Evelki zamannarda gagauz karıların eceli

Evelki zamannarda gagauz karıların eceli

Evel gagauz karıların eceli pek zormuş. Onnar sıkı baalı halkın yaşamasınnan. Yazıcılar herzaman göstererlär аdamın güçlüünü hem karının haksızlıını.

Sevinmeliksiz küçüklük hem aar iş gagauz karıların bahtıymış üzlärca yıl olurmuş. Karılar çalışarmışlar kırda, käär iki cannı da olarak.

Uçsuz kenarsız acı duyulêr büük yaşlı karıların aklına getirmeklerid ä onnarın şenniksiz genclii için, açan onnar zor yaşamak sebepinä görä yoktu nicä korusunnar kendi uşakların yaşamalarını. Kırda aar iştän kaarä karının başına kalardı bütün evdeki işlerin ükü : ruba dokuması, çorbacılık, uşak büütmesi hem hayvan bakması. Karılar o vakıt taa zanaatlanarmışlar ölä işlärlän nicä yapaa ditmäk, pala dokumak.

Bakmayarak hepsi bu zanaatlara, karının zaameti paaya koyulmazmış, onuştan onnarı cümnedä hiç saymazmışlar.

Gagauz karının yaşamasında haksızlık hem aşaalamak belli olarmışlar taa onun duumasından. Kız durarmış en alçak uurda, hem sayılarmış, ani o becerer sade ev içindä uygunnuk yaratmaa. Küçüktän taa izmettä, ev işlerindä.

Genç kızın durumu pek önemliydi, açan onu everärmişlär. Kendi ecelini gagauz kızları yokmuş nica kendibaşına seçsinnär. Kız evermesindän sora ayledä olurmuş çok baarış, kötü davranmak hem karıya el kaldıması .

Evlendiynän, karı baalı olarmış diil sade adamına , ama adamın anasına-bobasına da. Eer o kaybettiyseydi adamını, karı yokmuş nicä saabi olsun ne çorbacılıına, ne dä kendi ecelinä. Adamın anası hem bobası karar verärmişlär, kimä karıyı evermää enidän.

Gagauz kızlarında yoktu hak olmaa üürenilmiş. Siirek kimdä varmış kısmet üürenmää başlankı klaslarda da.