Խոսքի մասերի ուսուցումը

Հարգելի գործընկերներ, Ձեզ եմ ներկայացնում խոսքի մասերի ուսուցումը արդյունավետ դարձնելու իմ փորձը: Ուրախ կլինեմ, որ Դուք էլ կիսվեք Ձեր փորձով՝ այդպիսով փւխադարձաբար օգնելով միմյանց:

Օրվա դասի պլան

Առարկան՝ հայոց լեզու

Դասարանը՝ յոթերորդ

Թեման՝ Խոսքի մասերի դասակարգումը՝ ըստ արտահայտած քերականական հատկանիշների:

Մեթոդները՝ Մտագրոհ, Խճանկար, Փոխանցումախաղ

Դասի ընթացքը

Կազմակերպչական մաս - 2 րոպե

Խթանում ՝ 5-7 րոպե

Դասը սկսում ենք «Մտագրոհ» մեթոդով՝ արդյունքում խմբավորելով խոսքի մասերը՝ ըստ արտահայտած իմաստի և քերականական հատկանիշների:

Իմաստի ընկալում. 20-25րոպե

Կատարել «Խճանկար» վարժությունը (10-13 րոպե ): Դասարանը բաժանել 3 խմբի, յուրաքանչյուր խմբին տալ փոքրիկ թերթիկների վրա գրված բառեր: Յուրաքանչյուր խումբ բառերից պետք է ընտրի համապատասխանաբար նյութական, քերականական և վերաբերմունքային իմաստ արտահայտող խոսքի մասերին պատկանող բառերը և դասավորի այբբենական կարգով: Աշխատանքը ավարտելուց հետո թերթիկները ամրացնում են իրար ու շրջում: Եթե առաջադրանքը ճիշտ է կատարված, հակառակ կողմում կստանանք տվյալ քերականական հատկանիշի սահմանումը: Այնուհետև խմբերից մեկական աշակերտ գրատախտակի մոտ ներկայացնում է աշխատանքը:

Կատարել դասագրքի վարժություններից: (10-12 րոպե):

Կշռադատում ՝ 5-8 րոպե

Կատարել « Փոխանցումախաղ» վարժությունը:

Դասարանում նոր խմբեր ենք ձևավորում՝ 3 խումբ: Գրատախտակը բաժանում ենք 3 մասի՝ վերևում գրելով նյութական, քերականական, վերաբերմունքային: Յուրաքանչյուր խմբից մեկը մոտենում է գրատախտակին, գրում մեկ բառ՝ տվյալ քերականական խմբին վերաբերող, այնուհետև կավիճը փոխանցում է ընկերոջը և այսպես շարունակ: Հաղթում է այն խումբը, որը ավելի շատ ու ճիշտ բառ կգրի սահմանված ժամանակում:

Ամփոփում և գնահատում ՝ 3 րոպե: