Эдебиятымызнынъ къырым ханлыгъы деври

ЭДЕБИЯТЫМЫЗНЫНЪ КЪЫРЫМ ХАНЛЫГЪЫ ДЕВРИ (1428-1783)

Ашыкъ Умер.

Гъазель. Месневи.

Лугъат иши

• Мамлюклер* – арбийлер, арбий хызмет ичюн азырлангъан беяз тенли къуллар (невольные солдаты)
• Тахминлер – къарарнен (предположение)
• Такълид этмек – бирисине бенъземеге арекет этмек (подражать)
• Диван – мында: эсерлер топламы (сборник)
• Эль –къысса – ибрети шу ки (мораль басни)
• Харамийлер – хырсызлар, айдутлар ( разбойники)
• Бейит - экилик (двустишие)
• Назм - шиириет (лирика, поэзия)
• Махляс – тахаллюс, такъма ад (псевдоним)
• Тереннюм - макътамакъ (воспевать)

Орта асырлар эдебияты учь ёнелиште инкишаф эткен: диван, халкъ, диний эдебият. Оларнынъ эр бир язылышына коре озюнинъ мевзу ве шекиллеринен зенгин ве фаркълыдыр.

Диван эдебиятынынъ шекиллери: гъазель, месневий, къыта, къасиделер, мурабба, мухаммес, муамма, мустезат ве иляхре.

Халкъ эдебиятынынъ назм* шекиллери : къошма, семаи, тюркю, дестан…

Диван эдебиятынынъ энъ чокъ ишлетильген шекли гъазельдир.

Бу девирде иджат эткен Джанмухаммед, Ашыкъ Умер, Джевхерий, Исметий киби бир чокъ муэллифлер эдебиятымызнынъ инкишафына семерели иссе къоштылар.

• Гъазель* - шаркъ шиириетининъ диван эдебиятында энъ чокъ къулланылгъан шеклидир. Гъазель, бейитлерден тизильген ола. Бейитлернинъ сайысы 4-22 бейиткедже ола биле. Энъ чокъ къулланылгъан шекли 5-7 бейиттир. Адети узьре аа, ба, ва, схемада къафиелене. Гъазельнинъ сонъки бейитинде шаир озь «махлясыны» ерлештире. Гъазельнинъ мундериджеси чешит тюрлю ола биле. Амма эсас макъсады гузеллик , къадын гузеллигини, оларгъа олгъан севгини тереннюм этювдир.
• Мисаль: Абдульмеджит эфендининъ «Эй, гонъюль » гъазели. 8 бейиттен ибарет. Гъазель аруз везнинен язылыр.

• Месневий* – бу да шаркъ эдебиятынынъ чокъ къулланылгъан назм шеклидир. Месневи къараманий, фельсефий, дидактик ве лирик мевзуларда язылгъан буюк поэмадыр. Башкъа назм шекиллеринден фаркъы буюк колем ве къафиесиндедир. Эр бир бейит озьара къафиелене ве бир фикирни тамамлай.

Къафие схемасы бойле ола : аа, бб, вв, сс.

Мисаль ичюн Гъазаийнинъ «Долап» месневиси.

• Къыта* - диван эдебияты назмынынъ энъ кучюк шеклидир. Къыта да бейитлерден тизильген ола.

Бейитлернинъ сайысы 2 – 6 ола. Къафие схемасы : аб, вб, гб, кибидир. Фельсефий фикир юрютиджи , огретиджи характердеки кучюк эсердир. Мисаль : I Менъли Герайнынъ «Фыракъынъдын» сёзлеринен башлангъан къытасы.

АШЫКЪ УМЕР

(1621— 1707)

О, 1621 сенеси Къырымда, Кезлев шеэринде Абдулла Кендже огълу деген фукъаре эснаф къорантасында дюньягъа келе. Маалле мектебинде иптидаий бильги ала.

О, омюрининъ бир чокъ къысмыны Дагъыстан, Азербайджан, Иран, Сурие, Тюркиеде кечире. Истанбул, Бурса, Сакъыз, Варна, Багъдад киби шеэрлерни кезип чыкъкъаны акъкъын да онынъ шиирлеринде тасвир олуна.

Онынъ эсерлеринде ахлякъий , ашкъий (севги), дидактик, диний мевзулар тасвир олуна.

Омюрининъ сонъунда о, догъгъан шеэри Кезлевге къайта ве 1707 сенеси сексен алты яшында бу ерде вефат эте. Ашыкъ Умернинъ докъсан алты шиирден ибарет китапчыгъы 1894 сенеси Багъчасарайда Исмаил бей Гаспринскийнинъ «Терджиман» газетасынынъ басмаханесинде нешир олуна. Ашыкъ Умернинъ эки джылтлыкъ эсерлер джыйынтыгъы 1988 ве 1990 сенелери Ташкентте дюнья юзю коре.

Гъазель

Джиан ичинде сакът олмакъ керек инсан мунафыкътан,

Афсус ким не дер исе, келир джумле мунафыкътан.

Онынъ эткенине бакъма ки, баш душманынъ одыр, о!

Биль, ич гъафлет олмамакъ керек эр анъ мунафыкътан!

Не ола, иблиснен тенъештирсем-, сёзюмде янъылмам,

Мен, адам, дегиль де, бельки, шейтан къачар мунафыкътан.

Насиаттыр, меним бу сёзюмни эшитип синъдиресинъ джана,

Гъает сакът олмакъ керек, шу дост корюнген мунафыкътан.

Айттыгъы лафынъдан, Умер, меним анъладыгъым шу ки,

Ялынъыз олюмин истесин душман шу мунафыкътан.

Что-то с миром случилось: в нем нету покоя, Благородство и честность пропали куда-то, Справедливость исчезла – ведь время такое, Что никто не жалеет ни друга, ни брата. Все кичливыми стали, а чем тут гордиться, Если в душах одна лишь жестокость таится? Все к наживе и роскоши стали стремиться, Забывая о сердце, – какая утрата! Совершенство в нужде, а ничтожество в славе. Торжествует любовь лишь в богатой оправе, Но, Омер, ведь на Бога пенять мы не вправе, Люди сами в несчастьях своих виноваты.