Эссе "Мон - тонафтыян"

Эссе «Мон –тонафтыян»

Тонафты! Кодама валда, лямбе валсь. Сонь эздонза яфоди и шабань пеедема и тядянь кельгома. Кода сотнеф монь эряфозе мархтонза?

Мес мон тонафтыян? Сяс мес тонафтыкс арьсеньулемс шабакскиге, снярда, мзярда тонадонь морафтома и тяштема!? Мзярда улень ёмла, то

« школаса налхксемась» ульсь сембода цебярь налхкшекс!? Аф…

Улемс тонафтыкс- монь видекизе! А вдь ульсь и стама пинге, мзярда ащень кафта ки ёткса: тонафты и бухгалтер. «Стирняй, арьсек лацкас!»,-корхнесь тядязе. Мон арьсень и … колмогемонь киза ни аськолян виде янняван. Мзяра киза ётась, но вестеньге ашень апряка прязень, месс кочкайне тя кить.Эрь шиня лангозон ваныхть идень пиндолды сельмот. Партатнень вакса озадот Россиять тячиец и вандыец.

Улемс васенце учителькс – аф тёждя, вдь мон васенцекссь няйса шабать вандыень эряфонц: сельмосонза цятконят, лездан, няфтьса кальдявть и цебярть- и сон муссы эсь вастонц эряфса сай пингста, а аф няемок, ётамок вакска- шабаське кяшендезь аськоляй эряфонь киге. Аф эряви лацсемс тонафтыень профессиять лиятнень мархта: кшинь панить палы кшиц- пингонь ётазь лия пани; кудонь марайсь аф ста путсы кевонц- явфтсы и путсы видеста. Аньцек тонафтыть сатфксонц учема : аф фкя част, аф фкя ков, а лама киза. Эльбятьксоц аф видептеви. Минь эльбятьксоньке сембода стакат, конат таколфтсазь и пичефтсазь ёмла шабанять.

Мумс фкя кяль иттнень мархта и аф люпштамс синь мяльснон – эрявиксозе шабатнень мархта покодемста. Тиян станя, штоба шабатнень мархта шарьхкоделеме фкя-фкянь, маладомс шабатненди синь содамошиснон коряс; тонафтомс азома эсь мяльце, няельхть эздон аф аньцек тонафты, но и ялга, ялга, конац лезды, кулхцонды эсост и кельги. Да, тонафтыти эрявихть кельгомс иттне, аньцек тяда меле синь тонафтомс. А мезс тонафтомс? Тонафтомс кельгомати!

Мон мокшан, корхтан мокшекс, арьсян мокшекс. Аф фкя киза тонафтан иттнень кельгомс тядянь-алянь кяльть, аф юкстамс мокшень койхнень и обуцятнень. Тядянь-алянь кяльсь, кода арьсесь К.Ушинскяй, тя арьзяня, коса ванфтовихть ломанть лама юронь сатфксонза, содамошинза. Арьзяня, конац кизода кизос коль пяшкотькшни. Тядязе - фкя, фкя и кялезе. Тядязе макссь тейне эряф, кяльсь-панчсь ки содамошитненди. Эсь тонафниененди корхнян, што сембода тёждя канкссь –тя содамошитне, конат кочкафт покодемста.

Монь кялезе - сюреса сёрмадомась. Сюреса сёрмадомать юронза туйхть ичкози сире пинкненди, но тяниень пингтевок аф юкстафтся тяштенятне, конатнень мархта ломаттне щназь перьфпяльть. Эсь щамснон наряжакшнезь шинь, модань, ведень, толонь, эряфонь шуфтть, шумбрашинь тяштеняса, надиясть ,што синь ванфтсазь кальдявда. Ваномок сёрматфти аф курокста синь шарьхкодевихть. Тя шарьхкодемати мон и тонафтсайне иттнень.

Сюреса сёрмадомась кемоста сотнеф мокшень мороть мархта. Идькс пингста кивок марьсень мокшень морот: морась щавазе кштирьдембачк, кайгсть тядязень сидеморонянза эряфть колга, салаваня кулевсь алязень мороц покодемшовор. Монга старандан шабатнень мархта морамс синь.Вдь морхнень кяльсна тя ару мокшень кяльсь, коса валсь и морсь шачихть и эряйхть марса ёфкснень, легендатнень мархта. Сяс и мокшень кялень урокнень эса ушеды марявома кяльсь морокс.

Тяниень иттнень эряфста нардафт атянь - бабань содамашитне, конат тонафтсть кельгомати, обуцятненди, койхненди. И тячи киге аф атказай сянь эзда, што мокшень урокне максыхть лама сатфкс тонафнити. Мон арьсян, эрь шабати эряви содамс эсь кяленц. Минь школасонк тонафнихть аф аньцек мокшень шабат, но и русскяйхть и чувашскяйхть. Пяк пара ся, мзярда мокшень кялень канни шабатне содасазь лия национальностень койхнень, обуцятнень и кяльть.

Мокшень кяльсь - сёрмадыхнень кяльсна. Лама сёрматфсна ётафтф рузонь кяльс. Кода пара мялезон ульсь, мзярда рузонь шабатне азондыхть мокшень ёфкст, чувашень – морайхть мокшень морот, а мокшень иттне азондыхть и морайхть рузонь кяльса. Мон арьсян, што тяфтама урокне тонафтыхть иттнень кельгомс и ванфтомс аф аньцек эсь койснон, но лия национальностень.