/Фирүзә Абдуллина/.

Һике Беҙ үҫкәндә өй түрендә Ҙур һике тора ине, Ярты ғүмер бына ошо Һикелә уҙа ине. Ашай инек, йоҡлай инек, Шунда йөн тетә инек, Йоҡлар алдынан атайҙан Әкиәт көтә инек… Ҡунаҡ килһә, шул һикенең Аҫтына ҡаса инек, Төрлө ҡыҙыҡтар һөйләшеп Күңелде аса инек. Ҡунаҡ өҫтәленә әсәй Яҡын килтермәй ине, Апайҙарым ғына аш-һыу, Өҫтәл хәстәрләй ине… .Хәҙер түрҙә – телевизор. Балаларҙы күргән юҡ, Кемдә – планшет, кемдә – айфон, Ни ҡылана – белгән юҡ. Әкиәттәр һөйләмәйбеҙ, Хәлдәрен һорамайбыҙ, Күргән төштәрен һөйләтеп, Яҡшыға юрамайбыҙ. Ҡунаҡ килһә, бала түрҙә, Иң тәмлеһе – балаға, Тәртип тә юҡ, әҙәп тә юҡ, Хөрмәт тә юҡ олоға. Батша яһаныҡ баланы, Башыбыҙға ултырттыҡ, Хеҙмәтсе хәлендә ҡалдыҡ, Үҙебеҙҙе оноттоҡ. Атай-әсәй хәҙер – спонсор. Ни кәрәк – таптыралар. Ата-әсәләр бурысын Аҡсала атҡаралар. Ҡартлыҡ килгәс, ярай ҙа һуң Ҡәҙер-хөрмәт күрһәләр, Балалар, түргә ултыртып, Йүгереп йөрөһәләр… …Эй матур бөгөн донъялар! Ни теләйһең – бары бар. …Һикелә үткән бала саҡ Һағындыра барыбер. /Фирүзә Абдуллина/