Հնագույն կերպարվեստ

Գեղարվեստորեն ձևավորվել և զարդերով են օժտվել բրոնզից ձուլված դաշույնները և այլ գործիքներն ու զենքերը։ Գեղարվեստական մետաղագործության հոյակապ և ինքնատիպ գործ է Վանաձորի դամբարանաբլուրում հայտնաբերված ոսկյա թասը, որի վրա դրվագված են դեմ դիմաց կանգնած վեց առյուծ։ Առյուծները թեև սլացիկ, դինամիկ ձևեր չունեն, բայց ընդհանուր տեսքով և բաց երախներով արվեստի արտահայտիչ գործեր են։ Դամբարաններում հայտնաբերվել են նաև գեղարվեստական ձևավորմամբ արծաթե իրեր, անոթներ, գունազարդ սև փայլեցրած կավանոթներ, ոսկուց, սարդիոնից և այլ քարերից պատրաստված ուլունքներ։ Եթե արվեստը զարգացման առավել վաղ փուլերում կրել է միասնական ընդհանուր բնույթ, ապա այս շրջանում այն տարաբաժանվել է․ երևան են եկել արվեստի առանձին ճյուղեր, բնագավառներ։