Емуз Сулът1ан Хэкум хуитха псалъэхэр

Еджак1уэхэм икъук1э яф1эф1щ щалъхуа щ1ыналъэм хуэусэну,абы тетхыхьыну.Апхуэдэ щ1алэщ Емуз Сулът1ан.Фи пащхьэ изолъхьэ абы и сочиненэр.

«Еф1ак1уэ,си хэку дыщэу Къэбэрдей!»

Лэжьыгъэр зыгъэзэщ1ар Налшык къалэ дэт езанэ гимназием и епщ1анэ классым щеджэ Емуз Сулът1анщ.

Егъэджак1уэр-Махуэл1 Беслъэнщ.

Къыщык1ухь мы щ1ып1эхэм,си щ1алэ,

Зы лъэбакъуэ пчыхук1э-хъыбарыжьщ.

Уи жьэгу пащхьэр хуиту къэзыгъаблэ

Хъыбарыжьыр тхыдэм и 1эужьщ.

(«Адэжь лъахэ».Уэрэзей Афлик)

Мы дунеишхуэм тет дэтхэнэ зыми къежьап1э и1эщ.Къэхъу-къэщ1ыр мэуафэ,мэщ1ыфэ,мэплъыфэ,мэфащэ,мэуфэрафэ,къофэ.Сэри гъащ1эр къэзыгъащ1эу плъыфэ куэдыр зи псэм хэпщ1ахэм сащыщщ.Абы щхьэусыгъуэ хуэхъуауэ къэслъытэри си адэжь щ1ыналъэу Къэбэрдейрщ!Апхуэдэу сыт къыщ1эплъытэр жа1эу упщ1эр къызатмэ,жэуапыр мыращ:си Къэбэрдейм и бгылъэхэр мэз щхъуант1эмрэ хъуп1эмрэ яуфэбгъуащ,къуршхэм псы уэрхэр къожэх,тафэхэри гъавэ бэвым къекъутэ,дэнэк1и 1эщ пшэрхэм,шы гуартэхэм яуфэбгъуауэ щытщ си щ1ыналъэр.Лэгъупыкъум уэгур ире1э,жыжьэу бгъащхъуэр щохуарзэ,адыгэ хабзэр бзыпхъэ дахащэу яхэлъщ ц1ыхубэм…Куэд,куэдыщэ пхужы1энущ адэжь щ1ыналъэм папщ1э.Дэтхэнэ зы псалъэми дыгъэпсым гуэгъу зыкъыхуищ1ынущ,абыхэм уащыщ1эджык1к1э,гум хуабэгъэ къыхыхьэнущ. Къэбэрдейр йофак1уэ ик1и зе1эт.Щыпсэу ц1ыхугъэр гъащ1эм добакъуэ,ауэ бэк1ам пщ1э ини хуещ1ыф.Зи блэк1ам и тхыдэм щымыгъуазэ лъэпкъыр гугъу ехьынущ.Арагъэнущ си адэжь щ1ыналъэм щыпсэу ц1ыхухэм я мастэнэр ц1ык1уми,1уданэм к1ыхьу иридэфу щ1ыщытри.Къэбэрдейм и хэщ1ап1эр зымыщ1э,абы и ц1ыху налкъутхэу дунейм хэпхъахэм щымыгъуазэ куэди гъуэтыгъуейщ.Къи1уапхъэщ ц1ыху телъыджэхэу Къэзанокъуэ Жэбагъы,Пащ1э Бэчмырзэ,Щоджэнц1ык1у Алий,Темыркъан Юрэ,Къардэн Мурат,1ут1ыж Борис,Къэзанш Сэтэней сымэ я ц1эхэр.Сахуэарэзыщ си лъэпкъ мащ1эм ц1ыху къахэк1ахэу вагъуэу уафэгум щылыд дэтхэнэми.Ди бзэу адыгэбзэр 1улъэбзэу ц1ыху куэдым т1урылъщ.Къэбэрдейм сыт къыщыхъуми адыгэбзэр мэ1у,мэ1улъэ,мэ1уатэ.1улъэ къэс езым и 1унк1ыбзи и хабзи и1эжщ,игъэзащ1э 1уэхугъуэхэри щхьэжу,щхьэхуэу къызэрок1.Зыр мэпс,мапсэ,мэпсалъэ.Адрейр мэин,мэятэ,мэбагъуэ.Багъуэурэ лъэпкъыр дахагъэм поджэ.Дахагъэ зэрылъ дэтхэнэ зы унагъуэри ф1ым зыхуегъэш.Арагъэнущ Къэбэрдейм щыпсэу ц1ыхухэм я гур щ1эщабэр,я псэр щ1эиныр,я зэхэщ1ык1ыр щ1эбзыгъэр.1ыхьэ-1ыхьэу,1энат1э-1энат1эу щы1эм 1ыхьэ лей зы1эригъэхьэну,зы1эщ1игъэхьэну хуейр ц1ыху закъуэращ;щ1эныгъэк1э,1эщ1агъэк1э,1эпщ1элъэпщ1агъэк1э.1эужь зи1эри ц1ыхурщ.Къэбэрдей ц1ыхухэми 1эужь ин я1эщ.Гъащ1эм и зэхэтык1э-зэхэлъык1эр зыр зым елъытак1эрэщ зэрек1уэк1ыр. Ц1ыхум сыт игу къэк1ми,къэк1ыжми и гъэпсык1эм,гъэсэк1эм,псэук1эм,щ1ык1эм,щытык1эм,гупсысэк1эм,псалъэк1эм,лъэк1ыныгъэм елъытащ.Си хэкум щыпсэу ц1ыхухэм лъэк1ыныгъэ ин я1эщ.Ахэр сыт щыгъуи гугъуехьми пэщ1оувэ,гуф1эгъуэри къыбда1ыгъ.Къапщтэмэ,щы1ари,щы1энури,щы1эри псори зыщ.Псори нобэрей зэманым зэхэшэпсыхьащ.Зэхэшэпсыхьар зэщ1оушэри,пшыналъэу мэшэрашэ,мэбзэрабзэ,гъащ1эм и ф1ыгъуэр къреш.Сыхуейщ си адэжь и лъахэу Къэбэрдейм сыт щыгъуи къришыну пшыналъэр гуф1эм хуэк1уэну,пшынэ дыкъуакъуэм и макъыр зэик1 щымыувы1эну.Гъащ1э къыщызгъащ1эк1э,сыхуейщ ар хуэзунэт1ыну си Къэбэрдейм: Сэ иджыри къыспэщылъщ: Адыгэлъыр щ1эзмыгъэк1ыу щ1ылъэм, Щ1ыгум сытетыну адыгэл1у Адэжь лъахэм къысхуищ1а пщэрылъщ.