Холболто_7 класс

Хараалагдаhан түсэбөөр «Холболто» гэhэн сэдэбтэ 5 саг (4+1) үгтэнэ, энэ түрүүшын хэшээл болоно. Янзань: шэнэ сэдэб үзэлгэ.

7-дохи класста һуралсалай программаар мүнөө туһалагша хэлэлгын хубинуудые үзэжэ байна. Дахуул үгэ үзөөбди. Холболто гэһэн сэдэб һурагшадта һонирхолтойгоор заажа болохо гэһэн зорилго нэн түрүүн урдаа табяаб. Юугээр анхаралыень татахаб, яажа ойлгуулбал, һайнаар хадуужа абаха гээшэб г.м. асуудалнуудта харюу бэдэрээб. Тиигээд метапредметнэ харилсаан дээрэ сэдэбэйнгээ саагуур үргэнөөр бодомжолуулха гэжэ оролдооб. Акростих гэһэн шүлэг зохёолгын арга тон һайшааагдаа. Эхилээд уншахада, шүлэг һурагшадта хүндэшэгөөршье үгтөө һаань, удха дээрэнь хүдэлүүлхэдэ ойлгосотой болоод үгэнэ гэжэ һананаб. Иимэ арга бии юм байна гэжэ үхибүүд һонирхоо.

Хэшээлэй гол зорилго: Холболто тухай ойлгосо үгэхэ.

Шиидхэхэ асуудалнууд:

а) Һургалгын: «Холболто тухай ойлгосо» гэhэн сэдэб үзэлгөөр hурагшадай ажаябуулга эмхидхэжэ, тусхай дүнгүүдые гаргаха; мэдүүлэлнүүд соо тэдэниие зүбөөр хэрэглэхэ дадал  шадабаритай болгохо.

б) Хүгжөөлгын: hурагшадай үгын нөөсэ баяжуулха, анхарал, ухаан бодолгыень хурсадхаха; холбоо хэлэлгыень, hанал бодолоо дамжуулха шадабарииень хүгжөөхэ.

в) Хүмүүжүүлгын: hурагшадай хэлэ баяжуулха, түрэл хэлэндээ дурлажа, hонирхон үзэхыень хүмүүжүүлхэ. Буряад орондоо, түрэл нютагтаа дурлал хүмүүжүүлхэ. Хүнүүд бэе бэетэеэ зохидоор харилсаха ёһонууд тухай хэлсэхэ.

Оньhото харилсаанай болон бусад хэрэгсэлнүүд: компьютер, интерактивна самбар, презентаци, һуралсалай ном, ажалай хуудаhан, гар утаһанууд.

ФГОС-ой эрилтэнүүдые хараадаа абажа, һурагшадай юрэнхы шадабаринуудые хүгжөөхэ шухала:

һурагшадай өөрын хүгжэлтын: өөрынгөө, суг hурагшадайнгаа хүдэлмэри шалгаха, сэгнэлтэ үгэхэ, хүнүүдэй хоорондоо харилсаха журам сахиха, бэе бэеэ хүндэлхэ, харилсаанда хабаадаха, оршон тойронhоо абаhан мэдэсэеэ онсодхохо, өөрынгөө һанал бодол хэлэжэ һураха, баримталха.

Бэеэ гуримшуулаад ябалгын гү, али регулятивна: өөһэдөө хэшээлэйнгээ зорилго табижа шадаха; юу хэхэ гээшэбибди гэжэ уридшалан хэлэхэ, багшын хэhэн түсэбөөр, алгоритмаар хүдэлжэ шадаха, дүрим-тобшолол гаргажа hураха.

Оршон тойрониие шудалалгын: суг һурагшадтаяа хамта дүн гаргаха, үгөөр хэлэ. гдэhэн ойлгосо схемээр харуулха, үгтэhэн материал нэгэдхэжэ, тобшолол хэхэ.

Харилсалгын: Багша ба суг һурагшадтаяа эдэбхитэйгээр, эб хамта харилсаха.

Дээрэ хэлэгдэhэн зорилгонуудаа бэелүүлхын тула хэшээлэймни шэнэ мэдэсэ үзэлгын хуби иимэ 3 шататайгаар зохёогдоhон байна:

– Эмхидхэлэй шата.

– Шэнэ сэдэбтэй танилсалга.

– Yзэжэ байhан сэдэбээ гүнзэгыгөөр hонирхон хадуулга.

Һурагшадай үгын баялиг үргэдхэхэ, анхарал, ухаан бодолгыень хурсадхаха, холбоо хэлэлгэ ажаглажа, hанал бодолоо дамжуулха шадабари хүгжөөхэ талаар элдэб түхэлэй даабаринууд дүүргэгдээ:

– дүримөө гаргалга;

– мэдүүлэлэй гэшүүдээр шүүлбэри хэлгэ (холболтонуудые зүбөөр зуралга, үүргыень тодорхойлолго);

– интерактивна даабаринуудые дүүргэлгэ;

– зохёохы хүдэлмэри дүүргэлгэ;

– тобшолол хэлгэ.

Юрэнхыдөө хэшээлэй ябаса яһала һайн зэргэдэ байгаа. Элдэб янзын ажаябуулга hэлгэгдээ, hурагшадай наhанда тааруулагдаа.

Бүрилдүүлhэн сэгнэлтэ хэрэглээб: багша үгөөрөө сэгнэнэ, үхибүүд табигдаhан эрилтээр кьюар кодоор орожо, сэгнэлтын хуудаhан соогоо фразеологизмуудаар өөрыгөө сэгнэнэ. Оролто хэшээл дээрэ иимэ сэгнэлгын арга хэрэглэхэдэ таарамжатай гэжэ һанагдана. Һурагшад хэшээлдээ эдэбхитэй хабаадаа, үрэжэлтэйгөөр хүдэлөө.

Бэеэ амаруулха зай хэшээлэй удаадахи шатада оруулха холбоон боложо үнгэргэгдөө.

Хэшээлэй эхин шатада табигдаhан зорилгонууд 15 минутын болзор соо бэелүүлэгдэбэ гэжэ hананаб.