Баэл Максатбеков жөнүндө баяндама

Билип ал!

Балдар, силер билесиңерби, биздин Аманкан Мамыров мектебинде билим боюнча ким алдыда экенин? Өзү 7 – класстын окуучусу болсо дагы 11 – класста кирүүчү астрономия, 8 – класстан баштап кирген химия сабактарынан эң жакшы өздөштүрүп, өз алдынча бул илимдерди кызыгып окуп, жогорку класстын окуучулары эсине сактай албаган эреже – аныктамалардын чечмеленишин жатка айтып, физика, химия, астрономия сабактарын сүйлөөдө өзүнүн илимий термин сөздөрү менен айткан бул акылдуу инибиз – Баэл Максатбеков. Биз бүгүнкү рубиркабызда мына ушул мезгилден озгон окуучубуз Баэл тууралуу маалымат берүүнү чечтик.

Баэл бул мектепке 2017 –жылдын жаңы окуу жылынан тарта окуп келет. Жаңы келгенде анын сабакты жакшы өздөштүргөндүгүн, өзү курдуу тең балдардан сабакка олуттуу мамиле жасоосу, көз карашы, түшүнүгү такыр башкача экендиги айырмаланып тургандыгына дароо эле мугалимдер баа беришкен. Анын үстүнө орус класстан келген Баэл сабактарын кайсы тилде кең – кесири айтып берерин билбей, эне тилдин көп кыйынчылыктарын баштан кечирет. Мындай көрүнүш Баэлдин турмушунда экинчи жолу кайталанат. Себеби, ата – энеси баласынын жакшы билим алуусу үчүн күчтүү мектеп издегенде , алардын тандоосуна орус мектеби туш келет. Орус тилине отурукташып, ал тил менен ойлоно баштаган Баэл үчүн 2017 – жыл кайрадан оор шартты көтөрүүгө туура келет.

Сабактарды кыргыз тилинде сүйлөө үчүн терең ойлонуп, олуттуу мамиле жасап сүйлөчү. Ошонун таасиринен болсо керек азыр, анча – мынча гана сөздү аралаштырып жибербесе, эң сонун сүйлөйт. Бардык мугалимдер Баэлдин кругозорунун кенендигине, көптү билгендигине ыраазы болуп келишет.

• 2006 – жылы 10 –августта Бишкек шаарында төрөлгөн.

• Эл аралык Сапат билим берүү мекемесинин НОШ ( начальная общеобразовательная школа ) Себат мектебинен билим алган.

Кызыккан сабактары: астрономия, химия, алгебра, чет тили

• Ар бир күнү китеп окууну адатка айланткан жана бир күндө 20 барактан окуйт.

Орус жана америкалык, мындан тышкары батыш европа өлкөлөрүнүн белгилүү жазуучуларынын китептерин көп окуйт.

30дан ашык адабий көркөм чыгармаларды, 5 илимий китеп окуган.

• Азыркы тапта экологияны таза кармоо, коргоо тууралуу долбоордун үстүндө иштеп жаткан учуру. Бул долбоорду 2 жыл мурун баштаган.

• Келечекте кыргыз элине жардамы тийген, чоң бизнесмен же илимпоз адам болгусу келет.