Мевзу: Исим. Хас ве джыныс исимлер.

4-В Родной (крымскотатарский) язык Урок №22 23.11.18

Мевзу: Исим. Хас ве джыныс исимлер.

Дерснинъ типи: янъы бильгилер алув дерси.

Дерснинъ макъсады:

• Талебелерге исим акъкъында бильги берюв;

• Хас ве джыныс исимлернинъ арасындаки фаркъыны анълатув;

• нутукъ инкишафы;

• «Къыш келе» мевзусында икяе этюв;

• Язув алышкъанлыгъыны пекитюв;

• Лугъат байлыкъларыны зенгинлештирюв;

Регулятив УОА

• озь иш ерини тешкиль этмек,

• дерснинъ макъсадыны анъламакъ, къоюлгъан вазифелерни чезмек ичюн ёлларыны тапмагъа бильмек.

Огренюв УОА

• оджанынъ суаллерине джевап бермек;

• керек малюматны тапмагъа бильмек;

• язы элементлерини берильген нюмюне боюнджа текрарламакъ;

Коммуникатив УОА

• дерсте, аятта олгъан диалогларда фааль иштирак этмек;

• къырымтатар тилини динълемеге ве анъламагъа бильмек;

• къырымтатар тилинде окъумагъа ве язмагъа бильмек.

Коргезме: дерслик, язы дефтери, ресимлер, карточкалар, презентация, проектор, ноутбук.

Дерс кетишаты:

1. Тешкилий къысым.

Селямлашув. Невбетчинен субет

2. Темиз язув дакъкъасы

Оджа: Дефтерлеринъизни ачып, язынъыз. Ноябрьнинъ йигирми учю. Сыныф иши.

Дд Тт

Дал тал

Далда уфакъ къуш отура.

– Бу джумледе эр бир сёзнинъ сёз чешитини языйыкъ.

3.Эв вазифесини тешкерюв. 

Оджа: Кечкен дерсте насыл мевзуны огрендик?

Талебелер: Сёз чешитлерини.

Оджа: Къырымтатар тили дерсинде насыл сёз чешитлерини огрендинъиз?

Талебелер: Исим, Сыфат, Фииль

Оджа: Олар насыл суаллерге джевап берелер?

Талебелер: Исим: ким? не? Сыфат: насыл? Фииль: не япты? не япа? не япаджакъ?

Оджа: Келинъиз бойле лугъат диктанты кечирейик, мен сёзлерни окъуйым, сиз оларны суаллерине коре учь диречикте язасынъыз.

Не? Ким? Насыл? Не япа?

Акъмесджит дюльбер отура

баба яхшы яза

Мемет балабан окъуй

китап ешиль ача

Оджа: Шимди биз бу диречикте язылгъан сезлерни тешкерейик. Амма эр биринъиз озь ишинъизи дегиль, раледеки къомшунъызнынъ ишини тешкереджексинъиз.(слайд1,2)

Ким хата япмады, эллеринъизни котеринъиз.

Ким бир хата япты, эллеринъизни котеринъиз.

Ким эки хата япты эллеринъизни котеринъиз.

4.Янъы мевзуны анълатув

Биринджи диречикте язылгъан сёзлер насыл суаллерге джевап берелер?

Насыл сез чешити олалар?

Талебелер: Мемет сезю ким? Акъмесджит, китап, баба сёзлери не? суаллерине джевап берелер.

Оджа: Биринджи диречикте язылгъан сёзлернинъ биринджи арифи насыл язылгъан?

Талебелер: Акъмесджит ве Мемет сезлери буюк арифнен язылгън, баба ве китап уфакъ арифнен язылгъан.

Оджа: Я не ичюн бойле язылгъан, олар арасында насыл фаркъ бар?

Талебелер: озь джевапларыны берелер.

Оджа: Акъмесджит ве Мемет сезлери – бу хас исимлер, баба ве китап – бу джыныс исимлер

ЛУГЪАТ:

хас - имя собственное

джыныс – имя нарицательное

Бугунь дерсте биз насыл мевзуны кечеджекмиз?

Талебелер: Исим ве онынъ суаллери?

Хас ве джыныс исимлер.(слайд2)

Оджа: Макъсадларымыз не?

Талебелер: Исимлернинъ суаллерини текрарламакъ.

Хас ве джыныс исимлернинъ арасындаки фаркъларыны огренмек.(слайд3)

5.Китапнен чалышув. 78ве 80 сайфелерде къаиделерни окъумакъ ве талиль этмек.(слайд 4,5)

Оджа: Келинъиз хас ве джыныс исимлерни къулланып бир джумле тизейик.

Кучюк Мемет дюльбер яза. (Бир талебе тахтада чалыша.)

Бу джумледе баш азаларыны тапайыкъ. (Джумленинъ баш азалары – муптеда(ким?не?) ве хабер(не япты?не япа? не япаджакъ?))

5. Раатлыкъ дакъкъасы (козь гимнастикасы, пармакъ гимнастикасы)

Биз яздыкъ, биз яздыкъ

Пармачыкълар болдурды

Азчыкъ раатланайыкъ

Кене язмагъа башлайыкъ

7. Пекитюв

Китапнен чалышув 81- саифе, 153-иш. Нокъталар ерине хас исимлер язынъыз.

8.Рефлексия

- Келинъиз, балалар, бугуньки дерсимизни хатырлайыкъ ве бойле вазифе беджерейик

(карточкаларнен чалышув). Тахтада ким? ве не? суаллери асылгъан, оджанынъ масасында карточкалар ерлештирильген, талебелер чыкъып бир карточканы сечелер ве тахтагъа, келишкен суаль тюбюне асалар.

КИМ? НЕ?

оджа къашкъыр

талебе копек

ана тильки

Сафие бульбуль

Мемет къартал Нетидже: Къырымтатар тилинде айванлар ве къушлар не? суалине джевап берелер, тек адамларгъа аит исимлер ким? суалине джевап берелер (слайд 6)

-Насыл исимлер буюк арифнен языла?

- Бугунь дерсимизде насыл мевзуны кечтик?

- Бугунь кечкен мевзуны ким анълады- ешиль карточканы котере, ким анъламады - къырмызы карточканы котере …(слайд7)

9. Дерснинъ нетиджеси ве баалав.

Оджа: Сагъ олунъыз, балалар, яхшы чалыштынъыз! Эминим ки, сиз эв вазифесини келеджек дерске япып келерсинъиз. Бойле баалар къазандынъыз:

10.Эвге вазифе. Къаиделерни огренмек.

Дерсимиз битти, чокъ сагъ олунъыз! (слайд 8)