Аршаанай дуhал 7 классс

Темэ

“Аршаанай дуһал-шэдитэ зүйл мэтэ»

Класс

Хэшээлэй тγхэл

Шэнэ мэдээсэл ололгын хэшээл

Хэшээлэй зорилго

Һургалгын: “Аршаанай дуһал” гэһэн шастирые уншажа, һургаал заабаринай гүнзэгы удхые, зохёолой түхэл маягые, үгэнүүдэй тайлбари ойлгуулжа үгэхэ; текстын анализ хэхэ шадабарииень хурсадхаха;

Хүгжөөлгын: Элдэб янзын даабаринуудай хүсөөр һурагшадай ухаан бодолые гүйлгэжэ, анхарал, һүбэлгэн түргэнөөр харюу олоод хэлэжэ шадаха аргые хурсадхаха, аман хэлэлгые хүгжөөхэ;

Хүмүүжүүлгын: “Аршаанай дуһал” гэһэн шастирай һургаал заабаринуудые һурагша бүхэндэ дамжуулха, Эхэ орондоо, нүхэдтɵɵ, үнэн ябалга hурагшанарта хүмүүжүүлхэ.

Образовательна ресурснууд

Мультимедийна слайдууд ба зураг.

Этап

Багшын хγдэлмэри

Һурагшадай хγдэлмэри

Эмхидхэлэй үйлэ

Сайн байна! hуугты!

Мэдэсыень шухалалга

Гэрэй даабари шалгалга.

Һурагшад “Аршаанай дуһал” гэһэн шастирые уншаад ерэхэ байгаа.

Багшын үгэ:

Мүнөөдэр хэшээлдээ бидэ бэлигтэй ехэ эрдэмтэнэй Ринчин Номтоевай “Аршаанай дуһал” гэһэн шастиртай дэлгэрэнгыгээр танилсажа, һургаал заабаринуудайнь гүнзэгы удхые шэнжэлшэ, уран зохёолшо тус зохёолоороо, бидэ уншагшадта, ямар юумэ ойлгуулха һанаа гээшэб гэжэ элирүүлжэ, ухаан бодолдо шэнгээхэ гэжэ оролдохобди.

Гэртээ таанад тус зохёол уншахадаа, дүрбэн шэнжэлхэ асуудалда анхаралаа хандуулха аргатай байгаат. Мүнөө хэшээлдээ бидэ шэнжэлгын ажал ябуулжа, энэ асуудалнуудта зүб харюу үгэхэ гэжэ оролдохобди.

(Багша һурагшадаа дүрбэн бүлэг хубаажа һуулгана. Хэшээлэй түсэбтэй танилсуулна.)

Хэшээлэй түсэб:

1. Лексическэ хүдэлмэри;

2. 1 даабари “Түргэн харюу”

3. 2 даабари “Таагыт маниие”

4. 3 даабари “Арадай абдарһаа”

5. 4 даабари “Ухаанай мүшхэлгэ”

6. Лексическэ хүдэлмэри. (ойлгогдоогүй үгэнүүдэй удха тайлбарилха)

Нэгэдэхи даабари: “Түргэн харюу”

(Энэ даабари үнгэргэхэдөө, һурагшад хэр зэргэ зохёолойнгоо удха мэдэнэб гээшые багша шалгана )

1. Ямар үльгэр соо хулганануудай эбтэй эетэй байһан тухай хэлэгдэнэб?

2. Уран зохёолшо ямар үльгэр соо хүнэй хомхой хобдог зан харуулнаб?

3. Ямар үльгэр соо гурбан амитадай туһа хүргэһэн тухай хэлэгдэнэб?

4. Уран зохёолшо ямар амитад тухай һайнаар бэшэнэб? Ямар амитадые бурханай амитад гэхээр бэ?

Хоёрдохи даабари : “Таагыт маниие”

( Энэ даабари соо багша карточканууд дээрэ, нэгэ талада һургаал заабаринууде харуулна, нүгөө таладань үльгэрнүүдэй нэрэнүүдые. Һурагшад зүбөөр тааруулха ёһотой. Слайд дээрэ зүб харюунуудаар шалгана.Тиихэдээ багша хэр зэргэ һурагшад үльгэр соо үгтөөтэй һургаал заабаринуудые ойлгоноб гээшые шалгана.)

Физминутка. “Үзэгүүдэй аадар”

( һурагшад нэгэ нэгээр гүйдэлөөр гаража, самбарта һэлгэгдэһэн үзэгүүдээр үльгэрэй нэрэ суглуулна. Жэшээнь: “Муура багша”

Гурбадахи даабари: “Арадай абдарһаа”

( тус даабари соо һурагшад үльгэрнүүдэй удхада тааруу оньһон үгэнүүдые шэлэнэ, харюугаа батална.)

Жэшээнь: Тааруу оньһон үгэнүүд.

. «Мууһаа муу, һайнһаа һайн», «Эрхим баян-эрдэм, дунда баян-үри хүүгэд, адаг баян-адуу мал», “Горхо хараагүй аад, гуталаа бү тайла” г. м.

Дүрбэдэхи даабари: “Ухаанай мүшхэлгэ”

Багша: Энэ даабари дүүргэхэдээ, бидэ урда хэшээлдээ хандаһан асуудалнуудаа шэнжэлжэ баталхабди. Таанад мүнөө бүлэг бүхэн өөһэдынгөө һанамжа асуудал бүхэнөөр хэлэжэ туршагты.

“Аршаанай дуһал” гэһэн шастирай тематика

Арад зоной ажабайдал байгаалиин амидарал хүнэй абари зан

мүнхэ байдал ба нэрэ зүб шударгы яба,

эрдэм бэлигтэ һура

“Аршаанай дуһал” гэһэн зохёолой шэнжэлхэ асуудалнууд.

• Энэ шастир багашуулда гү, али томошуулда зорюулһан үльгэрнүүдтэй

• Энэ шастир соохи һургаал заабаринуудай удха

• Энэ шастирай үльгэрнүүд соо уран зохёолшын намтар элирүүлгэ

• Энэ шастир буряад арадта асарһан шэдитэ зүйл

Хэшээлэй тобшолол.

Багшын үгэ: Ринчин Номтоевай “Аршаанай дуһал” гэһэн шастир соохи үльгэрнүүд багашуулдашье ба томошуулдашье зорюулһан гэжэ һанагдана, юундэб гэхэдэ, багашуул энэ үльгэрнүүд соо үгтөөтэй һургаал заабаринуудай хүсөөр һайнаар хүмүүжэхэ, саашанхи ябадалаа зүбөөр шэлэжэ шадаха. Харин тиихэдэ томошуул өөрынгөө байдалаа, харгыгаа шүүмжэлжэ, алдуугаа заһажа, саашанхи ажабайдалдаа, харгы замдаа алдуу эндүүгүйгөөр байха гэжэ оролдохо баатай болоно.

Энэ үльгэрнүүдэй һургаал заабаринууд ямаршье үедэ хүнэй ажабайдалтай, абари зантай хабаатай . Тиимэһээ хэзээдээшье хододоо шэнжэлхэ асуудал байха.

Уран зохёолшо тус үльгэрнүүд соогоо үргэн, баян намтарайнгаа дүй дүршэл, ухаан бодолойнгоо, сэдьхэл зүрхэнэйнгөө, урма зоригойнгоо хүсэлые нэбтэрүүлжэ, аршаан мэтэ сэбэр арюун, мүнхэ байха энэ зохёол бүтээжэ, буряад арадайнгаа хүнгэн байдалай болон жаргалай түлөө оролдоһон байна. Тиимэһээ “Аршаанай дуһал - шэдитэ зүйл мэтэ” гэжэ һанажа, саашадаа дамжуулжа ябахамнай шухала бшуу.

Рефлексия.

• Энэ хэшээл соо өөһэдтөө ямар шэнэ юумэ хадуужа абаабта?

• Тус хэшээл юугээрээ һонирхолтой байгааб?

Сэгнэлтэ

Гэрэй даабари: Бүлэг бүхэн творческо даабаринуудые дүүргэжэ, проект хамгаалха.

1 бүлэг: Ринчин Номтоевай намтараар презентаци бэлдэжэ хамгаална.

2 бүлэг: “Аршаанай дуһал –шэдитэ зүйл” гэһэн сэдэбтэй букледүүдые бэлдэжэ хамгаална.

3 бүлэг: Үльгэрнүүдэй удхаар багахан зүжэг табижа харуулна.

4 бүлэг: Үльгжрнүүдэй удхаар зурагуудые зуража хамгаална.