Аха дүүнэртээ дурсагдан

Аха дүүнэртээ дурсагдан…

Захааминай аймагай Бүргэ нютагhаа уг гарбалтай Баир Будаевич, Роза Цыденовна Гомбоевтон ажабайдалай табисуураар олон жэлдэ Мэлэ нютагта ажаhууhан байна. Буряадай багшанарай дээдэ hургуули дүүргэhэн залуу хүбүүн Мэлын hургуули буряад хэлэнэй багшаар хүдэлхэеэ эльгээгдэhэн юм. Хажуудань залуу нүхэрынь ошолсоо бэлэй. Гэр бүлэ болоhон айлнай түрүүн басагатай, hүүлдэнь хүбүүтэй болоо. hургуулияа дүүргэhэн Сэсэг Баировна басаганиинь, Жаргал Баирович хүбүүниинь саашаа эрдэмээ дээшэлүүлжэ, гэр бүлɵɵ зохеожо, ажабайдалайнгаа үргэн замые эхилээ.

Баир Будаевич Роза Цыденовна хоёр Бүргэ hайхан нютагта түрэhэн юм. Бүхы наhаяа багшын ажалда зорюулhан Баир Будаевич РСФСР-эй арадай гэгээрэлэй отличник, Буряад Уласай габьяата ба арадай багша гэhэн хүндэтэ нэрэ зэргэдэ хүртэhэн намтартай. Багшанарта хэрэгтэй олон наадануудай, методическа суглуулбаринуудай, 5-дахи ангида hурагшадай үзэхэ номой автор юм. Роза Цыденовна наймаанай ажалда, үмсын олзын хэрэгтэ, үри хүүгэдээ, аша зээнэрээ үндылгэхэ нангин уялгада бэеэ үгɵɵ.

Сэсэгма басаганиинь Улаан- Yдын багшанарай училищи, hүүлдэнь Д. Банзаровай нэрэмжэтэ багшанарай дээдэ hургуули дүүргээд, багшын мэргэжэлтэй. Мүнɵɵ түб хотодоо 14-дэхи спортивна hургуулиин хүтэлбэрилэгшээр ажаллана.

Жаргал хүбүүниинь юрист мэргэжэлтэй hэн. Түрүүн Улаан-Yдын техникум (Бурятский техникум статистики, экономики и информационных технологий), hүүлдэнь Москва хотын университет дүүргээ.

1993 ондо сэрэгэй албанда татагдажа, эрэ хүнэй уялга дүүргэнэй удаа, саашанхи замаа сэрэгэй ажалда зорюулаа. СВО-гой эхилхитэй хамта, Жаргал Эхэ оронойнгоо урда албаяа дүүргэхэеэ ошоо. «Тайга» гэжэ нюуса нэрэтэй байгаа. 37-дохи эрид шанга добтолгын (штурмовой) отрядай командир. Ехэ бэрхэ, эрид хатуу зантай, эрэлхэг зоригтой, нүхэдтɵɵ hанаагаа зободог хүн hэн.

2023 оной февраль hара соо Угледар шадар шанга байлдаанай үедэ штурмовой отрядайнгаа саашаа дабшаха зам халхалан хамгаалжа байгаад, минометно буудалгада орожо, Жаргал хүндэ шархаhаа боложо наhа бараа юм.

Сентябриин арбан найманда Ород Уласай президентын зарлигаар гвардии капитан Жаргал Баирович Гомбоевто Россин Федерациин Герой гэжэ хүндэтэ нэрэ зэргэ олгогдоо юм.

Энэ ушарта дашарамдуулhан митинг Жаргал Баировичай аба эжын түрэhэн тоонтодо, Бүргэ нютагта октябриин 21-дэ үнгэрɵɵ. Энэ гунигта, тиихын хажуугаар омогорхол түрүүлмэ хэмжээ ябуулгада Улаан-Yдэ хотоhоо геройн наhанай нүхэр, Наталья Александровна басагадтаяа, эгэшэнь, Сэсэг Баировна хүбүүдтэеэ, аха дүүнэрынь ерээ. Мүн аймаг соогоо ажаhуудаг түрэл гаралнуудынь олоор суглараа. Сэсэг Баировна аба эжы, дүү хүбүүн тухайгаа хɵɵрэжэ үгɵɵ. Хайрата ганса дүүдээ зорюулhан шүлэгɵɵ уншажа, хүнүүдэй зүрхэ сэдьхэл доhолгоо. Наталья Александровна нүхэрэйнь дурасхаалда зорюулагдаhан митингдэ ерэhэн зондо баяраа мэдүүлээ. Иимэ бэрхэ хүбүү хүмүүжүүлhэн түрэhэн ахай, эгэшэеэ hанан hанан, Эрдэни Будаевич Гомбоев, Александр Борисович Будаев халуун үгэнүүдые хэлээ. Баир Будаевич Роза Цыденовна хоерой анда нүхэд Ринчин Цыбанович Соктоев, Цыбжит Янжиевна Цыбикова гэгшэд бага наhанайнгаа нүхэд тухай дулаанаар дурсажа, сугтаа наададагаа, хамта hургуулида hурадагаа, саашанхи ажабайдалдаа нүхэсэжэ ябаhан үе саг тухайгаа хɵɵрэжэ үгɵɵ.

Соёлой ордоной байшан соо сугларhан hургуулиин hурагшадта, залуу үетэндэ хандаhан үгэнүүдшье хэлэгдээ. Эрдэм номоо шудалжа, hайнаар hуража, Жаргал Баирович шэнги бэрхэ, Эхэ орондоо дуратай хүнүүд болохынь хүсɵɵ. Амтатай бэлэгүүдые хүүгэдэй сэсэрлигэй, hургуулиин үхибүүн бүхэндэ геройн аха дүүнэр барюулаа.

Жаргал Баирович Гомбоев, манай нютагай хүбүүн хүн бүхэнэй зүрхэ сэдьхэлдэ хэтэ мүнхэдɵɵ үлэхэ!

Дарима Цынгеева, Бүргын дунда hургуулиин

буряад хэлэнэй ба уран зохеолой багша