День нашей Республики

Адыгэ лъэпкъым и вагъуэ.

Адыгэ тхак1уэ,усак1уэ,еджагъэшхуэ,жылагъуэ лэжьак1уэ,филологие щ1эныгъэхэм я кандидат,КъБР-м щ1эныгъэмк1э щ1ыхь зи1э и лэжьак1уэ,Абхъаз республикэм культурэмк1э щ1ыхь зи1э и лэжьак1уэ Нало Заур къызэралъхурэ мы гъэм илъэс 90 ирикъуащ.

«Адыгэ лъэпкъым и вагъуэ» литературнэ пшыхьыр щек1уэк1ащ Налшык къалэ дэт 32-нэ еджап1эм.Нало Заур и творчествэм,тхыгъэхэм хуэгъэзауэ къалэ Администрацэм егъэджэныгъэмк1э и Департаментым иригъэк1уэк1а фестиваль –зэпеуэм кърик1уахэм теухуат ар.Зэ1ущ1эм и хьэщ1эхэу щытащ Нало Заурбий и къуэ Алим,Нало Хьэщауэ,Налшык къалэ Щ1ып1э Администрацэм егъэджэныгъэмк1э и Департаментым и унафэщ1 Бэрокъуэ Ахьмэд и къуэ Эдуард,егъэджак1уэхэр,еджак1уэхэр.

Пшыхьым кърихьэл1а псоми захуигъэзащ Бэрокъуэ Эдуард.Абы и псалъэхэм къызэрыхэщащи,Нало Заур узэрыгушхуэ хъун ц1ыхущ,адыгэпсэ зы1утрэ адыгэбзэр зыгъэбзэрабзэу псэуащ.Адэк1э пшыхьыр ягъэдэхащ еджак1уэхэм.Уэрэд дахащэхэр зыгъэ1уахэм ящыщщ К1эщт Айдэмыр (е 20-нэ еджап1э),Урыс Алан(е 12-нэ еджап1э),Лу Миланэ (езанэ гимназие) сымэ.Налом и усэхэм къеджахэщ Къуийц1ык1у Данизэ( 78-нэ сабий сад),Щоджэн Сэтэней(27-нэ сабий сад),Борий Саидэ(26-нэ еджап1э),Шэбаз Сальмирэ( е 11-нэ еджап1э),Быгуэ Руфания (32-нэ еджап1э).Нало Заур и тхыгъэхэр гъэщ1эгъуэну театру ягъэлъэгъуащ сабий садым я гъэсэн ц1ык1ухэм.Апхуэдэщ сабий сад е 13,30.Удимыхьэхынк1э 1эмал зимы1эт «Бжьыхьэ мэзым къыщыхъуар», «Мыщэхэм я къан» тхыгъэхэмк1э гъэхьэзыра хъуа теплъэгъуэхэр.Зи къафэ ек1ухэмк1э утыкур зыгъэдахэу пшыхьым хэтахэм ящыщщ ебгъуанэ,е 13-нэ,е19 еджап1эхэм я еджак1уэхэр.Икъук1э удихьэхрэ зэгъэк1уауэ,щ1эщыгъуэрэ бзэ дахэк1э зи лэжьыгъэр утыку къизылъхьа 32 еджап1эм и еджак1уэ Бэджы 1эминат псоми ягу къинэжащ.Усак1уэм теухуа къэхутэныгъэ лэжьыгъэмк1э абы япэ увып1эр и 1эрылъхьэ хъуащ,пшыхьым а и лэжьыгъэми щыгъуазэ дищищ1ыжащ.Илъэсым нэблагъэк1э ек1уэк1а зэпеуэм къыхэжанык1ыу увып1э нэхъыщхьэхэр къэзыхьахэм Ф1ыщ1э тхылъхьэр Департаментым къыбгъэдэк1ыу еджак1уэхэм иратащ Нало Алимрэ Нало Хьэщауэрэ.Зэпеуэм лэжьыгъэ хэзылъхьа дэтхэнэ зы егъэджак1уэми Департаментым хуигъэфэщащ щытхъу тхылъхэр.Пшыхьыр дахэу ирагъэк1уэк1ащ езанэ гимназием адыгэбзэмрэ литературэмк1э и егъэджак1уэ Махуэл1 Беслъэнрэ ебгъуанэ гимназием и епщ1анэ классым и еджак1уэ Хъуэк1уэн Алинэрэ.Пшыхьыр къызэзыгъэпэщар къалэ Департаментым егъэджэныгъэмк1э и Департаментым и методист нэхъыщхьэ,адыгэбзэр езыгъэдж егъэджак1уэхэм я унафэщ1 Л1ы1эщын Людэщ.

Махуэл1 Беслъэн,егъэджак1уэ.