Մայիսյան քառատոն

Արցա՛խ, մի բուռ Արցախ,
Դու աշխարհի համար մի փշուր հող ես լոկ
Եվ սակայն մեզ համար հսկա զոհասեղան...

Հայ ժողովրդի համար մայիսն իսկապես հաղթանակների ամիս է:Կատարելով պատմական էքսկուրս՝հիշենք Մեծ հայրենականը և հայերի սխրանքները:Հայրենական մեծ պատերազմի ընթացքում Խորհրդային Միության հերոսի բարձր կոչմանն է արժանացել 116 հայ:Հաջորդը Շուշիի ազատագրումն էր,որտեղ իր ողջ ուժով դրսևորվեց հայ ժողովրդի հաղթական և մարտնչող ոգին: Մայիսի 8-ին գիշերը՝ 2:30-ին հրետանային կրակի ներքո սկսվեց ընդհանուր գրոհ։ Հակառակորդը դիրքավորվել էր Շուշիի կամրջից ոչ հեռու։ Աշոտ Ղուլյանը վիրավոր էր, բայց մնում էր առաջին գծում։ Առավոտյան ժամը 6:30-ին նա Արկադի Տեր-Թադևոսյանին հաղորդեց, որ մոտեցել է Շուշիի բերդի պատին և շուտով կմտնի քաղաք։Շուշիի ռազմական գործողության փայլուն ավարտը հայ մարտիկների խիզախության, ինչպես նաև գրոհի խելացի կազմակերպման արդյունքն էր: Մայիսի 8-ի երեկոյան Վազգեն Սարգսյանը հայտարարեց. «Այն, ինչ կատարվում է Արցախում, հրաշք է…»։

Մայիսի 8-ին և 9-ին հայ ժողովուրդը նշում է չորս տոն՝ Հայրենական մեծ պատերազմի հաղթանակը, Լեռնային Ղարաբաղի Հանրապետության բանակի կազմավորումը, Շուշիի ազատագրումը և Երկրապահի օրը :

Հաղթական մայիսյան խորհուրդը թող դառնա բոլորիս համար խորհրդանշական պատգամ՝ հիշե՛լ և փառաբանե՛լ անցյալը, գնահատե՛լ անչափ թանկ գնով հաստատված խաղաղությունն ու անդորրը և չխնայե՛լ ջանքերը հանուն հայ ժողովրդի և Հայաստանի Հանրապետության զարգացման ու առաջընթացի։ Թո՛ղ հայ ժողովուրդն արձանագրի միայն հաղթանակներ:

Շնորհավորում ենք մայիսյան փառապանծ քառատոնը։