен. Атасы кабинетине кирип келгенде, “мына, ата, адам болбойт деген балаң баарынан өтүп, сүрүлүп чыгып, райондун эң алдыңкысы болду. Баарыңардын башыңарга жетекчи, аким болуп келдим. Айтыңызчы, адам болбой анан ким болдум” десе, атасы үшкүрүнүп, мындай деген экен: “Балам, мен сени аким боло албайсың деген эмесмин. Сени адам болбойсуң дегенмин. Адам болгонуңда, илим-билим алып жүргөнүңдө адамдык касиеттерди да кошо үйрөнүп, ошол сапаттарга ээ болгонуңда, өз атаңды кабинетиңе алдырбастан, өзүң келип ата-энеңдин батасын алайын дебейт белең.”
Демек, биз кайсы кесипти тандабайлы, келечекте ким гана болбойлу, адамдык сапаттарга ээ болуп жана аларды сактап калгандын чарасын көрүш керек. Келечекте ким болосуң деген суроо суралса ар-бир жарандын жообу “Адам...” дегенди алдыга коюш керек.
В: Аңгеме.
Баары сенин колуңда.
Качандыр бир заманда бир шаарда акылман адам өзүнүн шакирттери менен бирге жашаган экен. Ал өтө кыраакы жана бардык нерсеге маани берген адам болгондуктан, айткандарынын баары туура чыга турган. Бир күнү шакирттеринин арасынан зиректиги менен айырмаланган бирөөсү устатынын жаңылган күнү болор бекен деген ойго келет. Анан ал оюн текшерип көргүсү келет да, устатын жаңылтуу максатында, кооз көпөлөктөрдүн бирин кармап алып, анын жанына келет. Эки колунун алакандарынын ортосуна салган көпөлөктү аяр кармап туруп устатына суроо узатат: “Айтыңызчы устатым менин колумда кандай көпөлөк бар өлүкпү же тирүүбү? “. Устаты шашпай өз ишин уланта берет. Тирүү десе, ошол замат устатынын сөзүн жокко чыгарып, өзүнүн оюн далилдеш үчүн колдору менен көпөлөктү басып өлтүргөнгө даяр болгон шакирти дагы бир жолу суроосун кайталайт. Ошондоустатышакиртинин колун карабастан көзүнө тике карап туруп: «Баары сенин колуңда, балам. Кандай кааласаң ошондой болот», - дейт.
… Жашоодо биз көп нерсени башка бир себептерден улам болгонуна ишенебиз. Ошол эле учурда жашообуздун ар бир мүнөтүндө, ар бир кадамында өзүбүздүн кабыл алган чечимибизден көп нерсе көз каранды экендигин биле бербейбиз…
Г.Накыл сөздөр.
Келечекти жакшы пландагыла. Себеби жашооңордун калган бөлүгүн келечекте өткөрөсүңөр.
Жаштардын тарбиясына көңүл бургула себеби алардын тарбиясы өлкөнүн өнүгүүсүн же биротоло жок болуп кетүүсүн чечүүчү ролдо.
Өткөндү алмаштыра албайсын,бирок келечек сенин алаканыңда.
Өткөн күнгө байланыштуу нерселер кечээки күн менен барабар кетти. Кылышыбыз керек болгон жаны нерселерге план түзүүбүз керек.
9. Убакытты туура пайдалануу: Эң маанилүү иштерибиз.
А: Окуучуларга суроолор.
Күнүмдүк иштериңерге убакыт жетиштүү болуп жатабы?
Убакытты эффективдүү колдонуп жатам деген ойдосуңарбы?
Учурда силер үчүн эң маанилүү иш эмне?
Б: Теманы түшүндүрүү.
Мугалим, берген тапшырмаларды аткарбай келүүнү адатка айландырган окуучуларына : «эмне үчүн аткарбай келдиңер деп сураса», күндө эле окуучулары: «мен конокко бардым эле жетишпей калдым», - десе, экинчиси: «мен досторум менен жолугуп концертке бардым эле, үйгө кеч келдим», - десе, үчүнчүсү: «мен, ачыкчасы, кино көрүп, аткарбай калдым», - деп ар түрдүү себептерин айтышчу. Минтип жүрө берсе эртең эле жылдын аягы келип, окуучулары тапшыра турган экзамендерине жетишерлик даярданбай кала турганын сезген мугалим насаатын башкача жол менен айтууну чечет. Бир күнү, мугалим класска келип, окуучулардын алдына бир бош банканы коет да, сабактын темасы «Убакыт» экенин айтат. Андан кийин муштумдай таштарды алып, банканы толтурат да, отурган студенттерден сурайт:
Карагылачы, банка толдубу?
Толду, дешет баары бир ооздон.
Мугалим унчукпастан майдараак таштарды салган пакетти алып чыгат да, аны банкага сала баштайт. Майда таштар чоң таштардын арасындагы бош жерлерди толтуруп калат. «Банка толдубу же жокпу?» - деп дагы бир жолу сураганда, окуучулар: «Эми толду», - деп жооп беришет. Мугалим шашпай кум салынган пакетти алып чыгат да, банкага төгө баштайт. Майда кум бош жердин баарын толтуруп калат.
Эми кандай деп ойлойсуңар, банка толдубу?
Эми толду, бош орун калбады, - дешет окуучулар.
Мына ошондо мугалим суу куюлган идиш алып чыгат да, андагы сууну банкага куя баштайт. Банка толгондон кийин мугалим окуучуларга карап, бул эксперименттин мааниси эмне экенин сурайт. Окуучулардын баары ийиндерин кууштуруп, бир нерсеге байланыштыра албайт. Ошондо мугалим мындай дейт:
Мен эми түшүндүрөйүн, бош банка – бул силердин жашооңор. Чоңураак таштар – жашооңордогу негизги нерселер: үй-бүлө, ден-соолук, сабак, билим... Булар, башкасы жок болсо да, жашооңорду толтурган нерселер болуп эсептелинет. Майда таштар болсо силерге азыраак маанилүү болгон нерселер, мисалы: магазиндер, концерт, коноко баруу сыяктуу нерселер... ал эми кум менен суу – жашоодогу майда-чүйдө нерселер. Эгерде банканы башынан кумга толтурганыбызда, таштар батпай калмак. Ошондуктан жашоодо бардык нерсени өз убагында жасоо керек жана өзүбүздүн күнүмдүк тиричилигибизге биринчи өтө маанилүү деп эсептеген нерселерди жайгаштырып алышыбыз керек. Алардан артка калган убакытта башка нерселерди да аткарганга жетишебиз. Майда-чүйдө нерсенин артынан жүрө берген адам жашоодогу негизги «таштарды» ордуна жайгаштыра албайт. Силер үчүн бул жашоодо эмнелер өтө маанилүү, ошолорду аныктап, биринчи кезекте ошолорго орун бергиле.
Убакыт эч качан токтобойт. Өткөн убакыт тарых болду, эртеңки күндү көрөрүбүз анык эмес. Демек, учурду баалап, эң пайдалуу өткөзгөндү билели. Азыр колдон келген ишти эртеңкиге таштабайлы. Өмүр кыска, ал эми ар бирибиздин ойлогон ой-максаттарыбыз тоодой, пландаган иштерибиз, кыялдарыбыз бир топ. Ар бирин аткаруучу өз убакытттары бар. Окуучулук күндөр өтүп кетсе, эртең каап мен жакшыраак окуп, жакшыраак кесиптин ээси болмокмун десең, ал арман эле болуп калат. Себеби, ошол окуучулук күндөргө кайтып келе албайсың.
Банкта бир эсебиңер болгонун элестеткиле. Ал эсепке бирөө күнүнө эртең менен 86400 сом салып турат. Ал акчаны силер каалагандай коротсоңор болот, ал силердин эркиңер. Акча силердики. Бирок ошол 86400 сом ошол эле күн үчүн. Эгерде баарын иштетпеген болсоңор, калган акча ошол күнү кечинде күйүп кетет. Эсептен алынбаган акча кийинки күнгө которулбайт. Эсеп күндө кечинде ноль болуп, кайра эле эртеси күнү жаңыдан 86400 сом эсепке жүктөлөт. Эмне кылмаксыңар?! Баарыбыз ошол жүктөлгөн акчаны акыркы тыйынына чейин алып коротмокпуз, чынбы?! Баарын эсептен алып машина алмакпыз, үйгө, офиске түрдүү эмеректерди алмакпыз. Кыскасы бир да тыйыны эсепте калып кетип, күймөк эмес. Ооба, бул шексиз.
Чынын айтканда мындай эсеп баарыбызда бар. Баарыбыз “Убакыт” аттуу банктын кардарларыбыз. Баарыбыздын эсебибизге күндө эртең менен 86400 секунд жүктөлөт жана кайра эле кечинде нольго түшүп калат.Бул биздин эң чоң байлыгыбыз. Өзгөчө жаштардын табылгыс, кайра кайтарылгыс байлыгы. Жаштык кез - күчкө толуп, илим-билимге суусап турган кез. Эмне кылып калсак жаштык кезибизде кылып калабыз. Ошондуктан келгиле бир да секундубузду бош кетирбестен убактыбызды толук кандуу жана пайдалуу иштерге сарптайлы. Жылдар өтүп аркага кылчайганда убактыбызды ысрап кылбастан өзүбүз жана чөйрөбүз үчүн пайдалуу өмүр өткөргөнүбүздү көргөндөй бололу. Убакыттын кадырын убакыт өтүп кеткенден кийин сезгендин пайдасы жок. Убакыттын кадырын мурунтан баамдап, аны пайдалуу өткөргөндү билели.
Бир жылдын кадырын билгиң келсе талаадагы эгинин жоготкон дыйкандан сура. Бир айдын кадырын болсо сегиз айлык бала төрөгөн энеден сура, бир жуманын кадырын жумалык газета чыгарган журналисттен сура, бир сааттын кадырын экзаменден чыккан студенттен сура, бир минутанын кадырын поездке жетишпей калган адамдан сыра, бир секунданын кадырын аварияга учураган кишиден сура, секундадан да кыска убакыттын кадырын билгиң келсе спорттук олимпиадада экинчи болгон спортчудан сура.
В: Накыл сөздөр.
Майдага кызыккан адамдын колунан чоң иш келбейт. (Ларошфуко)
Пайдасыз жашоо – мезгилсиз өлүмгө тете. (В. Гете)
203
145 016 
