Адамгершілік -асыл қасиет

Мақсаты: Жалпыадамзаттық құндылықтардың маңыздылығы мен мәнін, қазіргі таңдағы адамгершілік қасиеттің қажеттілігін түсіну

Міндеттері:

1.Адам бойындағы адамгершілік қасиеттердің маңыздылығы мен қажеттілігін түсіндіру;

2. Адамгершілік - өткінші міндет емес, өмірлік міндет екендігіне тоқталу

3.Адам бойындағы асыл қасиеттерді насихаттау арқылы, болашақ ұрпақтарымызды адамгершілікке тәрбиелеу

Ресурстары:

музыка, сахна

Оқудан тыс іс-әрекеттердің жобасын өткізудің даярлық жоспары

1. « Қара пима» әнінің мазмұнымен танысу, мектеп режисерімен көрініс барысын талдау және ролдерде ойнайтын оқушыларды іріктеп алу.

2.Адамгершілікке байланысты өлеңдер

3.Құрметті қонақтарға арналған мерекелік концерт.

Оқушылар құрметті ардагер ұстаздарға өз өнерлерін көрсетті, аздаған сыйлықтарын табыс етті.

4.Ғ.Қайырбеков атындағы №2мектеп -гимназиясында көпжыл қызмет еткен ардагер ұстаздарға сөз кезегін беру.

Ардагерлерге сөз беріліп, олар оқушыларға өз тілектерін айтып,ризашылықтарын айтты.

Талдау

Мектебімізде театр болғандықтан іс –шара барысында театрдан көрініс жасалды. «Қара пима» әнінің желісімен жасалынған қойылым қойылды.

Іс-шараны өткізудің жоспары

(Кештің сценарийі)

Мұғалім сөзі:
Өзін ғана ойлаған -
Жамандықтың белгісі.
Өзгені де ойлаған –
Адамдықтың белгісі,- деп отырып, сіздерге бүгінгі мектебіміздегі « Адамгершілік – асыл қасиет» атты іс-шараға қош келдіңіздер. Бүгінгі іс-шарамыздың мақсаты: Адам бойындағы асыл қасиеттерді насихаттау арқылы, болашақ ұрпақтарымызды адамгершілікке тәрбиелеу болып табылады. Жаратылыстың барлығы екі қарама - қарсы нәрседен тұрады. Ақ - қара, күн - түн, ыстық - суық, жақсы - жаман. Адам бойындағы барлық жақсы қасиеттер рухтан туындайды, ал жаман қасиеттер нәпсінің көрінісі болып табылады. Адам денесі бір болғандықтан оның ішінде билік үшін үнемі осы екі қуаттың – «рух пен нәпсі» күресі жүріп жатады.Қазіргі замандағы адамгершілік қасиеттердің азайып бара жатқаны бәріміздің де жанымызға қатты батады.Сондықтан да бүгінгі іс –шараның маңыздылығы жоғары болуы керек.Кезекті №14 мектеп-гимназиясының оқушыларына беремін. Мади: Сәлеметсіздер ме мектебіміздің қонақтары мен ұстаздар!!! «Адамгершілік –асыл қасиет» атты кешімізді бастауға рұқсат етіңіздер! Диана: Дүниенің ең асылы, бағалысы – Адам болып саналады десек, сол асылдың бойындағы ең басты, шешуші қасиеттері неден тұрады ? Мади: Адам баласына адамдықтың белгісі адамгершіліктен қалыптасады. Диана: Ал, адамгершілік дегеніміз не? Мади: Әрине, адам бойындағы асыл қасиеттерді айтамыз. Демек, асыл қасиетіміз – еңбек сүйгіштік, достық, әдептілік, көмек беру, қоғамға қызмет ету, инабаттылық, имандылық, елін, жерін сүю, кішіпейілділік. Яғни, адам бойында осы қасиеттер жоғары тұрса, ол адамның адамгершілігі жоғары болмақ.

Диана: Сондықтан, біз осы қасиеттерді кішкентай кезімізден бойымызға сіңіруіміз қажет. Ал, керісінше, сөзі дөрекі, мінезі шайпау, менмен мақтаншақ, керенау кесір мінезден аулақ болуымыз керек. Осы жерде ұлы Абайдың сөзімен нақтылап өтсек. «Ғылым таппай мақтанба» - оқитын 8 сынып оқушысы Закария Бақыт

Мади: Қай заманда болсын өмірден түйгендері мол адамдар ұрпақтарына үлкенді сыйлау, оларға ілтипат көрсету, қамқорлық жасау жөнінде өсиет қалдырып отырған. Диана: Осынау тасыған заманымызда адам бойынан табылуға тиісті адамгершілік асыл қасиеттердің азаюы көңілге кірбің салады.Ата-бабаларымыз оқып-тоқымаса да олардың жан дүниесі рухани бай болды. Мади: Абай атамыздың адам баласына тек адамгершілік қасиеттерді насихаттап кеткені бізге сабақ. Бірақ өкінішке орай өмірде түрлі жағдайлар орын алуда. Диана: Халық арасындағы «Қара пима» атты ән әрбір тыңдаған жанға ой салары белгілі. Сол әннің арқауымен жасалған көрініске кезек берейік.

«Қара пима» - «Ақ пима» көрінісі Мади: «Жаман - бұзар, жақсы – түзер»,- дегендей қоғамдағы маскүнімдіктің көбеюі адамгершілік жолдан тайдырады. Бүгінгі көріністің соңы сіздерге де ой салар. Диана: Тәрбиенің, адамгершіліктің бастауы – отбасынан басталады. Отбасын жоғары санаған халық едік. 10 сынып оқушысы Нұржанова Дильназдың орындауында «Шіркін –ай » әні

Мади: Адамның адамгершілігі-оның жоғары қасиеті.Оның негізгі белгілерінің бірі-өзі үшін ғана емес,ел,қоғам үшін өмір сүру,адамдық ар-намысты ардақтау,әр уақытта жақсылық жасауға дайын болу. Диана: «Өзін-өзі тану- өзінің ең жақсы қасиеттерін анықтауға, өз ар-ұжданын сақтап, әрқашанда АДАМ деген атқа лайық болуына ықпал етеді»,- деп Сара Алпысқызы атап айтқан. «Үш бақытым» - оқитын 9 сынып оқушысы Ибрагимов Алмас

Мади:
«Жақсы сөз –жарым ырыс» дегендей жақсы сөйлейді өзімізден бастайық. Қазір сіздерге мақалдың алғашқы бөлігін айтайын,сіздер жалғастырсаңыздар. 1. Жаман - бұзар, жақсы – түзер.
2. Адам болатын бала алысқа қарайды.
3. Сыйласаң, сыйымды боларсың.
4. Жаманға жан жуымас, жалқауға мал жуымас.
5. Әдепсіз өскен адамнан, тәртіпті өскен тал артық.
6. Су ішкен құдығыңа түкірме.
7. Тәрбиелі кісі қант қосқан жармадай, тәрбиесіз кісі шаң боратқан арбадай.
8. Тәрбиесіз наданнан, үйретілген хайуан артық.
9. Ыстықтан ет күйеді, ұяттан бет күйеді.
10. Жолдың қамысы болмайды, жаманның намысы болмайды.
11. Ақыл - дос, ашу - дұшпан, ақылыңа ақыл қос.
12. «Сіз» - сыпайылық, «сен» деген анайылық.

Диана:

Ұлтымыздың қанындағы ізеттілік – дөрекілікке, қайырымдылық - қатыгездікке, жомарттық - тоғышарлыққа, адалдық - арамдыққа, парасаттылық - парықсыздыққа ауыспасын деген үлкен үміт тұр.

Бірге:

Қайырымды болайық – АДАМ болайық,

Мейірімді болайық - АДАМ болайық,

Адал болайық- АДАМ болайық, «Адам» деген атқа сай болайық.

Қорытынды:

Қорыта келе, адамгершілік қасиеттің алтын қайнары үлкенге сый – құрмет, кішіге ізеттің не екенін білдік. Адамның әр күнгі іс – қимылы таңертеңгі сәлемнен, жақсы лебіз, қошеметтен басталса, ол нағыз адамгершілік. Адамгершілік - өткінші міндет емес, өмірлік міндет. Ендеше, одан жаңылуға да жалығуда болмайды.

Кешті тамашалаған көрермендер мен қойылым қойған оқушылардан интервью алынды