Классный час на тему: "Алиме Абденнанова. Герой России".

Сыныф сааты

МБОУ «СОШ №5», 1-В сыныф.

Оджа: Сеитасанова Лиля Экеремовна.

Мевзу: «Къырым къызы Алиме Абденнанова».

Макъсат: талебелерге Русие, Къырым къараманы акъкъында малюмат бермек, онынъ терджимеиалынен таныштырмакъ, балаларгъа ватанперверлик дуйгъуларыны ашламакъ, агъзавий нуткъуны инкишаф этмек.

Нетиджелер: талебелер халкъ къараманлары акъкъында бильги алалар, ана тили огренюв севиеси арта, агъзавий нуткъу инкишаф этиле, къардашлыкъ, ватанперверлик, мераметлик, адалет киби дуйгъулары ашлана.

Теминат: Алиме Абденнанованынъ ресими, дерс конспекти.

Сыныф саатынынъ кетишаты

Эр бир халкъ озь джесюр къараманларынен гъурурлана ве хатырасында тута, унутмай.

Алиме Абденнанова – 1924 сене, январьнинъ 4 Керич къасабасынынъ Джермай-къашыкъ коюнде дюньягъа кельди. Ана-бабасы эрте ольген сонъ, Алимени Ревиде къартанасы ве Муедин эмджеси бакъты. Алиме – генч, дюльбер, назик ве онынънен берабер джесюр, ватанпервер, къоркубильмез бир къыз эди.

19 яшындаки Алиме Абденнанова разведкаджы къыз эди. Оны радиохаберджи къызнен берабер учакъта Къырымгъа, догъмуш Джермай-Къашыкъ кою янына ташладылар. Олар экиси зембильнен энип, къартанасынынъ эвине бардылар ве анда ерлештилер. Къызлар, фашист аскерлери ве арбий техникасынынъ сайысы, не вакъыт ве насыл тарафкъа кеткенлери акъкъында малюмат топлап, рациянен штабгъа бильдирмек керек эдилер. Алиме озь вазифесини пек яхшы беджерди, 10 ай ичинде бойле чокъ къыйметли 81 телеграмма ёллады. Малюмат топламакъ ичюн, о, койде яшагъан сойларыны ве башкъа адамларны озюне ярдымджы оларакъ алды.

Алименинъ группасы не къадар сакът олып, гизли чалышса да, оларны якъаладылар.

Алимени Акъмесджитке кетирип, ондан бир сёз аламагъан сонъ, чекиштирип, къыйнап къуршунладылар.

Джермай-Къашыкъ кою шимди екъ, амма къырымтатарлар  озь къараманларыны унутмай ве 1987 сенеси А. Абденнановагъа  Акъмесджит – Керич ёлунынъ Ленинское кою янында эйкель къойдылар. О, олюмден сонъ Къызыл Байракъ орденинен мукяфатланды. 2014 сенеси 1-сентябрь куню Къырымнынъ шанлы къызына Русие къараманы унваны берильди.

Алиме Абденанова Экинджи Джиан дженки къараманы, белли разведкаджы, гизли тешкилят ёлбашчысы, къырымтатар халкъынынъ федакяр къызыдыр.

Балалар, Алиме киби даа чокъ къыз ве огъланлар ватанымыз огърунда озь джанларыны бердилер. Аллахнынъ рахметинде олсынлар! Бизлер исе озь тарихымызны, джесюр къараманларымызны унутмайыкъ!