Юбилейный вечер

Дагъиста университетли, писательтала союзли ва багьудила министерстволи фольклорист, писатель, РФ-ла урибси учитель, багьудила хIурматла хIянчизар ва халкьла мугIялим БяхIямадов Расул Мусаевич акIубхIейчирад 85 дус диркнилис хасбарибси балбуц дураберкIиб. Ил балбуцли- чи жибарибти хIурматла гIяхIлала ургар нушара лерри: шила школала хIянчизарти ва бучIанти, ХIябкьяймахьила шила библиотекала хIянчизар. Нуша ила жидарибтири вахъхIила тяниш, Расул Мусаевичла халасигъуна урши Муса БяхIямадовли, ДГУ-ла преподаватель, профессор.

Балбуц бехIбикайчи, нуша сай Расулличил, илала гIямрула рархкья ПатIиматличил ва илдала дурхIначил тянишдиубра .Илди лебтанилра чебяхIси даражала багьуди касилри, илхIелира шел дурхIяли чула дудешли багьуди касибси Дагъиста пачалихъла университетла филологияла факультет таманаилри ва декIар-декIарти мераначиб бузулри. Чула неш-дудешли биштIали лебалли, илдазир нешла мезличи, дубурлантала гIядатуначи адикьурти диги дурхIназир дебшладиъни багьеслири. Илдала уржибси ва халаси хъалибарг лебтасалра разили гьунибиулри; дурхIнани чула дудешла байрамличи ил мубаракварес бакIибти адамтала мекелли халаси хIурмат бариб. Илди биалли камли ахIенри, сабира нушала улкала декIар-декIарти мер-мусаличибад бакIибти! Дигиличил гьунибаиб илди нушабра, гьаларти къяянази кадиахъесра маслигIятбариб.

Нуша шадлихъличи бакIибти поэтуни М. ХIяжиевличил ва М-Р. Расуловличил; Даргала театрлис гьуни чебиахъуси Рупат Чараковличил, бекI режиссер Мустапа ГIябдиевичличил, гIяртистуни C. Шагьмандаровачил ва Мухтар НухIовличил, ДГУ-ЛА преподаватель, профессор М-С. Мусаевличил тянишдиубра.Илкьяйдали нуша тянишдиубра Р. ХIямзатовла уличилси миллатласи библиотекала хIянчизар Салимат ХIяжиевачил, сарира ХIурхъила шилизир акIубси

Нуша чедаибхIели,Салимат дебали разириуб, хаслира дурхIначи: "Сен гIяхIси барилрая, хIуша иша дакIни, илхIелира, дурхIнира кабукили,-рикIи ил. - Иш журала далдуцуни дурадуркIухIели, бутIакьяндеш дирес къайгъибиреная. Илдани дурхIназир дарган девличи, саби акIубти мер-мусаличи, даргантачи, илдала культураличи диги имцIадиру." Илкяйдали С. ХIяжиевани дарган мезли дурабулхъуси республикала газетализи школала, шантала гIямруличила, дураберкIибси сегъуна-биалра балбуцличила макьалаби, назмурти гьаладирхьахъес, сари рузуси библиотекали- зира мурт-биалра архIя дураберкIахъес маслигIятбариб. Гьайгьайрагу, Салиматла илгъуна пикриличил нуша кьабулхIедикес хIедирехIе. Дарган дев чебяхIбирули илис учIуси ва дарган мез руркънилис, илди чеахъдикIахънилис, даргантала рухIашалси давла чеимцIабирнилис сунела дахъалгъунти гIямру пешкешдарибси Расул БяхIямадовлис багъишлабарибси шадлихъличи хIедакIили калес нуша хIедирехIери.. Къумукъла машгьурси гIяртистка Барият Мурадовас тIашбатурси памятникла мякьлар

Нушаван ил балбуцличи бакIибти бахъал лебри, илди-ургаб Россияла, Москвала ва Кавказла цархIилти республикабала писательтала союзла члентира, дагъиста поэтуни ва писательти М. ГIяхIмадов, ГI. ГIямаров, И. Ибрагьимов, А. ГIябдулманапова ва ц. Шадлихъличир ДГУ-ла Дагъиста мезанала факультетла студентунани Р. БяхIямадовла нешла мезличила, даргантачила, дигайличила, ватIайчила делкIунти назмурти гьарра миллатла мезличил делчIун, зайдухъун илала назмуртала черкад далуйтира. Лебтасалра гIяхIдизур С. Шахмандаровани, ГI. Абубакаровани, ХI. Ибрагьимован, М. ГIялиевани ва цархIилтани делчIунти далуйти, театрла гIяртистунани гьаладихьибти сценкаби.

Балбуц ахирличи бикибхIели, нуша парклизирад къунздухъунра ва поэтуни, писательтас тIашдатурти памятникуни чедаира.

Май - 2017