Мобилон уӕлӕфтуан «ирон чиныг» куыд ахсджиаг ӕмӕ хъӕугӕ фӕрӕз ирон ӕвзаджы ахуырты рӕвдауӕндоны сабитимӕ

МОБИЛОН УӔЛӔФТУАН «ИРОН ЧИНЫГ» КУЫД АХСДЖИАГ ӔМӔ ХЪӔУГӔ ФӔРӔЗ ИРОН ӔВЗАДЖЫ АХУЫРТЫ РӔВДАУӔНДОНЫ САБИТИМӔ

Мобилон уӕлӕфтуан «Ирон чиныг» сарӕзтӕ уыд, цӕмӕй сывӕллӕттӕ ирон ӕвзагмӕ ӕмхиц уой, рагацау ӕй ахуыр кӕной. Уыцы куысты ахадындзинад та махӕй сусӕг никӕмӕн у. Уымӕн, ӕмӕ махыл, рӕвдауӕндоны кусджытыл, ис стыр хӕс ӕвӕрд – сывӕллӕтты сахуыр кӕнын иронау хъуыды кӕнын, сӕ хъуыдытӕ кӕрӕдзиуыл бастӕй аив дзурын, ӕвзагӕй пайда кӕнын куыд бастдзинад ӕмӕ зонындзинӕдтӕ исыны фӕрӕзӕй.

Уыцы стыр хӕстӕ цӕмӕй нӕ къухы ӕнтысджынӕй бафтой, уый тыххӕй ӕвӕллайгӕйӕ агурӕм ног фӕрӕзтӕ ӕмӕ ног гӕнӕнтӕ. Уыцы фӕрӕзтӕй иу у мобилон уӕлӕфтуан «Ирон чиныг» - алӕмӕты хӕзнадон, сабитӕн фыст ирон литературӕйы хуыздӕр уацмыстӕ ӕмбырдгонд кӕм ӕрцыдысты, уый. Уыимӕ ма, ацы ахадгӕ фӕрӕз баст у нырыккон информацион-коммуникативон технологитимӕ. Куыд зонӕм, афтӕмӕй та ныртӕккӕйы сывӕллӕттӕ сӕ цард ӕнӕ уыдонӕй нал уынынц. Уымӕ гӕсгӕ сын ахӕм куысты хуыз вӕййы тынг цымыдисаг ӕмӕ зӕрдӕмӕдзӕугӕ. Куыддӕр мын мӕ къухы фенынц телефон ӕмӕ хъӕрӕйдзурӕн (ома, колонка), афтӕ сӕ цӕстытӕ цинӕй айдзаг вӕййынц.

Зӕгъын хъӕуы уый дӕр, ӕмӕ уӕлӕфтуаны цы уацмыстӕ ис, уыдон кӕсынц ирон драмон театры хуыздӕр актертӕ. Уыдоны раст, аив ӕмӕ зӕрдӕмӕдзӕугӕ ныхас хъусгӕйӕ, сывӕллӕттӕ дӕр фӕтырнынц ӕмӕ, кӕй зӕгъынӕй хъӕуы, фӕцалх вӕййынц аив дзурыныл раст ӕмӕ рӕсугъд интонациимӕ.

Фӕнысан кӕнын хъӕуы уый, ӕмӕ «Ирон чиныджы» уацмыстӕ афтӕ ахадгӕ ӕмӕ бирӕвӕрсыг сты, ӕмӕ сӕ ис спайда кӕнын алы ахуырты дӕр. Фӕнды сабиты цӕрӕгойтимӕ зонгӕ кӕнӕм, фӕнды афӕдзы афонтимӕ, фӕнды хидарыны ӕгъдӕуттимӕ – алы темӕмӕ гӕсгӕ дӕр дзы ссардзыстӕм хъӕугӕ ӕрмӕг. Суанг ма дзы уыци-уыцитӕ ӕмӕ сыгъдӕгдзуринӕгтӕ дӕр ссардзыстӕм.

Куыд загътон, афтӕмӕй уӕлӕфтуаны ӕрмӕгӕй мах алы хуызы пайда кӕнӕм. Зӕгъӕм, куы нӕм вӕййы темӕ «Бинонтӕ», уӕд ахуырты рӕстӕг спайда кӕнӕм Гусалты Замирӕты ӕмдзӕвгӕйӕ «Бинонтӕ»; Райгуырӕн бӕстӕимӕ сӕ куы фӕзонгӕ кӕнӕм, уӕд та байхъусӕм ӕмдзӕвгӕмӕ «Цы мын у зынаргъ»; уӕдӕ сӕ афӕдзы афонты нысантимӕ куы фӕзонгӕ кӕнӕм, уӕд дӕр нӕ ахуырты иу хай вӕййы темӕимӕ баст уацмысмӕ байхъусын уӕлӕфтуаны ӕрмӕджытӕй; ӕмӕ афтӕ дарддӕр. Ома, ахуырты рӕстӕг спайда кӕнӕм иу цавӕрдӕр уацмысӕй.

Фӕлӕ вӕййы,ӕмӕ нӕ ахуырты мидис кӕрӕй-кӕронмӕ сбӕттӕм уӕлӕфтуаны уацмыстимӕ. Зӕгъӕм, куы нӕм вӕййы темӕ «Хӕдзарон мӕргътӕ», уӕд раздӕр спайда кӕнӕм Айларты Михалы ӕмдзӕвгӕтӕй «Кӕрконӕг», «Бабыз» ,«Гогыз» куыд сыгъдӕгдзуринӕгтӕй. Уымӕн ӕмӕ сусӕг нӕу, дзырдты мырон культурӕмӕ дӕр стыр ӕргом здахын кӕй хъӕуы, уый. Уый фӕстӕ ма нын уыцы ӕмдзӕвгӕтӕ ӕххуыс вӕййынц улӕфты минуты дӕр, сӕ ныхӕстӕм гӕсгӕ сывӕллӕттӕ февдисынц алыхуызон буары змӕлдтытӕ. Дарддӕр спайда кӕнӕм ӕмдзӕвгӕйӕ «Уасӕг», уый дӕр уыцы чиныгӕй, «Дзиба-дыгоппон». Ӕмӕ ма, кӕронбӕттӕны байхъусӕм аргъаумӕ «Цъиу ӕмӕ рувас» Токаты Дзерассӕйы чиныгӕй ист. Уӕгъд рӕстӕг та ацы аргъау рольтӕм гӕсгӕ ахъазӕм.

Ахӕм дӕнцӕгтӕ ма ис ӕрхӕссӕн ӕндӕр темӕтӕй дӕр. Ома, уый дзурӕг у, мобилон уӕлӕфтуан «Ирон чиныг» нын нӕ къух иттӕг хорз кӕй барог кодта, ууыл.

Аудиотекстыл кусыны методикӕйыл бӕстонӕй нӕ лӕудзынӕн, уыимӕ уӕ алчидӕр зонгӕ у цы курсытӕ нӕм уыдис, уыдоны руаджы. Ӕрмӕст мӕ зӕгъын фӕнды ӕмӕ махӕн уыцы ахадгӕ курсыты фӕрцы нӕ къухы бафтыд нӕ рӕвдауӕндоны хъомылгӕнджыты зонындзинӕдтӕ иучысыл фӕуӕрӕхдӕр кӕнын. Уыдис нӕм практикон семинартӕ. Уыцы семинарты мах бамбарын кодтам нӕ хъомылгӕнджытӕн аудиотекст ӕрмӕст байхъусынмӕ лӕвӕрд кӕй нӕ цӕуы, уый ӕмӕ сӕ базонгӕ кодтам уацмыстыл кусыны алгоритмимӕ.

Нӕ куысты фӕстиуджыты тыххӕй куы дзурӕм, уӕд мӕ бон фидарӕй зӕгъын у нӕ сабитӕ цымыдисдӕрӕй ӕмӕ зӕрдӕргъӕвддӕрӕй кӕй райдыдтой ахуырты архайын, уый. Уый, мӕнмӕ гӕсгӕ, уымӕн, ӕмӕ ма йӕ иу хатт зӕгъдзынӕн: цыдӕриддӕр баст у цавӕрдӕр ногдзинадимӕ, уый сывӕллӕттӕм тынг хорз кӕсы ӕмӕ сӕ зӕрдӕмӕ дӕр тынг цӕуы. Сывӕллонмӕ та цымыдисдзинад куы уа, уӕд куысты хатдзӕгтӕ дӕр вӕййынц бӕлвырд хуыздӕр ӕмӕ бӕрзонддӕр. Афтӕмӕй, хъазгӕмхасӕнты, мах архайӕм сабиты ныхасы рӕзтыл, хъӕздыгдӕр сын кӕнӕм сӕ дзырдуат, кусӕм ныхасы грамматикон бындурыл, баст ныхасыл, зонгӕ сӕ кӕнӕм литературон ӕвзаджы ӕгъдӕуттимӕ. Уыимӕ ма парахатдӕр кӕнӕм сывӕллӕтты зонындзинӕдтӕ алфамблай дунейы тыххӕй.

Бӕрӕг у, хъӕугӕ ӕмӕ зӕрдӕмӕдзӕугӕ фӕстиуджытӕ къухы цыбыр рӕстӕгмӕ нӕ бафтынц. Ахуыргӕндтӕ куыд зӕгъынц, афтӕмӕй сывӕллӕттӕн раздӕр бауарзын кӕнын хъӕуы сӕ мадӕлон ӕвзаг; сӕ кармӕ гӕсгӕ сӕ ӕркӕнын хъӕуы ахӕм уавӕрмӕ, ӕмӕ сӕ хъуыдытӕ дзурын сӕхи куыд ӕрфӕнда, дзурыны фӕндон сӕм куыд фӕзына. Уый у махӕн нӕ фыццаградон хӕс. Ӕмӕ уыцы стыр хӕс нӕ къухы куы бафта, уӕд мӕ фидарӕй уырны, ирон ӕвзаджы фидӕн бӕллиццаг кӕй уыдзӕн, уый.

1