Հնագույն կերպարվեստ

   Արվեստի հրաշալիքներ են Լճաշենի, Լոռե բերդի դամբարանների, Արթիկի, Տոլորսի և այլ վայրերի պեղումներով հայտնաբերված ցուլերի, այծերի, եղջերուների, թռչունների բարձրարվեստ և ինքնատիպ ձուլածո արձանիկներն ու պատկերները։ Բարդ կաղապարներով են ձուլվել Լճաշենում, Լոռե բերդի դամբարաններում և այլ վայրերում գտնված ռազմակառքերի մանրակերտները, կառքին լծված ձիերի և ռազմիկների պատկերներով։ Արվեստի այս նշանավոր գործերը ստեղծվել են ստեղծագործական երևակայությամբ, մեծ շնորհքով և հնարամտությամբ։ Բրոնզից ձուլել են նաև գեղարվեստական ձևավորմամբ գործիքներ, զենքեր, դաշույնների բռնակներ, շեղբեր և պատյաններ, ձիասարքի և ռազմակառքերի մետաղե մասեր, բրոնզե, ոսկյա և արծաթյա ապարանջաններ, թռչնաձև և այլ տիպի կախիկներ ու զարդեր։