Айырыджы табили мурекеп джумлелер

Айырыджы табили муреккеп джумлелер

Айырыджы табили муреккеп джумлелернинъ таби джумлеси умумий мананы бильдире, баш джумле исе муайен мана анълатыр. Таби джумле баш джумледен чыкъкъан насыл? кимнинъ? ненинъ? суаллерине джевап берир.

Айырыджы табили муреккеп джумлелер, тизим ве мана хусусиетлерине коре, эки чешитте олалар: 1. Баш джумле таби джумледен сонъ келир. Таби джумледеки хабер -са, -се ялгъамасынен кельген шарт фиилинен ифаделенир. Таби джумленен баш джумленинъ теркибинде нисбетлешкен сёзлер ишлетилир. Чифтлеп, бу сёзлерни бойле косьтермек мумкюн: кимнинъ …, онынъ; насыл …, ойле; ким…, онынъ ве дигерлери. М е с е л я : Омюр девамында насыл бала тербиелесенъ, (насыл инсан ве огъулгъа наиль олурсынъ?) Ойле де инсан ве огъулгъа наиль олурсынъ. (Э.Ф.)

2. Айырыджы табили муреккеп джумлелернинъ экинджи чешитинде баш ве таби джумле ки багълайыджысы вастасынен багъланып келирлер. Баш джумле таби джумледен эвель келип , онынъ теркибинде ойле бир, о къадар киби замирлер ишлетилир. Меселя: Бу китапта ойле муджизелер тасвирленген ки, ( насыл муджизелер тасвирленген?) эр кесни айретте къалдыралар.