"Анэ,уэ пхуэдэ теткъым мы дунейм"

«Анэ,уэ пхуэдэ

теткъым дунейм!»

^{Мурадыр:}

1. Анэхэм теухуауэ адыгэ усак1уэхэм ятха усэхэм
   щыгъуазэ щ1ын.

2. Усэхэм анэм и1э пщ1эр, нэмысыр, гуапагъэр,
   дахагъэр, гу щабагъэр къызэрыщыгъэлъэгъуам,
   езы усак1уэхэм ф1ы лъагъуныгъэк1э анэхэм
   зэрыхуэусэм к1элъыгъэплъын..

3. Удихьэхыу, гум дыхьэу къеджэфу егъэсэн.

1. Анэхэмрэ бынхэмрэ я зэхущытык1эр мы усэхэм
   къызэрыщагъэлъэгъуам тегъэпсэлъыхьурэ
   усэхэр зэпкърегъэхын, я бзэм зегъэужьын, я
   зэхэщ1ык1ым хэгъэхъуэн.

5.Анэхэм хуа1э щытык1эм еплъык1эщ1э,
бгъэдыхьэк1эщ1э егъэгъуэтьн. Пщ1э хуащ1у,
къыхуащ1эр къагуры1уэрэ анэ нэмысыр
яхъумэжыфу сэнымк1э лэжьыгъэ егъэк1уэк1ын.

Фыкъытхуеблагъэ ди хьэщ1э лъап1эхэ!

Ф1эхъус апщийхэ, ди лъэпкъэгъу лъап1эхэу ди псэм и щ1асэхэ!

Лъэпкъым и тыгъэ нэхъыф1хэм щыщу нобэми къэгъуэгурык1уэ адыгэ усыгъэхэр, хъыбарыжьхэр, хъуэхъухэр тыгъэ фхудощ1.

Адыгэм и насыпым ф1ык1э зыкъыдигъэзэну,

Лъэпкъ хабзэхэм утыкур яубыдыжыну,

Анэдэлъхубзэ дахэр мыувы1эу бзэрэбзэну.

Щ1эблъэр ф1ымрэ гуапэмрэ хуэушэу,

Ипэк1э плъэуэ псэуну дыщыгугъыу нобэрей ди зэ1ущ1эр къызэ1удох,

Нэхъыф1ыр къык1элъык1уэну фыдогъэгугъэ!

Егъ. Дэ нобэ фэдгъэлъэгъунущ зы классщ1ыб лэжьыгъэ, ар зытеухуари ди анэ лъап1эхэрщ. Абы и гугъу тщ1ын хуей щ1эхъуам и щхьэусыгъуэри мыращ: Анэмрэ бынымрэ я зэхуакум дэлъын хуей хуабагъэр, пщ1эр, нэмысыр ди зэманым т1эк1у нэхъ къелъэхъшэхауэ зэрыщытырщ. А ныкъусэныгъэрхэр тлъэгъужын, къэмыгъэхъун папщ1эщ псори зыхуэдунэт1ар.

Ди ехъул1эныгъэхэри флъэгъунщ, ди ныкъусэныгъэхэри къыджеф1энщ.

Егъ. Анэ, сыту псалъэшхуэ ар. Анэ псалъэр щыжып1эк1э гущ1эр егъэп1ейтей. Анэ зимы1эм гу1эр и махуэщ, ауэ жи1акъым ар пасэрейм. А псалъэхэм урагъэгупсысыж 1эщабэ-1ущабэу, хуэсакъыу анэхэр хъумэн зэрыхуейр.

Едж. Анэр дунейм и дыгъэщ.

Анэр дунейм и мазэщ.

Анэр дунейм и жылэщ.

Егъ. А псалъэхэм купщ1эшхуэ хэлъщ, арауи жып1э хъунущ ц1ыху гъащ1эр пызыщэр.

Девгъэгупсысыжыт псори, зэгуэр и анэ хэт и жагъуэ ищ1ами хэт игу хигъэщ1ами. Анэхэм я гур махэщ, анэхэм я гур п1ащ1эщ. Ахэм я макъ унэм щ1эмытмэ абы нэхърэ нэхъ 1ей сыт щы1э мы дунейм. Девгъэда1уэт анэм и макъыр къызэрытщыхъум.

Едж. «Анэм и макъыр».

Анэм и макъыр щысхуэбзэрабзэк1э,

Къысф1ощ1 си Хэкур къэзгъуэтыжа.

Жызмы1эфыни анэдэлъхубзэк1э

Къысщохъур зыри къэмынэжа.

Анэм и макъыр щысхуэбзэрабзэк1э,

Бзухэм я усэр сф1ощ1 ефэгъуэк1.

Гъащ1э, зыгуэрк1э укъысхуэупсэмэ,

Анэм и макъым сыпомыгъэк1. .

Анэм и макъыр псэм дощ1эращ1э,

Анэм и псалъэм гур егъэин.

Анэм и макъым тынш ещ1 си гъащ1эр

Къару къысхелъхьэ, сещ1ыр нэхъ ин.

Егъ. Анэ псалъэр щыжып1эк1э гущ1эм зыкъыдегъазэ. Абы быным хуи1э лъагъуныгъэм к1э и1экъым, сытым дежи быныр балигъ хъуами, ар сабийщ анэм дежк1э, и гур хуэмыгъуэщ жэщи махуи, мы дуней псом тету п1эрэ адэ-анэм хуэдэу псэ къабзэ гу хьэлэлрэ зи1э нэгъуэщ1 ц1ыху! Ялъэк1амэ, быным и зы щхьэц налъэ хагъэхунтэкъым. Дэк1амэ, къыдэмыхьэжын къаф1ощ1ыр, жьы къепщамэ, ирихьэжьэнк1э шынэу мэпсэу. Нэгъуэщ1у жып1эмэ, анэм и гур сытым дежи быным и гъусэщ, аращ анэр нэм щ1ыхуагъадэри, абы и щыхьэтщ мы усэр.

Едж. Гъащ1эр ехь

И быным тегужьеик1ауэ:

Жьыр къепщамэ

Ф1ощ1 ирихьэжьэн.

Къытехъуам уэлбанэ,

Унэм ар щ1эк1ауэ,

Псыдзэм ихьын ф1эщ1у

Ныпежьэнщ.

Химыгъэхьэ жэщым,

Химыгъэхьэ щ1ы1эм-

Ф1ощ1ыр псоми

Зыгуэр къращ1эн…

Дыгъэ закъуэрщ анэм

Дзыхь зыхуищ1у щы1эр

А т1ум зэщхьщи аращ

Я хьэл-щэн.

Егъ. Анэ лъагъуныгъэм к1э имы1э, пэжыр жып1эм куэд 1ей ар хуэмей, илъагъу закъуэу щытмэ бынхэм я гуф1эгъуэ, къыхуащ1эну псори къыхуащ1ащ « Анэр бынхэм сытк1э ящыгугърэ?»

Анэр быным сытк1э ящыгугърэ?

Жыс1энщ пэжи куэд 1ей ар хуэмей

Илъагъу закъуэу щытмэ бын гуф1эгъуэ,

Къыщохъу абы дуней ф1ыгъуэр ей.

Я нэщ1эбжьэ бынхэм имылъагъумэ

Плъыжь дэмыхъумэ псэк1э къигъэщ1ам

И жьы хъугъуэм ф1ыуэ т1эк1у къалъагъумэ

Къыхуащ1ыну псори къыхуащ1ащ.

Куэд хуей анэр?

И пхъум и 1эф1ыгъэ

Къуэ гулъытэ, 1эф1агъ т1эк1ущ зыхуейр.

Дунейм щехыж махуэм къуэм и л1ыгъэ,

Пхъум и гъыбзэ и нэпс – ар къудейщ.

Егъ. Емызэшыж ди анэхэр нэху мыщу къотэдж. Унагъуэм 1уэхуу илъыр ящ1эр, ауэ дэ къытщохъур абыхэм я къарум хэмыщ1у. Дахущывгъэсакъыт псори анэхэм, дащывгъэсхьыт ахэм я къарум.

Укъотэджри к1ыф1зэхэту,

Къыбошыр жэмыр,

Бжэ1упэр уопхъэнк1.

Ужьыщ1эу, уеблэм,

Пхъэ щыпкъути щы1эу

Ет1ысэхыншэу

Махуэ псор йохьэк1.

Пщыхьэщхьэ хъуами

1уэху щы1эр мащ1э?

Уи 1ит1 мыувы1эу

Сыхелъафэр жейм.

Си шхы1эн к1апэр

Сакъыу схущ1эбупщ1эу,

Сыкъызэщоур

Жэщ ныкъуэм деж.

Зыщыбгъэпсэхур, мамэ,

Сытым деж?

Егъ. Гъащ1э щыхъук1э, 1эджэми дыхуозэ, 1эджи щыдолъагъу, щызэхыдох, псалъэ гуапи псалъэ жагъуи. Щы1эу п1эрэ адэ-анэр 1эф1у зымылъагъу е абыхэм я гумм ежэл1эн псалъэ жагъуэ езыпжсыфын бын? ! Хьэуэ, щы1эн хуейкъым апхуэдэ! Гупсыси псалъэ, зыплъыхьи т1ыс щ1ыжа1эри аращ. Демыгупсысу жыт1а псалъэ жагъуэр анэм и гум зэреуэр,ар абы зэрызэхищ1эр къыдегъащ1э мы усэм.

«Псалъэ жагъуэ».

Зэгуэрым семыгупсысу

Зы псалъэ къызжьэдэк1ат

Ар мамэ игущ1эм нэсри

И нэпсхэр къыщ1игъэк1ат.

К1иякъым мамэ схуэшхыдэу

Зы псалъи къызжимы1ат

И 1элъэщ1 к1апэм щэху дыдэу

И нэпсхэр к1уэц1игъэпщк1уат.

А нап1эзып1эм си псалъэм

Сык1элъыпхъуэнут слъэк1ам,

Ауэ шэм хуэдэкъэ псалъэр-

Къимыгъэзэж п1эщ1эк1ам.

Сымыщ1эу сщ1энур, сыхэплъэу

Сэ махуэ псор есхьэк1ат

Мамэ и жагъуэ хъун псалъэ

Щхьэ си жьэм къыжьэдэк1а?

Сэ шыгъушыпсыт1эм сыхэлъу

Жэщ к1ыхьри езгъэк1уэк1ат

Зи псэм щыщ хъуауэ къысхэлъым

Сэ дауэ сегуэуэк1а?

Анэгухэм нэхърэ нэхъ п1ащ1э,

Нэхъ махэ умыгъуэтын,

Зы мыхьэнэншэу къыпф1эщ1ри

Яхуохъур ахэм удын.

Дахущывгъэт нэхъ гумащ1эу

Анэхэм дахуэвгъэсакъ,

Сэ псалъэ жагъуэ жыс1ар зэ

Зезгъэ1этамэ си макъ

Тенауэ, къупщхьэ къысф1эщ1у,

Иджыри телъщ си тэмакъ

Вед: Анэр сабийм и чэнджэщак1уэщ, гъащ1э гъуэгу пэжым и гъэлъэгъуак1уэщ.

Си псэм хуэдэу сэ си анэ,

Уэр нэхъыф1 дунейм темыт.

Псынэ дахэу уи псэр къабзэщ

Уи гур дыгъэу къысщхьэщытщ.

Щхьэфэм уи 1эр къыдыболъэ,

Къызжыбо1эр псалъэ 1эф1.

Тхьэм уи гъащ1эу къэбгъэщ1ынур

Насып защ1эу пхуиугъэпс.

Сэ сода1уэ уи чэнджэщым

Узохьэл1э си щэху куэд.

Гук1э жыс1эу махуи жэщи

Пхузоусыр сэ уэрэд.

Егъ. Анэм и быным лей къытримыгъэхьэн, ихъумэн папщ1э маф1э лыгъэм хыхьэфынущ, хуей хъуми и псэр итыфынущ. Абы быным хуимыщ1эн ф1ыгъуэ телъкъым мы дунейшхуэм, ауэ ахэр зэхэзмыщ1ык1 бынхэри щыкуэдщ мы гъащ1эм, абы и щыхьэтщ иджыпсту фэдгъэлъагъуну пычыгъуэр.

Сценкэ гъэлъэгъуэн.

Авт. И щхьэгъусэр дунейм ехыжауэ зы фызабэ гуэр псэурт. Абы зы къуэ ц1ык1у закъуэ ф1 эк1 и1этэкъым. Арат абы мы дуней дахэшхуэм гурыф1ыгъуэу щилъагъуну и1эххэри! Зы гъэмахуэ пщыхьэщхьэ гуэрым мыпхуэдэу къэхъуащ. Анэр и къуэ закъуэм зыкъомрэ бгъэдэта нэужь:

Анэ: Иджы, си дуней нэху, дыгъэгъуэлъыж! Мы дуней нэхушхуэм алыхьым гу щыуигъахуэ!

Теуэ макъ.

Псэхэх: Уи хъуэпсап1эр къохъул1энукъым , анэ насыпыншэ!

Анэ: Ухэт уэ?

Псэхэх: Сэ сы-Псэхэхщ! – Уи къуэ закъуэм и псэр хэсхыну сыкъэк1уащ.

Анэ: Кхъы1э, псэхэх, си нит1ыр ищ1и хьэфизу дунейм сыкъытенэ! Си тхьэк1умит1ыр с1ыхи дэгу сагъроуэ дунейм сытеут1ыпщхьэж! Ауэ си къуэ закъуэм и псэр хыумых! Щхьэщэ пхузощ1- гущ1эгъу къысхуэщ1!

Псэхэх: Хьэуэ. Ар зэрыпхуэсщ1эн ф1ыгъуэ щы1экъым.

Анэ: Кхъы1э, псэхэх, иджыри зы тхьэмахуэ закъуэ п1алъэу къызэтыж. Зы тхьэмахуэ закъуэк1э си щ1алэ ц1ык1ур сыгъэлъэгъуж.

Псэхэх: Ирехъу апхуэдэу, анэ насыпыншэ!

Анэ: Нак1уэ, си щ1алэ, мы бгъуэнщ1агъыжьым дыщ1эт1ысхьэмэ,псэхэх угъурсызым ды1эщ1эк1ауэ къэплъытэ хъунущ.

Псэхэх: Ущоуэ, анэ насыпыншэ!

Анэ: Ухэт уэ?

Псэхэх: Сэ сы-псэхэхщ! Уэста п1алъэр къэсати, уи щ1алэ закъуэм и псэр хэсхыну сыкъэк1уащ.

Анэ: Кхъы1э, Псэхэх, хьэфизи сыщ1, дэгуи сыщ1, бзагуи сыщ1! А псом нэмыщ1к1э, япэ щ1ык1э сэ си псэр хэх, ауэ си щ1алэ ц1ык1у закъуэм и псэр хэпхауэ сумыгъэлъагъу!

Псэхэх: Хьэуэ. Ар зэрыпхуэсщ1эн ф1ыгъуэ щы1экъым.

Анэ: Кхъы1э, Псэхэх, иджыри зы тхьэмахуэ закъуэ п1алъэу къызэтыж. Зы тхьэмахуэ закъуэ си щ1алэ ц1ык1ур сыгъэлъэгъуж.

Псэхэх: Ирехъу апхуэдэу, анэ насыпыншэ!

Анэ: Нак1уэ, си щ1алэ, тэхъуанэр быдэу гъэжащ, абы жьы дэхуп1и, псы дыхьэп1и, нэху дэдзып1и и1экъым, абы дисмэ псэхэх угъурсызым ды1эщ1эк1ауэ къэплъытэ хъунущ!

Псэхэх: Ущоуэ, анэ насыпыншэ!

Анэ: Ухэт уэ?

Псэхэх: Сэ сы-псэхэхщ!Ещанэу Уэста п1алъэр къэсати, уи щ1алэ закъуэм и псэр хэсхыну сыкъэк1уащ.

Анэ: Кхъы1э псэхэх, хьэфизи сыщ1, бзагуи сыщ1! А псом нэмыщ1к1э, япэ щ1ык1э сэ си псэр хэх, ауэ си щ1алэ ц1ык1у закъуэм и псэр хэпхауэ сумыгъэлъагъу!

Псэхэх: Еуей. Сыту 1ейщэу дзыхэ сыкъэпщ1а, анэ насыпыншэ, уэ к1уэж, уи щ1алэм сэ зы лъэ1у хузи1эщи ар жес1энущ.

Псэхэх: Иджы си щ1алэ уэ къэда1уэ, уи анэ тхьэмыщк1эм и ф1ыгъэк1э уи псэр хэсхыну сэ къэзгъэнащ, ауэ зы лъэ1у пхузи1эщ, к1уэжи уи анэм и гур къысхуэхь. Махуищыр п1алъэу сэ узотыр.

Авт.: Щ1алэр и шым мэшэсыжыр. И унэм щ1алэм егъэзэж. И 1эгур гушхуэм къегъэнэху. Абдежым ар мэлъэпэрапэ, анэгури щэхуу къопсэлъапэ: «игъэуза си щ1алэ нэху?!»

Анэм быныр зэрилъагъур

Псы ежэхым и к1ыхьагъщ,

Быным анэр зэрилъагъур

Телъ лъэмыжым и к1ыхьагъырщ.

Егъ. Дымыщ1эххэу гъащ1эр мак1уэ, анэхэр нэхъ т1орысэ мэхъу, я нэк1ухэр золъэ, я щхьэцхэм тхъугъэ хедзэ.

Едж.:

Ирожэ гъуэгум п1ащ1эу ди машинэр

Си анэр сщ1ыгъуу док1уэр къалэ жыжьэ

Блолъэтыр жыгхэр, бгыхэр къыдргъанэ

Щ1э щ1эткъым тлъагъухэм къиднэхэм ди ужьым

Машинэм зэми дызэридзэу дехьыр

Хъыринэ дисым ещхьу зэми йощ1э

Иригъэша хъунт мы гъуэгуанэ к1ыхьым

Зеущэхур мамэ, сэ зыкъызегъэщ1ри.

Ар жейм здыхэтым хэщэтык1ырт, къащтэрт,

Абы сэ сеплъырт седэхащ1эу псэк1э:

Си анэ, жей уэ, жей укъыхэмыщту,

Иджыри и1эщ дынэсыным 1эджэ.

Абдежым, сымыщ1эххэу, гу лъызотэ

И щхьэцхэр си анэм зэрытхъуам

И нэк1ум телъ зэлъахэм си нит1ыр

Жы1эмыда1уэу зэуэ сф1ытоплъызэ.

Ар дауэ, гумащ1агъэр къызэлыжу

Сф1эщ1ыжу махуэ къэск1э сыбдэщ1ыгъути

Иджы сыноплъри си гум зефыщ1ыжыр

Пхэлъыж щымы1э уипхъэхащ уэ жьыгъэм.

Апхуэдэу щхьэ ухуа мы дунеижьыр

Гулъытэр къинэу сыт щыгъуи иужьым?

Ячыху лъэбакъуэ хъуурэ тпэ1эщ1э

Хохьэжыр пшэхум ди анэхэр дымыщ1эу.

Ирожэ гъуэгум п1ащ1эу ди машинэр

Сыдэплъу абдежым си нэпсхэр къысф1ыщ1ок1ыр

Сыкъигъэнауэ къызбгъурыс си анэр

Зыщ1ып1э мак1уэ, мак1уэ сэ с1эщ1эк1ыу.

Вед: Гъащ1э зи1эм уахътыи и1эщ, жыжьэ дыплъэурэ ди псэм и гъунэгъу ц1ыхухэр т1эщ1ок1. гъэщ1эгъуэныракъэ, мылъку гуэр тф1эк1уэдамэ, ди гум щ1охьэ, ауэ зэи дегупсысыркъым гъащ1эр зэрызэхэлъ махуэхэр къамыгъэзэжыну зэрыт1эщ1эк1ым. Дэк1уеигъуэ зи1эм ехыжыгъуи къыпэщылъщ, ауэ дэ абы и чэзум дегупсысыфыркъым. Мис апхуэдэурэ зи псалъэхэр хьэуа тхуэхъуа ди анэхэр т1эщ1ок1.

Анэу дунейм ехыжахэм мы уэрэдыр тыгъэ яхудощ1.

Уэрэд къоуэ - Нэхущ Чэрим «си Анэ»

Вед: Ц1ыхур гузэвэгъуэ хэхуэу 1эмалыншэ дыдэу къыщынэм деж, и гур япэ зыхуэжэр анэрщ… И псэм къилъыхъуэр аращ… Фэ гу лъывмытэжагъэнк1и мэхъу, ауэ 1уэхур и нэм щынэсым, фигухэр сэ къызэджащ. Фи псэхэм сыкъышащ …. Анэпсэхэр зэи л1эркъым. Ар бынхэм я гущ1эм щопсэу. Нэрымылъагъуу. Къатемыплъэкъук1ыу.Я ф1ым иригуф1эрэ я 1ейм иригумащ1эу….

Едж.: «Мамэ».

Сыту пасэу жьы ухъуа уэ мамэ,

Сыту пасэу сэ балигъ сыхъуа

Жэщи махуи иджы 1э бдэслъами,

Схуэщ1ыжын сэ щ1алэ уи щхьэ тхъуар?

Сот1ысэх уи гъащ1эм сегупсысуи

Хъуам уи теплъэ къызетыр гухэщ1.

Зэрешам уэ апхуэдизу уи псэр

Си зэрану куэд хэлъу къысф1ощ1.

Дунейм теткъым хунэсауэ анэм

Хуищ1эжыну игу илъ псор зы бын

Ауэ мырщ сэ жыс1эр сигу ит1ани:

Си гулъытэр пасэу уэ пщ1ыгъуамэ,

Щ1эх мыпхуэдэу мамэ умыхъунт.

А гупсысэм сэ иджы сыкъес,

Сыкъес сыкъэсащи уи деж к1асэу

Уэ уи гъащ1эр уохь иджы хэлъ-хэсу

Сэри уи п1э лъапэм мис сытесщ.

Схупыщэну махуэ, сщ1амэ уи гъащ1эм

Уэ си гъащ1эр щхьэузыхь пхуэсщ1ынт

Махуэ къэс иджы сыныпхуоп1ащ1э

Си нэ къик1ыу уэ сынып1уплъэн.

Егъ.: Быным щхьэк1э жэщ-махуэ имы1эу анэр гугъу йохь.

Едж.: Сэр папщ1э жеиншэу

Нэху куэдхэр уэ бгъэщт

Ц1э лейхэр бжыгъэншэу

Уахэдэу къысф1эпщт.

Уи макъыр сэ си псэт

Сигу хуабэ къысхуищ1т

Окопэм сыщисми

Зэхэсхыу къысф1эщ1т

Зауэшхуэм и гъуэгуу

Гъуэгу к1ыхьу сэ ск1уам

Слъэгъуакъым уи нэгум

Гуэк1уагъэк1э тек1уа

Уи нит1ым нэхъ гуапи

Слъэгъуакъым зым ей

Уи шхынхэм нэхъ 1эф1и

Ехакъым си джий

Уи 1ит1у си цейхэр

Зыдыжхэу щытам

Хуэдэ1э дунейм

Сэ сщ1эркъым тетау.

Едж..:

Джэдкъурт зи быным хуэсакъым нэхъей

Стетт сытым щыгъуи уи нэ1э

Бадзэ си нэк1ум тет1ысхьауэ сыжейм

Уи гумм псэхуп1э имы1эт

Ауэ гъатхэпэу щыгъагъэм дунейр

Зыщумыгъэнщ1у гуф1эгъуэм

Хъуауэ дахагъэр уэ уи гумм пык1ыгъуей

Унк1ыф1ыпащ уи нэ вагъуэр

Уи п1эк1э гъащ1эр сэ ф1ыуэ слъагъунщ

Нэзгъэсыжынщ уи 1уэху 1ыхьэр.

«Си псэк1э»уэ укъызэджэу щытам

Анэм и бынырщ и псэр.

Егъ.: Анэм теухуауэ тхыгъэм нэмыщ1и уэрэд куэди щы1эщ абыхэм папщ1э.

(Си анэ - уэрэд) Уэрэдыр къоуэ

1. Къысхуэгуф1эт уэ си анэ

Мазэ нуру пыгуф1ык1

Ей си анэ уезэшамэ

Сэ уэрэдк1э пщхьэщысхынщ.

Ежьу: Ей си анэ, псэм и дамэ

Дамэу стетри уэ аращ

Си уэрэдым и макъамэм

Псэуэ хэслъхьэри уэ аращ

1. Ущыгуф1эм деж си анэ

Си гур уэ къыпщогуф1ык1

Сыхэбгъэлъу щытми данэ

Уэ уи 1эпл1эр йохуэбэк1

Ежьу: Ей си анэ, псэм и дамэ

Дамэу стетри уэ аращ

Си уэрэдым и макъамэм

Псэуэ хэслъхьэри уэ аращ

1. 1ейуэ щы1экъым зы ани

Я нэхъ дахэри аращ

Сахэдэжми сэ ит1ани

Къахэсхынури уэращ.

Ежьу: Ей си анэ, псэм и дамэ

Дамэу стетри уэ аращ

Си уэрэдым и макъамэм

Псэуэ хэслъхьэри уэ аращ

Егъ.: Иджыри къыздэсым зи гугъу тщ1а анэхэм, пхуэмы1уэтэн хуэдиз я ф1агъщ, ц1ыху псори фэк1э зэрызэмыщхьым хуэдэу анэ псоми я гур зэхуэдэкъым, щы1экъэ анэ зи гур мып1ейтей, къыхэмыщтык1, абыхэм папщ1эщ мы усэр.

Едж.:

Сэ ухэту щытми узмыц1ыху,

Ауэ сощ1э шэч къытезмыхьэхэу

Пщ1ам иужьк1э, уигу щ1эмыузыжу,

Пхуэмыфащэ пхужа1эну – ц1ыхущ.

Пхуэдэ гуэрхэм япэм я хъыбар

Зэхэсхати, сигу щ1ыхьащ жагъуащэу

Нывжес1эну иджы сигу илъу хъуар

Зэрыфхэтыр нэмыплъ къывэзгъащ1эу.

Хамэ унэм къыщ1эбна сабийр

Къыпк1элъыгът зэхэпхыу, зиук1ыжу,

И 1э ц1ык1ухэр гужьейуэ

Аф1эк1а и макъ къыщимык1ыжым.

Гъырт сабийр пф1эщ1ыу зэгуэуд

Сымаджэщыр щубгынэм уп1ащ1эу

Сабийншэм анэ гъащ1эр нэдщ,

Уц1ыхубзт, арат ар зэхыумыщ1эу?

Зэхэпх хъумэ сабийхэм я гъы макъ

Укъэск1энкъэ, гъыр ууей къыпф1эщ1у?

Е ц1ык1у джэгу ущрихьэл1эм Дей

Ублэк1ыну уигу зимыфыщ1ыжу?

Ухуэмейми зык1и си чэнджэщ

1эф1 щ1элъыжкъым уэ къыппэплъэ гъащ1эм

Ухуэп1ащ1эу къэблэгъэным жэщ

Епхьэк1ынщ ущ1ыгъуу узы1ущ1эм.

Хьэуэ, къэплъыхъуэжу уи насып

Щ1ым иджыри зыщыбгъэдахэну?

Зи сабийр зэгуэр зыщ1ам 1эщ1ыб, Семыхъуапсэ уэ къыдэпхьэхыыум.

Сщ1ырэ пэт сэ иджыпсту уи гугьу Къэк1ыжащ сигу си анэ гумащ1эр

Си анэ дыщэм сэ къысхурегьэгьу

Пщ1ыгъуу и ц1эр къызэрис1уэм папщ1э.

Къытхуэсакъыу ди анэхэм дап1ащ,

Щ1ы1и жьыбгъи къыдамыгъэуэк1ыу

Щымэжал1и езыхэр къэхъуащ

Шхын нэхъыф1хэр тхузэрагъэт1ылъэк1ыу

«Си псэ, си насып» - къытхужа1энт, Уэрыншауэ гъащ1э сэ симы1э»

Хьэуэ, бгъуэтыжынкъым уэ насып,

Ар иук1ыжащ зэгуэрым уи 1эм.

Уи сабийрщи и нэпс гъущыжынщ, Хыф1эбдзами ар зейншэ къабзэу

Зи1эм анэ иримыгъэхъуапсэу

Зыхуей хуэзэу Хэкум ип1ыжынщ.

Быну тетым я ц1эк1э дунейм

Анэу щы1эм ягу сыкъипсэлъык1ыу

Сэ узох нэлатым я нэхъ 1ейр Зэрысхузэф1эк1к1э узгъэик1эу.

Егъ.: Анэм теухуауэ зы тхыгъэ нэхъ мыхъуми зи 1эдакъэ къыщ1эмык1а

тхак1уэ щы1экъым жып1эми ущыуэну си гугьэкъым. Анэ псалъэр алыхь-талэм и тыгъэ нэхъыф1хэм щыщу жып1э хъунущ, арауи къыщ1эк1ынщ мыпхуэдэ псалъэжьхэри хъыбархэри щ1ыщы1эр:

Едж.: Анэ бгъафэрэ хъурыфэ джэдыгурэ.

Едж.: Анэ зимы1эм гу1эр и махуэщ.

Анэр нэщи, адэр лъэпкъщ.

Анэм и быным хуищ1эр ф1эмащ1эщ.

Анэм къуипэсыр гунэсщ

Анэм къуитыр 1эф1щ.

Быныр нэм и хъуахуэщ.

Анэм и щапхъэр пхъум и бзыпхъэщ.

Анэнэп1сыр уэсым нэхърэ нэхъ щ1ы1эщ.

Бзаджэр уи пэшэгъумэ, уи анэ мыгъуэ хъунщ.

Анэнэп1эсрэ гупк1э т1ысып1эрэ.

Сабийм адэ имы1эжмэ, зеиншэкъым, анэ имы1эжмэ, зеиншэщ.

Едж.: Зи анэ-адэр жьы хъуа нэужь еплъыжыну хуэмейхэм щхьэк1э сэ хъыбар

гуэрым седжащи сыхуейт къыжыс1эжыну. Зы ц1ыхубз гуэрым и гъащ1эр фызабэу зы къуэ ип1ат. Къуэр балигъ хъури, абы щхьэгъусэ къригъэшащ. Мыгувэу унагъуэм щ1алэ ц1ык1у ягъуэтащ. Зэманыр к1уэрт, къуэрылъху ц1ык1ур 1ыхьэ лейм ик1ауэ илъагъурт анэшхуэм, щ1алэ ц1ык1уми нанэ зэхилъхьэ щы1этэкъым

Ауэ зы махуэ гуэрым нысэр къыщ1ыхьэжауэ нанэ и хьэпшыпхэр
зэщ1икъуэрт, щхьэнтэ уэншэкухэр зэк1уэц1илъхьэрт. Къуэрылъху ц1ык1ум
1уэхур зы1утыр къыгурымы1уауэ къижыхьырт. Щимыгъэпсэухэм абы анэр
къыщ1эк1иери жи1ащ: «Нанэ жьы хъуахэр щап1ыж унэм» - зэришэр. Абы
щ1эк1ар къыщ1ыхьэжыху, щ1алэ ц1ык1ум щхьэнтэмрэ уэншэкумрэ
зэк1уэц1илъэфащ, уэншэкур т1ууэ зэпиупщ1ащ. Анэ п1ащ1эу къыщ1элъэдэжар къэу1эбжьауэ щ1эупщ1ащ: «Мыр сыт?» - сабийм жэуап къитащ: «Иныкъуэр ууейщ, мамэ, нанэ ещхьу жьы ухъуауэ ущысшэк1э уэри уэншэку ухуейщ» жи1ащ щ1алэ ц1ык1ум.

Егь.: Анэм и 1эм ищ1 псори щ1эщыгъуэщ, абыхэм я 1эхэм дыщэ къапощэщ. Ёдж.: 1. Жа1эр мамэ и 1эм

Дыщэ къыпыщэщу

Абы зыгуэр щищ1эм

Соплъ зыщызмыгъэнщ1ыу.

1. Ар хэмыхьэм 1уэхум

Жа1эри хэмыщ1у

Щы1экъым зы закъуи

Ар зьпэмылъэщу.

1. Мамэ дахэ, уи 1эм псори лъок1

Ахэм я щэбагъым ещхьщ уи 1эпл1эм

Мамэ дахэ, уи 1эм псори лъок1,

Ахэм я хуэбагъыр ещхыц у и нит1ым.

1. Жа1эр мамэ и 1эм Дыщэ къыпыщэщу

Абы ещ1эр псори

И къалэн къыф1эщ1у.

5. Щыскъым ар 1уэху хъуамэ
Зэик] епэщэщу
Зэф1игъэщ1у ахэр

Езым еим щымыщу.

1. Жа1эр мамэ и 1эм

Дыщэ къыпыщэщу,

Сак1элъоплъыр ахэм

Сэ защызмыгъэнщ1у.

7.Ауэ си ф1эщ хъуркъым,

Сэ абы зезгъапщэм,

Си 1э ц1ык1ухэр мамэ

И 1эхэм щымыщу.

Егъ.: Анэм и быныр балигъ хъуа нэужьк1эщ, ар тыншып1э щихуэр, ауэ абы щыгъуи абы и гур сабыркъым, зы мэскъалри и гум йожал1э.

Едж.:«Сн анэ»

1. Уэ тыншып1э ущихуапхъэщ нобэ,

Уэ тыншып1э щыбгъуэтын зэманщ, Пхузэф1эк1ыу зыри къэбгъэнакъым,

Уэ уи бынхэм тхуэблэжьыну 1уэху ин.

2.Дыхэпшащ гъащ1эм нэхъ гъуэгу 1ущк1э

Гугьуехь псори уи бгым ибгъэхуащ.

Хъунщ тхуэпщ1ар, зыгъэпсэху ди анэ,

У и къалэныр ек1уу бгъэзэщ1ащ.

1. Ауэ мис, ит1ани усабыркъым,

Дысабийуэ къытк1элъывожыхь.

Нэхъ гугъуехь ихуэрщ узигьусэр,

Дэр щхьэк1э уи гум ину телъщ бэлыхь.

1. Жи1эт, дауэ апхуэдизу л1ыгъэ Зэбгъэгъуэтыжыфу уи насып къихьа,

Дауи, пэжу къэплъхуа бынхэракъэ Насыпыф1эу гьащ1эр щ1епхьэк1ар.

Едж.: «Анэм и псалъэ»

Зи узыр сипкък1э зыхуэзгъэву,

Щыгу1эм гу сызыхуэхъун,

Уэращ сэ гъащ1эр схуэзыгъэф1ыр,

Си щ1алэу гу щысхуэху слъагъун, Ажалк1э си япэ уимыщ закъуи, Щымы1э уэ пхуэзмышэчын,

Си 1э лъэныкъуэр пыбупщ1ами, Къэнамк1э 1эпл1э уэсшэк1ынщ.

Едж.: Куэдрэ тхурепсэу ди анэхэр, ди япэ куэдрэ тхьэм анэхэр иригъэт, яхуэтщ1ыфу анэхэм дэ гулъытэ нэс. Ди насыпщ ди анэхэр тхуэпсэумэ. Ди насыпщ, ди анэхэр дунеягък1и ахърэтк1и къытхуэаразымэ.

Едж.: «Анэм»

Анэм еп1 и быныр хуэсакъыпэу

Гъащ1эу и1эр хуещ1ыр щхьэузыхь

И псэм япэ быныр ф1энэхъапэу

Г'ъащ1эм и бэракъыу сабийр ехь.

Ди насыпщ ди анэр тхуэпсэуху,

Ди делагък1э имылъагъумэ гуауэ нэпс

Ди насыпщ бын щапхъэу ды1умахуэу

Анэм хуэтщ1ыжыфмэ дэ гулъытэ нэс.

Ди насыпщ т1эунейрэ, ди лэжьыгьэм

Анэм игу хуэзагьэу ц1ыху дыхъуам

Ди насыпщ мардэншэу дэ ди гъащ1эр

Анэм къабыл ищ1у дэ къытщыхъуам Дунеягъэ 1эф1к1и ахърэтк1и

Сыпхуэаразыщ си щ1алэ гурэ псэк1э

Егъ.: Анэм теухуауэ усэ зэхэзылъхьи ди еджак1уэхэ

Едж.: «Анэ» «Сабий гъыбзэ»(къеджэр Жьэк1эмыхъу Марьянэщ)

Анэм и куэщ1ым уилъым

Нэхъыф1 щымы1эу солъытэ,

Анэм и 1эр уи щхьэм къыдилъэм

У и гур хэхъуэу къыпщохъур.

Анэм къуит хуабэр

Дэни щылъыхъуэ бгъуэтынкъым а хуабэр,

Ухуейм дэпхуэдэуи жы1э

И псэр ш1итынущ хуей хъумэ

Анэм нэхъапэ щымы1э.

Едж.: «Си мамэ» (къеджэр Хьэхъупащ1э Светэщ

Мамэ щ1эсым унэр хуабэщ

Псэр мэгуф1э, гур мэпсэху

Мамэ дыгъэм хузогъадэ

Мамэ гъащ1эр схуегъэнэху!

Едж.: «Си дыщэ вагъуэ» (Кыржын Эльдар)

Си анэу дыщэ вагъуэ,

Ф1ыгьуэу си1эр уэзыращ

Уэ пхуэдэну зы щымы1э

Сигури си псэри уэзырщ зейр Дунеишхуэм ф1ыгъуэу телъыр Зыхуэфащэр уэзыращ.

Си анэу дыщэ вагъуэ

Щымы1э пхуэзгъэдэн!

Едж.: «Анэ» (Шыбзыхъуэ Ислам)

Си анэ сыту удахэ,

Си анэ сыту у1эф1.

У и нит1ым нэхъ дахэ

Слъэгъуакъым зым ей

Уи шхынхэм нэхърэ нэхъ 1эф1и

Щысшхакъым зым я дей

Схуэпсэу куэдрэ сянэ

Ф1ыщэу узолъагъу.

Едж.: Нобэ зыхэтха псалъэхэм дригъэгупсысыжащ, анэхэм къытхуащ1э

псори. Мы дунеишхуэм ф1ыгъуэу телъым нэхърэ нэхъыф1щ ди анэхэр.

Едж.:

Быну щы1эм ягу сыкъипсэлъык1ыу Анэ псоми хъуэхъу сэ фхузотхыр Къахуэвгъэгъуу бынхэм я сэкъатыр Насып лъагэм фи щхьэр фигъэ1эту.

Анэ, анэ, анэ дыщэ

Быну щы1эр си щхьэм хузогъадэ Фытхуэпсэу къепсыхук1э щ1ылъэм дыгъэ Фи щхьэц тхъуахэр хурегуф1э ф1ыгъуэм.

Быну щы1эм ягу сыкъипсэлъык1ыу

Анэ псоми хъуэхъу сэ фхузо1этыр

Бын гуф1эгъуэм напщ1эр дыхэлъэту Жьыщхьэ махуэу бынхэм фащхьэщыту

Егъ.: Зэгуэр демыгупсысыжу псалъэ жагъуэ жыт1ами

Едж.:Аф1эк1а апхуэдэ къэмыхъуну тхьэ фхудо1уэ ди анэ лъап1эхэ.

Егъ: Нобэрей ди зэ1ущ1эр абдежым щызэхудощ1ыж. Узыншэу фыщытхэ!