Эссе Сабаевой В.Ф. на тему «Мои методические находки»

Эссе на тему «Мои методические находки» («Монь методическяй вешфксоне»).

Школаса мокшень кяльсь, кода учебнай предмет, занци оцю васта. Сон тонафневи сянкса, штоба маштомс цебярьста арьсема и корхтама, штоба сяда тов содамс литературнай кялень корхтамань норматнень, штоба анокламс культурнай, сембе ширде содай ломатть, максомс тейст мокшень литературнай кяльса морафтомань, корхтамань и сёрмадомань содамошит. И ня содама и маштома шитне нолявольхть тевс ученикнень эрь шинь тонафнемань и работамань тевсост. Мокшень кяльть тонафнемста шабатненди эряви макссемс разнай цель мархта работат школьнай

орфографическяй словарть коряс. Эряви вешемс, штоба эрь учениксь тиель словарь. Цебярь результатт кармайхть улема, кда учительсь кармай лац содама тя или тона велеть корхтамань особенностензон, кармай ванома

ученикнень видеста корхтамаснон мельгя, тонафтсыне синь эсь корхтамаснон и ялгаснон корхтамаснон тяшнема.

Штоба иттнень козякофтомс аф аньцек корхтамаснон, но и содалезь мезе тиендеви мирть эса.

Учительхне лама материал сявондихть мокшень книгатнень, журналх-нень и газетатнень эзда. Но мекольдень пингть няеви, кода «эсь» родной кяльсь кеподсь. Появакшнихть, и методическяй, и лия лама материал, кона лезды учительти покодемста.

Лама аф эряви корхтамс мокшень кяльть оцю эрявксшинц колга. Эрь

ломанць шарьхкодьсы, што родной кяльть апак содак, аш кода улемс

грамотнай ломанькс.

Мокшень кяльть тонафнемац – тя пяк оцю тев. Инь оцю сатксфне

ломанть мысляса, инь кържа содамашитне и самай пламеннай чувстватне

лядыхть апак содак, кда синь шарьхкодевиста и точнайста апак аст валса.

Кяльсь – инь эрявикс и пяк кунардонь общественнай явления. Сон ванфтсы пачфтьсы сянь, мезе ульсь народть эряфса, вельденза азондови сонь ётаф киц. Родной кяльсь лезды касфтомс тонафнихнень патриотизмань духса, формировандамс мировоззренияснон.

Родной кяльть цебярьста содамац лезды рузонь кяльть тонафнеманцты, лац шарьхкодемс сонь грамматическяй стройнц, сонь козяшинц, вийнц.

Монць работан Ельниковскяй райононь Каньгушанскяй общеобра –

зовательнай средняй школаса. Основной проблемась работасон – тя корхтама маштомань касфтомась мокшень кялень и литературань урокнень эса. Эсь тевсон ванондан разнай корхтама маштомань касфтомань работань витт:

сочиненият, изложеният, картинань коряс сочиненият, сочиненият няйфть коряс и лият.

Сочинениятне тонафнесазь иттнень правильнайста корхтама. Тяса синь сермадсазь эсь арьсемаснон. Источникокс уленди собственнай переживаниясна, ваномасна, картинатне, книгатне. Сочинениятне касфтсазь иттнень культураснон, формировандасазь мировоззренияснон, эстетическяй и нравственнай взглядснон.

Сочинениятнень лангса работась пяк стака. И мекольдень пингть тянь лангс шарфнихть пяк оцю мяль.

Кодама содамошит и навыкт эрявихть ученикненди сочинениянь сёрмадомста?

1. Маштомс шарьхкодемс темать, сонь границанзон, маштомс панжема сочинениять теманц. Ученикти эряви содамс, мезе няфти эрь валсь.

2. Маштомс пачфтемс эсь арьсематнень основной мысляти.

3.Эряви маштомс сичинениятненди материалонь кочкама. Сяс мес тяста кармай няевома сонь содержанияц.

4. Маштомс тиемс материалть системас коре.

5. Маштомс правильна и цебярьста азондомс эсь арьсемаснон.

6. Правильна тонафтомс иттнень литературнай кяльти.

Оцю васта корхтамать касфтомасонза занцихть картинать коряс сочинениятне. Иттне пяк кельксазь картинань ванондомаснон. Картинатне касфтсазь аф аньцек арьсемаснон, но и чувстваснон, пяк оцю лезкс максыхть воображенияснонды. Тя сочинениятне тонафнесазь иттнень краеньконь кельгома, ляйньконь, пандоньконь, виреньконь, луганьконь мазышиснон, родной кяльса сёрмадомань и корхтамань культураснон.

Картинать лангса работать ушеткшнесан аф оцю беседаста. Беседась эряви сянкса, штоба кеподемс иттнень интересснон. Повфтаса картинать и мярьган иттненди внимательнайста ваномс. Картинать ваномац – тя самай ответственнай вастсь. Инголи ученикне ванондсазь картинать эсь пачкаст. Тя пингть синь марнек сявсазь картинать содержаниянц. Аделсеви картинань ванондомась шабатнень нюрьхкяня замечанияснон мархта. Монь задачазе стама, штоба иттне няелезь аф общай вастонц, сюжетонц, но и сембе подробносттнень, конатнень мархта тиендеви художественнай образь. Эста иттне аньцек шарьхкодьсазь сембе содержаниянц и идеянц. Тяфта картинать разбирандамац касфтсы иттнень словарнай запасснон, мезьфтома синь аф маштыхть няйф картинать колга эсь чувстваснон и арьсемаснон азома. Картинать шарьхкодемда меле ветян сянди, штоба иттне азондолезь содержаниять последовательнайста. Тянкса тиендеви план, кона арьсекшневи марса класса.

Корхтама маштомать касфтоманцты лездыхть ванфонь сочинениятне. Тяфта сочинениятнень лангса работась ушеды аф картинать коряс, а предметтнень мельгя ванондомась.

Старандан кочкамс стама тема, коса ба иттне улельхть заинтересованнайхть и коса можнат ветемс марстонь наблюденият. Сяфтяма тяфтама тема: «Пяярихть лопатне». Штоба организовандамс марстонь наблюденият, эряви максомс иттненди стама кизефкст, конатненди синь аф маштыхть отвечама, кда аф тиихть наблюденият. Можна максомс тяфтама кизефкст «Пяярихть лопатне» темать лангс.

1. Кодама шуфттнень лама лопадост, а конатнень сяда кржа?

2. Кодама тюссна лопатнень сёксенда?

3. Кода няевихть лопатне пиземонь пингть?

4. Кода прашендыхть лопатне модать лангс сетьме погодаста и вармань пингть?

5. Кодама шуфтонь лопатне тейть сяда мялезт и мес?

Ученикне тяштьсазь ня кизефкснень и тиендихть наблюденият. Наблюдениянь релультаттнень тяштьсазь тетрадезост. Меле ня результаттнень ванцаськ марса. Анализонь тиема пингть няфтеви, што лопатнень пяяремасна азондови разнай валса. Азса, штоба лацкас арьсельхть сочинениять ушетксонц лангса. Кулхцондсайне иттнень аф фкя лацонь наблюденияснон. Ученикне видеста няфтьсазь сочинениять теманц. Тя материалть коряс тяштихть сочиненият.

Наблюдениянь планць лия сочинениянь планть коряс. Наблюдениянь планць макссеви монь лезксозень вельде. Старандан тонафтомс иттнень планонь сёрмадома. И психолокне корхтайхть, што ученикнень эсь арьсеф планцна максы сяда цебярь сатфкс сочинениянь тяштемста. Синь тяштихть пяк цебярь сочиненият, конат пяшксет сравненияда, метафорада, антонимда и стак тов.

Оцю васта урокса занцихть эсь переживанияснон коряс сочинениятне. Тяфтама сочинениятне улендихть эряфонь опытснон лангс, эсь наблюденияснон коряс. Тя может улемс описания мезе няйсь, мезе кульсь учениксь. Сочинениятненди, конатнень основаснонды арасть набдюдениятне, материалкс может улемс эпизодсь, конань няезь иттне, няезь экскурсияса или колендемста, или эрь ученикть эсь впечатлениянза.

Кепотьксонди: «Кудса лезксозе» темать коряс. Ученикне сёрмадсазь афкуксонь историять, конань няезь или ризфтозь. Тяфтама сочинениятнень сёрмадсазь апак аноклак. Ученикне тяштихть сочиненият стама наблюдениянь или явлениянь колга, конат ламоксть няфневихть или няендевихть. Кепотьксонди, кода синь лездыхть кудса, кода дежуряйхть класса, кодама тефт тиендихть школьнай переса. Тяса ученикне тонафнихть материалть обобщандама.

Урокть ушедса тяфта: азса темать и кизефтсайне иттнень, кодама случай эряфстост синь мяляфтыхть. Азондыхть лама случайхть.

Арьсесть лацкас, азондость самай эрявикс пинкнень и сънярда лиси шарьхкодеви азкс. Меле ушедыхть ученикне сёрмадома.

Корхтама маштомать касфтоманцты лездыхть изложениятне. Синь улихть синцень задачасна. Васенце особенностекс ащи ся, што изложениятнень сёрмадомасна тонафнихть видеста, кърхкаста азондомс аф эсь арьсемаснон, а конат азонтфт азксса, статьяса, басняса. Омбоце особенность литературнай образецнень коряс иттне тонафнихть валрисьмонь строяма, мумс эрявикс валхт и маштомс тевс ноляма разнай изобразительнай средстват. Иттне азсазь геройть колга эсь арьсемаснон. Мон тонафтсайне планонь тиема. Планть лангса тевсь ётафневи фкя пингста содержаниять корхтамста. Васенцеда морафтомда меле ванца, кода шарьхкодезь содержаниянц. Разбирандасаськ и арьсетяма план. Омбоцеда морафтса аф оцю пяльксонь. Эрь пяльксти титяма разбор, кизефкснень лангс отвечакшнезь. Меле мярьган арьсемс основной корхтамать колга и максомс заглавия пяльксти. Эрь учениксь апак корхтак сёрмадсы эсь арьсеф заголовканц. Кафта - колма ученикт морафтсазь эсь арьсемаснон. Аф видетнень сембе классть мархта петнесаськ.

Свободнай темас коря сочиненият сёрматфнян оцю класснень эса тонафнихнень кядьста. 10 – 11 классонь ученикнень кядьста – сочиненият – рассужденият морально – этическяй темань коряс. Темат кепотьксонди.

1. Кода улемс афкуксонь ломанькс?

2. Кода улемс (арамс) надияма вастокс шачфтыенди – касфтыенди (тядянди -

цебярь цёракс или стирькс?

3. Мазышись араласы эряфть и стак тов.

Ужяль, што мекольдень пингть школасонк ашт ня классне.

Корхтамань маштомань касфтомань урокста ётафнян диктатт.

Кепотьксонди: существительнайть тонафнемста ётафнян тяфтама диктатт:

1. Максф существительнайхнень сёрмадость прилагательнай мархта.

Корабль, алаша, эске, апрель, валкс, цель.

2. Ня валхнень эзда тиемс валзюлмот и сёрмадомс синь.

Пизем, инструмент, узерь, пря, розь, ки, эряма, портрет, писатель, вал, учитель, книга.

3. Максф валзюлмотнень эзда тиемс валрисьмот станя, штоба лисель азкс и лият.

Кялень корхтамать касфтоманцты важнай этапокс эрьси рузонь кяльста родной кяльс текстонь ётафтомась. Тя лезды сянди, што ученикне цебярьста кармайхть содама эсь родной кяльснон и рузонь кяльть.

Кяльть тонафнемста оцю мяль шарфнян нинге предметтнень мархта сотксненди. Сембода кемот ня сотксне кяльть и литературать ёткса, сяс мес кяльть тонафнемста дидактическяй материалсь сявондеви васендакиге художественнай литератураста. Корхтама маштомать касфтомаса ламоц работатневок фкат литературать мархта (сочинениятне, изложениятне, азксне, рецензиятне и стак тов.)

Корхтамань касфтомань коряс работась келептьсы ученикнень общай кругозорснон. Эрямась моли инголи, кизоста кизос лиякстоми, сянкса учительти эряви улемс фалу сотф эряфть мархта, штоба касфтомс сембе ширде развитой, пара седи ломатть.

Аноклазе:

мокшень кялень

и литературань

тонафтысь

Сабаева В.Ф.