Федор Кузьмич Попов.

Федор Кузьмич Попов.

Бүгүн, Ахсынньы 8 күнүгэр, сахалартан бастакынан Сэбиэскэй Сойуус дьоруойун аатын ылбыт Федор Кузьмич төрөөбүт күнэ.

Олоҕун олуктара.

Федор Кузьмич Попов 1921 сыл Ахсынньы 8 күнүгэр Мэҥэ Ханалас улууһугар Иккис Баатара нэһилиэгэр Поповтар дьиэ кэргэнигэр сэттэ оҕоттон алтыс соҕотох уол оҕонон күн сирин көрбүтэ. Аҕата Кузьма Сомсонович оҕолорун кыра эрдэхтэринэ үлэҕэ-хамнаска үөрэтэн-такайан улаатыннарбыта. 1930 сыллаахха Октябрь колхуоска дьиэ кэргэнинэн үлэлии киирбиттэрэ. Сүөлэр 9 саастааҕар улахан дьону кытта тэҥҥэ үлэлиир буолбута.

1931 сылаахха, 10 саастааҕар оскуолаҕа киирбитэ. Алааһыттан 9 км. ыраах сиргэ сатыы баран үөрэнэн кэлэрэ. Үөрэҕин таһынан Сүөдэр дьиэ ис-тас үлэтигэр дьонугар илии-атах буолара. Кыһынын үөрэнэн, сайынын колхуоска үлэлиирэ. 1936 сыллаахха 5 кылааһы бүтэрэн баран аҕата ыараханнык ыалдьан оскуолатыттан тохтообута, уонна колхуоска күүстээх күүстээх үлэтин саҕалаабыта. 1937 сыл кыһыныгар Сүөдэр үлэтин таһынан бииргэ үлэлиир дьонун сүүрбэ киһини ахсаан ааҕарга уонна суруйарга үөрэппитэ. 19 сааһын туолбутун кэннэ 1940 сыллаахха өр сылларга үлэлээбит Октябрь колхуоһугар биригэдьииринэн талыллар. Сүөдэр наһаа ирдэбиллээх, эппиэтинэстээх, үлэһиттэрин кытта өрүү тэҥҥэ сылдьар буолан, үчүгэй салайааччы хайҕабылын ылбыта.

Сэриигэ кыттыыта.

1941-1942 сылларга кыһын аармыйаҕа барар саастаах уолаттар военкомат иһинэн тэриллибит куруһуокка нуучча тылын үөрэппиттэрэ. Аармыйаҕа 1942 сыл Бэс ыйыгар Мэҥэ Ханалас Оройоннааҕы военкомаатынан ынырыллан барбыта. Хонуу биригээдэтин салайааччытынан кини быраата Петр хаалбыта.

Пермь куорат аттыгар кылгас кэмнээх автоматчиктар куурустарын үөрэнэн бүтэрбитэ. Сэриилэһэр аармыйаҕа тиийэн 61-с аармыйа 81-с стрелковай дивизиятын 467-с стрелковай полкатын 1-кы батальонун 3-с ротатын байыаһа буолбута. 1943 с. Алтынньы 1 күнүгэр Глушец диэн дэриэбинэ аттыгар биир бастакынан Днепр өрүһү туораан тахсар. Өстөөх трансшеяларыгар биир бастакынан ыстанан тиийэн илиинэн охсуһуу кэмигэр пулеметтарын былдьыыр.

Бу охсуһууга 23 ниэмэс саллаатын уонна офицерын охтотор. Уонунан ааҕыллар өстөөхтөр хос атаакаларын төттөрү охсор. Бэйэтин подразделениетын өрүһү туоруурун хааччыйар. Бу кэнниттэн уонча күн буолбут быыстала суох кыдыйсыыларга 70 ниэмэһи өлөрбүт.

Бу сылдьан ыараханнык бааһырар уонна 1943 сыл Алтынньы 13 күнүгэр госпитальга өлбүт. Белоруссия Гомель уобалаһын Лоев оройуонун Деражичи дэриэбинэтигэр көмүллүбүт.

СССР Үрдүкү Сэбиэтин Президиумун 1944 сыл Тохсунньу 15 күнүнээҕи Ыйааҕынан байыаннай сорудахтары көрдөрүүлээхтик толоруутун уонна өстөөхтөрү кытта кыргыһыыларга хорсун, дьоруойдуу быһыытын иһин кыһыл армеец Попов Федор Кузьмичка өлбүтүн кэннэ Сэбиэскэй Сойуус дьоруойун аата иҥэриллибитэ.

ӨЙДҮҮБҮТ! СҮГҮРҮЙЭБИТ! МАХТАНАБЫТ!