Литературно-музыкальнӧй композиция
«Чулаліс кад военнӧй, грознӧй, боевӧй!»
Ведущӧй:
Гажӧн панталімӧ праздник быдӧнным –
Победалісь лун, победитель народ.
Слава быд воинлӧ, слава народлӧ,
Слава и тэныт, простӧй коми морт.
Литературно-музыкальнӧй композиция «Чулаліс кад военнӧй, грознӧй, боевӧй!» кӧсъям Победа лунлӧ, сідз кыдз эта воӧ тырӧ 80 (кыкьямысдас год) и 2025 во президентӧн шуӧм «Отечество дорйöм воӧн».
Великӧй Отечественнӧй война йылісь уна гижӧмась книгаэз. Натьтӧ, быд гижись пыртіс аслас творчествоӧ этӧ темасӧ, кӧда оз коль некинӧс равнодушнӧйӧн: горзӧтӧ, полӧтӧ, кытӧн и серӧмтӧтӧ. Но, конечно жӧ медматын война тема вӧлі нія гижиссезлӧ, киннэз асьныс пешлісӧ война кӧрсӧ снаряддэзлӧн пуляэз увтын, тшынын да биын. Коми-пермяцкӧй гижиссез коласісь ӧкмыс морт, киннэз асланыс синнэзӧн адззылісӧ лёк войналісь адсӧ. И этасянь нылӧн кывбуррезын да висьттэзын Великӧй Отечественнӧй война мыччалӧм пыдына, кужӧмӧн, синва петтӧдз. Гижисӧ война да сьӧкыт кадся олан йылісь уна коми-пермяцкӧй поэттэз да писателлез. Этö:
-Николай Васильевич Попов
-Степан Иванович Караваев
-Михаил Дмитриевич Вавилин
-Иван Алексеевич Шадрин
-Иван Дмитриевич Гагарин
-Николай Макарович Бормотов
-Анатолий Денисович Баяндин
-Василий Иванович Исаев
-Леонид Егорович Нилогов и мӧдік гижиссез
Ведущӧй: Война кад сё ылӧжык и ылӧжык кольччӧ бӧрланьӧ. Фронт вылӧ миян Коми округись муніс куимдас тысячася унажык морт. Ны коласын и том гижись
Иван Дмитриевич Гагарин.
Чужис июль 11 лунӧ 1916 годӧ Гайнскӧй районісь Пятигоры посадын. Кончитіс педагогическӧй техникум. Уджаліс велӧтісьӧн Ёгвинскӧй школаын. Гижны да печатайтчыны пондіс 1935 годсянь окружнӧй газетаэзын.1941 год конецын И. Д. Гагаринӧс вийисӧ Сталинградскӧй фронт вылын.1946 годӧ Коми-Пермяцкӧй книжнӧй издательство лэдзис сы кывбуррезӧн «Стиххез» нима сборник. Кывбурись отрывок:
«Коми зон — патриот»
Локтіс кад военнӧй,
Грознӧй, боевӧй,
Тэкӧт, друг бесценнӧй,
Тэкӧт, друг роднӧй,
Милӧй друг Афоня,
Мунімӧ бӧра
Мийӧ, коми зоннэз,
Дорйыны страна.
Мунтӧн кӧр прощайтчим
Тэкӧт, друг роднӧй,
Каждӧйлӧ желайтім:
— Пессьы, кыдз герой!
Сьыланкыв «Катюша»
1.Дзоридзасьӧ яблоня и груша.
Ва вевдӧрӧ лэбис сук туман.
Берег дорӧ петіс том Катюша-
Берег вылын бытшӧм чужӧмбан.
2.Нывка сьывны песнясӧ пондӧтіс,
Кин понда гажтӧмчӧ сія пыр.
Сы йылісь, кӧдӧ сія любитӧ,
Сы йылісь, кӧдӧ видзчисьӧ дыр.
3.Ой тэ, песня, бытшӧм нывкаоклӧ
Лэбзьы тэ, дзик шонділӧн югӧр.
И боецлӧ, кин граница вылын,
Сет ыджытжык Катясянь юӧр.
4.Ась уськӧтӧ бытшӧм нывсӧ тӧдвас.
Сылӧн голос усьӧ тӧдвас ась.
И граница зонкаыс ась дорйӧ,
Радейтӧм Катюша дорьяс ась.
5.Дзоридзасьӧ яблоня и груша
Ва вевдӧрӧ лэбис сук туман.
Берег дорись муніс том Катюша,-
Колис берег бытшӧм чужӧмбан
Михаил Дмитриевич Вавилин чужис январь 22 лунӧ 1921 годӧ Кочёвскӧй районісь Кукушка деревняын. 1939 годӧ кончитіс Кудымкарскӧй педагогическӧй училище да уджаліс велӧтісьӧн аслас районын. 1941 годсянь 1946 годӧдз служитіс армияын, участвуйтіс Великӧй Отечественнӧй войнаын. 1955 годӧ кончитіс Горький нима Литературнӧй институт. Уджаліс окружнӧй газетаын, веськӧтліс книжнӧй издательствоӧн. Куліс 1992 годӧ.
Бой бӧрын
Чулаліс бой, и лоис лӧнь быдлаын
Но юрын олӧ сё кытшӧмкӧ зык.
Шоччисямӧ, вӧрок сайын сулалам.
Ме мӧрті муӧ свиттялана штык.
Пымалі стрась, и бусӧсь юрсянь кокӧдз.
Июльскӧй шонді сотӧ менчим бок.
Турун коласын оссьӧмась цветоккез,
И гӧрд видзӧ турунас ягӧдок.
А ордчӧн виль могила, кытчӧ дзебим
Ми лейтенантӧс. (Вӧлі том ӧддьӧн).
И документтэс ӧні сылӧн ме дын
И орден, получитіс кӧдӧ тӧн.
Сулалам шытӧг, нем йылісь висьтасьны.
И некинлӧ, мый шогмис, он норась.
Ми тӧдам только бура этӧ асьным.
Сэтшӧм войналӧн мортыс вылын власть.
Сьыланкыв «Смуглянка»
1.Кыдзкӧ гожумся асылӧн
Ме карчйӧрӧ кери дзар,
Сэтчин том, сьӧдсина нылӧй
Лоӧм ягӧд ӧктӧм сяр.
Менчим кылӧс топ кӧрталіс,
Ог и вермы шуны кыв:
Думанам сывьялі,
Мед пантавны гаж асыв.
Припев Читкыль юра да видзрӧма басӧк клён,
Радейтӧмӧ, пым сьӧлӧмӧс кылан, он?
Клён видзрӧма да читкыль юра,
Да крепыт вына, да том!
Степан Иванович Караваев Чужис декабрь 19 лунӧ 1908 годӧ Кудымкарскӧй районісь Отево посадын. Четырёхкласснӧй начальнӧй школа кончитӧм бӧрын сія уджаліс сельскӧй хозяйствоын. 1928 годӧ кончитіс Пермскӧй совпартшкола. Уджаліс избачӧн Отевскӧй да Пешнигортскӧй изба-читальняэзын. 1930-32 годдэзӧ Караваев Кудымкарын окружнӧй издательствоын литсотрудник. 1933 годӧ кончитіс Московскӧй редакционно-издательскӧй институтын курссэз. 1941 годсянь служитіс Советскӧй Армияын, участвуйтіс бойезын, вӧлі кыкись ранитӧм. Демобилизируйтчӧм бӧрын бертіс издательскӧй удж вылӧ. Заведуйтіс Коми-Пермяцкӧй книжнӧй издательствоӧн. Куліс 1974 годӧ.
Кывбур «Узьӧ муын солдат»
Дуз керсис ӧтӧрыс, пондіс кымӧрасьны.
Гажтӧм синбанӧн видзӧтӧ посад.
Туй дынсянь матын, кытӧн кӧркӧ бой гӧрӧдасьліс,
Тӧдӧ кӧть кин,
Муас важын,
Узьӧ солдат.
Люззьӧмӧн зэрӧ, и тӧв пӧльтӧ небыт.
Кыдз ни могиласӧ сэтӧн оз вад!
Кисьтӧ и кисьтӧ синваэсӧ му вылас небо
Тэ понда, зон,
Отирлӧн зон,
Повтӧм солдат.
Шонді югйӧвтіс, и гажмис быдлаын:
Ловзисӧ вӧррез, быд ыб лоис рад.
Кадыс чулалас, но миян свободнӧй странаын
Оз вунӧт вӧр
Тэнӧ некӧр,
Повтӧм солдат.
Леонид Егорович Нилогов Чужис 1924 годӧ Косинскӧй районісь Гортлуд деревняын. 1938 годӧ, семилетка кончитӧм бӧрын, поступитіс велӧтчыны педучилищеӧ. А сыбӧрын – Кудымкарскӧй учительскӧй институтӧ. Год велӧтчӧм бӧрын пондӧтчис война, и Нилогов шедіс военнӧй власттез увтӧ. Воюйтіс Западнӧй фронт вылын. Гортӧ локтӧм бӧрын уджаліс школаын да педучилищеын.
Войналӧн чужӧм (висьтісь тор)
…Кытшӧмкӧ солдат дзугис лӧньсӧ, сія корис музыкантӧс орсны йӧктан.
( барыня) Дунаев пондіс серӧтны барыня. Сьылӧны частушкаэз
СЦЕНКА Эта жӧ коста кинкӧ горӧтчис: «Воннэз, почта!» И гыж только солдат чукӧрыс резсис.
Неыджыт, цыган чужӧма боец кыскаліс мешӧкись корреспонденция, бергӧтліс юрвевдӧрас письмоэз, тшӧктіс йӧктыны нійӧ, кинлӧ адресуйтӧмась. Сеталіс центральнӧй и армейскӧй газетаэз.
Лёва Лудов тожӧ первӧй треугольник-письмо босьтіс, нӧитчӧм, самӧм, мымда лун сія котӧртіс, кошшис Лудовӧс, но главнӧйыс сія, локтіс адресат дынӧдз. Солдат лыддьӧтіс письмо и кыдз гортас вовліс. Сы син одзын, кыдз кинолента вылын, котӧртісӧ посадісь керкуэз, улицаэз, тӧдса отир, Чикись ю, видззез и ыббез. И сы морос пытшкын лоис шонытжык…
Наталья Петровна (висьтасьӧ кык биография)
Николай Васильевич Попов Чужис декабрь 19 лунӧ 1902 годӧ Кудымкарскӧй районісь Тимкина деревняын. Великӧй Отечественнӧй война коста вӧлі фронт вылын. Война бӧрын уджаліс книжнӧй издательствоын. Медодзза кывбуррез петісӧ окружнӧй газетаын 1929 воӧ, а 1935 воӧ лэдзис небӧг. Родина любитӧм да фашисттэзкӧт пессьӧм йылісь гижис поэт аслас стиххезын.
Кывбур «Чышьянок»
Вышивайтіс кӧдӧ этӧ
Басӧк чочком чышьянок.
Менам сы дынӧ приветӧ
Может даже оз и лок.
Чышьяноксӧ киам видза
Юрам дума сэк прокод:
Кин жӧ эта мастерица
И кытӧн жӧ сылӧн горт.
То колхозын му шулялӧ
Трактористка боевӧй,
То заводын ли уджалӧ,
Может, нывка городскӧй.
Натьтӧ, удж бӧрын вурлывліс,
Кад эз ӧшты сія весь.
И подарок этӧ сылісь
Получиті ме –боец.
Дӧс узӧррезӧн баситӧм,
Быд пельӧсын вурӧм цвет.
Гижӧм: «Бандаӧс громиттӧн
Ассис вынтӧ он жалейт».
Кӧр лыддьӧта кыввез энӧ,
Ог тӧд мыйсянь лоа рад;
Бытьтӧ вынӧ содӧ менам,
Киӧ жмитӧ автомат.
Иван Алексеевич Минин Чужис январь 3 лунӧ 1926 воӧ Кочёвскӧй районісь Кышкамыс деревняын. Поэт уна гижис кывбуррез, сьылӧтіс чужан мусӧ, Пармасӧ да сы вылын олісь отирсӧ, сьӧкыт военнӧй годдэз. Кывбуррезся гижисьлӧн петісӧ дасся унажык небӧг, ны коласын висьттэз да повессттез.
«Паныт уйис тӧлісь» Степанколӧн думаэз айыс йылісь, кӧр мыс вывсянь видзӧтӧ деревня ладорӧ ( кошшы важ рюкзак)
ВЕДУЩӦЙ: Не только война йылісь висьтасисӧ гижиссез-фронтовиккез, но и уна кывбуррез да висьттэз гижисӧ война бöрсянь и öння кадö.
Василий Васильевич Климов
Чужис март 20 лунӧ 1927 годӧ Заречнӧй Пешнигорт посадын. Сія гижис не ӧтік книга кывбуррезӧн, рассказзэзӧн да повесттезӧн челядь понда. Война тема вылӧ Климовлӧн уна кывбуррез пырисӧ «Ловья говк» сборникӧ. Висьтася кывбур «Öтласа могила дын»
Волга ю дорын ыджыт посад дын,
Кытӧн шушкӧ куш уввезнас клён,
Лӧня узьӧны вийӧм солдаттэз,
Ны коласын-солдат, менам зон.
Пессьӧ ар. Чӧлӧ вамӧм могила.
Чӧла ме, сылі местаам жыв.
Вот и, вонӧ, пантасим…
Тэ кылан?
Поди, менӧ вунӧтін важын?
Дак, висьтась, кыдз тэ танккезлӧ паныт
Мунін би пырйӧт –повтӧм сьӧлӧм,
Кыдзи мунікат адззин миянӧс,
Кылін Иньвалісь гажа сьылӧм.
Кыдз мечтайтін и лунӧн, и ойӧн
Песны ёнжыка враглісь чукӧр
Да чожажык здоровӧн, и ловӧн
Бертны гортӧ, миян дынӧ бӧр…
Да, лэбтіси сэк врагыслӧ паныт
Батальон бӧрсянь виль батальон,
И легендаӧ эта оланісь
Мунін ныкӧт и тэ, дона зон.
Узь, дорйись менам,
Узь долыт онӧн,
Узь и нем понда тэ эн тӧждісь:
Тыртін честнӧя долгтӧ досповна,
Слава сьӧрын некӧр эн вӧтлісь.
Вайӧ тыр виль заботаэз кадыс,
Но кӧть кӧр мийӧ адззам дасджын,
Мед касьтывны кыдз колӧ солдатӧс,
Кӧда горт дынсянь узьӧ ылын.
Арся тӧв. Волга дорын ыждалӧ,
Шушкӧ гажтӧма уввезнас клён.
Ме копрася да мусӧ окала,
Кытӧн куйлӧ солдат-менам зон.
Людмила Петровна Гуляева Чужис март 12 лунӧ 1952 годӧ Юсьвинскӧй районісь Ларина деревняын. Кывбуррез пондіс гижны эшӧ школа велӧтчикӧ. Людмила Петровна аслас уджӧн, аслас оланӧн пуктіс ыджыт пай челядь велӧтӧмлӧ, коми-пермяцкӧй кыв да литература зорӧтӧмӧ.
Кывбур «Тётя Шура»
Тэ вӧлін легендарнӧй тётя Шура,
Панталін томӧн гымалан кымӧр.
И бертін гортат пиньтӧм, кушмӧм юра-
Войналісь пешлі сола-курыт кӧр.
Война небо враггезсянь дорйин.
О, кыдз мешайтіс фрицлӧ «пятачок»!
Но том боеццез босьтісӧ рекорддэз-
Тасасис врагыс горшын лы торок.
Югдӧтісӧ прожекторрезлӧн югӧррез
Фашистскӧй самолётлісь сьӧд крест.
Би пыкнитіс-и дыр «кырнышыс» бӧрын
Нюжаліс кӧдзыт руын тшына гез.
…И вамӧмӧсь, и кынмӧмӧсь, и тшыгӧсь,
И ой, и лун, и кузся - кузь нёль год.
Не только крепыт лысина мужиккез…
Том нывкаэз оськалісӧ прокод.
И ны коласын менам тётя Шура,
Связист, прожектористка, том солдат,
Не весь эд бертіс гортас кушмӧм юра.
Эд сія дорйис город Ленинград.
Ведущӧй: Уна война йылісь гижисӧ и роч гижиссез. Нылӧн кывбуррез, висьттэз вуджӧтӧмась коми-пермяцкӧй кыв вылӧ. (СЛАЙД роч кыв вылын Стих )
«Пусть будет мир!»
Как надоели войны на свете,
Гибнут солдаты и малые дети,
Стонет земля, когда рвутся снаряды,
Матери плачут и плачут комбаты.
Хочется крикнуть: «Люди, постойте,
Войну прекратите, живите достойно,
Гибнет природа и гибнет планета,
Ну неужели вам нравится это ???».
Война — это боль, это смерть, это слёзы,
На братских могилах — тюльпаны и розы.
Над миром какое-то время лихое,
Где правит война, никому нет покоя.
Я вас призываю, нам всем это нужно,
Пускай на земле будет мир, будет дружба,
Пусть солнце лучистое всем нам сияет,
А войн — НИКОГДА и НИГДЕ не бывает!!!.
Ольга Маслова
«Ась лоӧ мир»
Ась оз лоӧ сэсся виркисьтана войнаэз,
Эд нысянь тӧждӧммез да быдкодь бедаэз.
Ружтӧ муыс, кӧр потӧ снаряд,
Горзӧны маммез и горзӧ комбат.
Горӧн горӧта бы: "Отир, кывзыштӧ!
Войнаэз оз колӧ, невна ӧвсьыштӧ.
Кулӧ вӧрва и кулӧ Мушарыс,
Эд горшви быдӧнлӧ эта лёк оланыс!"
Ме тіянӧс кора, ме кӧсъя быдӧнлӧ,
Ась му пасьта мир рам тӧлокӧн гыалӧ,
Ась гажӧна шонді югӧррез козьналӧ
Да мирыс страна пасьта гажӧн оськалӧ.
Ведущӧй Ӧння кадӧ отир озӧ вунӧтӧ, кыдз воюйтісӧ солдаттэз, судзӧтісӧ миян понда бур олан. И быд год порйӧтӧны Победалісь вежалунсӧ, быд пельӧсокын мунӧны «Бессмертнӧй полккез», чулӧтсьӧ сэтшӧм мероприятие быд год Кудымкар городын.
(Мыччалӧны бессмертнӧй полклісь тор)
«Победа лунлӧн юбилей» Нина Власовна
Кыдз бытьтӧ дӧс вӧр-ваыс эта лунӧ
Панталӧ вежалун: шыннялӧ рас,
Югьялӧ шонді, ловзьӧ том туруныс-
Победа лунлӧ тырӧ кыкьямысдас.
И кайыс дзульзӧ-сьылӧ, дзик радуйтчӧ,
Что кольчис ловья пӧрись ветеран,
Парад вылӧ кыдз бытьтӧ ордчӧн сувтчӧ,
Мед дорйыны ай му вылісь олан.
Войнатӧм, шуда, гажа. Мича годдэз-
Эд мир понда вир киссис вель уна.
Неетша отир лёк пессьӧмын водіс…
Минута чӧлӧ ны понда страна.
Но ловьяӧсь жӧниккез, воннэз, зоннэз-
Россия кузя мунӧ кувтӧм полк.
И пондас вексӧ миян лолын овны,
Кин Родиналӧ сетіс бӧрья долг.
Сьыланкыв «Победа лун» сьылӧны быдӧнныс
219
155 724 
