Люблю наш край - старонку гэту

Тэма: Пазакласнае чытанне “Люблю наш край – старонку гэту”

Мэта: абагульненне чытацкага вопыту вучняў па адборы і чытанні кніг па тэме.

Абагульніць чытацкі вопыт вучняў па адборы і чытання кніг аб Радзіме за перыяд іх пазаўрочнай самастойнай дзейнасці.

Сістэматызаваць чытацкі матэрыял для арганізацыі тэматычнай выставы кніг па сувязі "пісьменнік-жанр-тэма-кнігі".

Замацоўваць уменні самастойнага выбару і чытання кніг розных аўтараў.

Садзейнічаць развіццю ўмення прадстаўляць прачытаную кнігу ці твор аднакласнікам (назва, змест, ілюстрацыі, героі, выбарачнае чытанне эпізодаў).

Выхоўваць любоў да сваёй зямлі, блізкіх.

Форма ўрока: урок-падарожжа

Абсталяванне: выстава кніг пра Беларусь, карткі з прыказкамі, папяровыя кветкі (васількі).

Эпіграф да ўрока:

Высока ў небе вырай кружыць,

Ляціць за сіні небакрай.

Не забывай ніколі, дружа,

Сваю зямлю, свой родны край.

Вера Вярба

Ход урока

1. Арганізацыйны этап.

Усім добры дзень!

І ў добры час!

На ўрок я запрашаю,

Усім поспехаў жадаю!

• Адразу пацяплела і пасвятлела ў класе ад вашых чароўных усмешак.

1. Арыенціровачна-матывацыйны этап.

(Гучыць песня “Мой родны кут, як ты мне мілы”)

Настаўнік.

Каб любіць Беларусь нашу мілую,

трэба ў розных краях пабываць.

Разумею цяпер, чаму з выраю

Жураўлі на Палессе ляцяць…

• Усе мы жывём на планеце Зямля. Гэта наш агульны дом. А сваім родным куточкам мы называем нашу краіну – Беларусь.

• Беларусь яшчэ называюць зямлёй пад белымі крыламі. Чаму?(Шмат буслоў у Беларусі.)

• Так. Прыродны сімвал нашай Радзімы – птушка бусел. Народнае павер’е сцвярджае, што буслы прыносяць у дом шчасце. Гэта азначае, што мы жывём у шчаслівай краіне.

1. Этап паведамлення тэмы і задач урока.

• Сёння ў нас пазакласнае чытанне.

• Ці здагадаліся вы, якая тэма нашага ўрока?

• Менавіта так. мы адправімся ў падарожжа па нашай Радзіме, яшчэ раз нагадаем аб яе прыгажосці, багацці сродкам мастацкага слова, прачытаем творы беларускіх аўтараў.

1. Рашэнне задач па арыентаванні ў кнігах.

а) Знаёмства з кнігамі выставы:

• Давайце зробім невялікі агляд гэтых кніг. (Паведамленне настаўніка пра змест кніг, аўтараў, жанры твораў.)

б) Прэзентацыя кніг, якія прынеслі дзеці.

• Я ведаю, што вы таксама дома чыталі кнігі пра нашу Радзіму і прынеслі сёння на ўрок, каб нас з імі пазнаёміць.

• Калі ласка, мае маленькія спадары.

(Выступленні вучняў з кароткай прэзентацыяй прачытаных кніг, зачытваннем цікавых эпізодаў.)

в) Практыкаванні па развіцці ў вучняў уменняў працаваць з кнігай.

• Я таксама хачу пазнаёміць вас з творам А. Вольскага «Беларусь». (Раздаю дзецям зборнікі.)

• Прачытайце назву зборніка. Чаму гэта зборнік?

• Якія творы ў зборніку: вершы, апавяданні або казкі?

• Як знайсці ў гэтай кнізе верш Артура Вольскага«Беларусь»?

1. Чытанне настаўнікам верша А. Вольскага “Беларусь».

• Чаму верш мае такую назву?

1. Гутарка-разважанне па прачытаным вершы А. Вольскага “Беларусь”.

• Ці спадабаўся верш?

• Які настрой ён у вас выклікаў? Чаму?

• Што такое вясёлка? 

• Чым пахне ў Беларусі?

• Як называецца наша краіна?

• Чаму аўтар называе нашу Радзіму “непаўторны край”?

• Давайце з дапамогай фізкультхвілінкі зробім нашу краіну яшчэ прыгажэй.

ФІЗКУЛЬТХВІЛІНКА “Мы пасадзім грушку”

• Бусел запрашае вас зрабіць кружок і палюбавацца зверху на нашу краіну.

(На дошку прымацоўваюцца малюнкі поля, лесу, рэчак, луга).

• Якая наша Радзіна з вышыні палёту?

• Асаблівае замілаванне выклікаюць палі збажыны. Яны падобныя на золата. Гэта не толькі прыгажосць, але і наша багацце.Чаму?

• Так. Хлеб – гэта наша багацце, гэта жыццё.

• Ці лёгка яго вырасціць?

• Як неабходна адносіцца да хлеба?

1. Самастойная работа вучняў з новай кнігай.

• Зараз я прапаную вам пазнаёміцца з яшчэ адным творам пра наш галоўны скарб - хлеб. Спачатку ўважліва разгледзьце кнігу.

(Раздаю кнігі М. Пазнякова«Спявае жыта».)

• Хто аўтар гэтай кнігі?

• Якую назву яна мае?

• Ці шмат у ёй твораў?

• Да якога жанру адносяцца змешчаныя ў кнізе творы? (Вершы, апавяданні.)

• Прапаную вам прачытаць верш М. Пазнякова «Жыта». Знайдзіце яго, калі ласка.

• Як вы думаеце, аб чым распавядаецца ў вершы?

• Абгрунтуйце сваю думку.

1. Самастойнае чытанне вучнямі твора М. Пазнякова «Жыта».

2. Выяўленне і ацэнка якасці самастойнай работы вучняў з новай кнігай.

1. Гутарка па прачытаным.

• Як вы адшукалі верш «Жыта» у дадзенай кнізе?

• На якой ён старонцы пачынаецца прачытаны вамі твор?

• Якая галоўная думка верша? 

• Людзі якіх прафесій вырошчваюць хлеб?

1. Работа ў парах “Падбяры прыказкі да твора”.

З чужой бяды не смейся.

Шануй бацьку з маткай, другіх не знойдзеш.

Дзе шчырая праца, там густа, а дзе лянота – там пуста.

1. Падвядзенне вынікаў урока і рэфлексія.

• Калі ідзеш сцежкаю праз поле, дзе шуміць збожжа, можна ўбачыць блакітныя кветачкі з прыгожай назвай – васілёк (валошка). Яны такія прыгожыя як і наша Радзіма. Можа па-гэтаму называюць у Беларусі хлопчыкаў – Васількі, а дзяўчынак – Васілінкі.

• Я прапаную вам прачытаць пачатак сказа, які запісаны на папяровых кветачках, дапоўніць яго і прымацаваць гэтыя кветачкі на дошку. (Пачатак сказа “Я люблю Беларусь таму, што … )

• У канцы нашага ўрока я хачу звярнуць вашу ўвагу на эпіграф, які запісаны на дошцы:

Высока ў небе вырай кружыць,

Ляціць за сіні небакрай.

Не забывай ніколі, дружа,

Сваю зямлю, свой родны край.

Вера Вярба

• Аб чым мы павінны заўсёды памятаць?

1. Этап інфарміравання аб дамашнім заданні.

• Да наступнага ўрока вам неабходна прачытаць творы аб нашай мілагучнай беларускай мове. Для гэтага вы павінны выбраць і прачытаць твор са спісу, які я вам рэкамендую. (Вывешванне рэкамендацыйнага плаката па тэме наступнага ўрока пазакласнага чытання.)