Сочинение на тему: "Если мой язык исчезнет"

Сочинение

Метер маг1арул мац1 хвезе батани,

Хваги дун жакъаго, жаниб рак1 кьвагьун.

Мац1 ккола инсанасе жиндир миллаталдасан щвараб ва щвезе рес бугеб рух1ияб бечелъи. Г1умру гьабулелъул щибав чи х1ажалъула пикру мац1алдалъун загьир гьабизе ва мац1алъе ц1икьен т1алаб гьабизе. Миллаталъул рух1ияб рахъ бечед гьабизе рес гьеч1о, мац1 лъик1 лъазабулеб ва гьелде к1вар кьолеб гьеч1они.

Миллаталъул мац1 лъик1 лъалеб гьеч1они, гьев чиясда жиндир миллатги лъик1 лъазе рес гьеч1о, щайгурелъул мац1алъ баян гьабулелъул миллаталъул тарих.

Муг1рузда иццалг1анги г1емерал руго мац1алъул диалектал. Иццаздасан лъарал , лъараздасан г1орал лъугьунел г1адин, рес буго г1аммаб маг1арул мац1 диалектаз бечед гьабизе. Маг1арул мац1алъул бицен гьабулелъул рак1алде вач1уна муг1рул борхалъилъуннилъее ва хадусел г1елазе хут1улеб ц1ар нахъе тарав гьунар т1ок1ав раг1ул устар Р. Х1амзатов. Рахьдал мац1алъул гъварилъиялде гьев г1адин гъваридго ва г1ат1идго гъорлъе лъугьарав шаг1ир хъвадарухъа лъугьинч1о нилъер жакъа къоялде щвезег1ан. Мац1 биларасул билулеб буго миллат. Гьеб гьедин кколеблъи жибго г1умруялъ бихьизабулебги буго.

Дир рак1 ч1араб буго цогидал мац1аздасан берцинабги маг1на бугеблъунги маг1арул мац1 бук1иналда. Щайгурелъул, гьеб буго х1акъикъаталдаги бищун г1емераб миллатги бугеб, г1емер чияс жиб бицунеб мац1.

Гьереси ккеларо маг1арул мац1 Дагъистаналъул мац1азул хан бугилан абуни. Гьедиг1анги берцинаб буго маг1арул мац1. Авар мац1алъул ц1акъго къимат борхизе гьабуна дунялалдаго машгьурав шаг1ир Расул Х1амзатовас. Гьес ва гьесул эмен Ц1адаса Х1амзатица, Хъах1абросулъа Мах1мудица, Инхоса Г1алих1ажияс ва цогидалги нилъер машгьурал шаг1ирзабаз ва хъвадарухъабаз жиб бицараб, жидерго гьайбатал асарал гьез г1уц1араб маг1арул мац1 лъазабич1ого тей, гьеб рахьдал мац1алдаги к1алъач1ого, г1урус ва цогидаб мац1алда к1иго маг1арул чи цоцалъ к1алъаялдаса к1удияб такъсир кинаб бук1унеб? Гьединал г1адамал адаб – х1урматалъе мустах1икъал рук1унищ? Рук1унаро!!!