Урок крымскотатарской литературы «Тылсымлы юзюк масалы».

Эдебий окъув. 2 сыныф Оджа: Бейтуллаева Л.А.

Мевзу. «Тылсымлы юзюк масалы».

Бекленильген нетиджелер: метиннен чалышмагъа огренелер, мундеридже боюнджа суаллерге джевап берелер; башкъаларнынъ нутукъларыны динълемеге ве анъламагъа алышалар.

Дерснинъ чешити: янъы мевзуны огренюв дерси.

Донатмалар: дерсликлер, С. Какуранынъ «Бир заманда бар экен» йырына чыкъарлгъан мультфильм, масаллар китаплары, проектор, компьютер.

Дерс кетишаты:

1.Тешкилий дакъкъа

Селямлашув. Дерске азырлыкъны тешкерюв.

2.Эв вазифесини тешкерюв

С. Усеиновнынъ «Мем анамнен лаф этем» йырыны ифадели окъумакъ.

Истеген эки дёртлюгини эзберлемек.

3.Нутукъ мешгъулиетлери

Проекторда «Бир заманда бар экен» мультфильми костьериле. Талебелер мультфильмни бакъкъан сонъ суаллерге джевап берелер:

- Мультфильм не акъкъында? (Тылсымлы айванлар дюньясы акъкъында.)

- Йыр насыл сёзлерген башлана? (Бир заманда бар экен, бир заманда ёкъ экен.)

- Бойле сёзлернен насыл эсерлер башлана? (Масаллар.)

- Масаллар не акъкъында ола? (Керчекте олмагъан шейлер акъкъында.)

4.Бильгилерни актуаллештирюв ве дер макъсадларыны къоюв

Оджа «Тылсымлы юзюк» масалыны окъуй, масалнынъ 1-инджи къысмындан сонъ берильген суаллерге джевап берелер.

5.Дерс мевзусы узеринде иш

Талебелер масалны роллерге болип окъуйлар, къараманларгъа характеристика берелер.

6.Раатлыкъ дакъкъасы

Ербучыкъ

Ербучыкъ айванчыгъы

(сагъ элинен сол къолуны омузындан башлап ашагъы сыйпаламакъ, сол къолунен сагъ къолуны)

Ёлакълы быджачыгъы

(къурсачыкъларны сыйпаламакъ)

Ербучыкъ эрте тура,

(эллер тёпеге узатыла)

Яначыкъларны юва,

(янакълар сыйпалана)

Ювасыны сипире,

(сипиргенде япылгъан арекетлер косьтериле)

Сонъра азбаргъа кете

(еринде адмымламакъ)

Бир-эки, бир-эки

(саде гимнастика киби къоллар четке ве тёпеге котериле)

Еринде де секирди.

(секириле)

Учь, дёрт, беш, алты

(гимнастика арекетлери)

Ербучыгъым болдурды.

(эки авучыны бирлештирип, сакъалына къоймакъ, яни юкъусы кельгенини косьтермек)

7.Дерс мевзусы узеринде ишни девам этюв

- Насыл масал къараманларыны билесинъиз? (Талебелер сербест шекильде джевап берелер.)

- «Тылсымлы юзюк» масалынынъ сонъу не оладжакъ? Насыл тюшюнесинъиз? (Талебелер сербест шекильде джевап берелер.)

Лугъат иши. Таныш олмагъан сёзлерни дефтерлерине язып алалар, оларнен сёз бирикмелер тизелер.

8.Дерснинъ нетиджесини чыкъарув

- Масал недир? (2-3 талебе сербест джеваплар бере.)

- Масаллар насыл сёзлернен башлана? (Бир заманда бар экен, бир заманда ёкъ экен.)

«Тылсымлы юзюк» масалынынъ къараманлары ким?

(Айшечик, бабасы, огей анасы.)

9.Рефлексия

Масалнынъ ады… ….

Дерсте «Тылсымлы … … ….

Масаллар «Бир заманда … ….

Масалнынъ къараманлары …, …, … .

10.Эв иши

«Тылсымлы юзюк» масалыны окъумакъ, къыскъадан икяе этмеге бильмек.