Мои стихи, посвященные калмыцкому празднику Цаган Сар

Цаhана дуудвр

Кезәнә тогтсн авъясар

Үвләс менд hарвта? – гицхәй,

Шар шаҗна шүтәhәр,

Цуглрҗ байран кецхәй!

Баhчудт сурhмҗ өгч,

Таӊhчд цецгәрлт дурдцхай!

Шин күцәмҗ тогтаҗ,

Цаhана нәәрән эклцхәй!

Бурхн Багшин номд зальврҗ,

Әмтнд ик сергәмҗ үүдәцхәй!

Сән-сәәхн җирhл бүрдәҗ,

Окн Теӊгртән мөргцхәй!

Өрк болhнд хөв белглҗ,

Нарт делкән улст иньгллт нерәдцхәй,

Цуг әмтә тоотд килмҗ өгч,

Кишгин цаhан хаалhар йовцхай!

Уурхан саӊ – хальмг келән хадhлҗ,

Бумбин орн болснТөрскән өргцхәй!

Җаӊhрин баатрмуд болсн үрдүдән өскҗ,

Хаврин хәәртә өдрән темдглцхәй!

Төвдин hазрт сулдхвр ирүлҗ,

Дала Ламд амулӊ йөрәцхәй!

Хальмгуд оньдин эвәр бәәҗ,

Бурхна евәлд күртцхәй!

Орчлӊгин иргч харсҗ,

Чик седкләр бәәцхәй!

Тәвсн хөвдән байрлҗ,

Урдк үйнрин авъяс батлцхай!

Хəəртə байр (для внучки)

Цасн хəəлəд, хавр иржəнə.

Цаһан Сар ирəд, олн əмтн байрлҗана.

Ээҗ зулан өргəд, олнд кишг дурдҗана.

Хурлд мөргʏл болад, ламнр ном умшҗана.

Цаһана цəəһəн зандрулҗ, әмтəхн боорцган идцхəй!

Хаврин нəəрəн давулҗ, җирһлин кʏцлəн бəрцхəй!

Көгшн ааван тевчҗ, ѳөрднрин авъяс делгрʏлҗ,

Җил болһӊ Цаһаһан кеҗ, төвкнʏ һазрт делдцхəй!

Yвлəс менд һарч, дулан хавран тосцхай!

Хəəртə байран тосч, хальмгуд, хөвдəн байрлцхай!

Байрта өдр

Цаһан Сар тосад цуг əмтн байрлна,

Уул хальмгуд ниргəд сəн өдрəн давулна.

Бурхндан зальврад, дʏʏцӊ өдрмʏдт мөргəд,

Зулын герлəр бийəн цеврлəд, ик номд орлцна.

Цаһан Сарин шинд лу сарин өдр харһна,

Кезəнəс нааран өөрднрт эн өдр байр болна.

Цаһан Сарин һучн боорцгин өдр гинə,

Һалан тʏлсн берəчʏдт тааста көдлмш эклнə.

Боорцгин цə чанад, элг-саднд белгʏд диглəд,

Хувцн-хунран авдрасн һарһҗ өлгəд,

Тоснд шарсн боорцгарн бичкдʏдин җилв кʏргəд,

Кʏʏкд улс зулан өргəд, цуһар бурхнд мөргнə.

Хуухлсн толһа-шиирəн, ʏймʏдəр салһсн махан

Хойр хəəстə махан өр цəəтл болһдг.

Цаһана цəəһəн чанад, байрин йөрəл тəвəд,

Көгшн аавурн ирəд, цуглрад Цаһаһан кедг.

Деед суусн көгшəд барун һаран өгəд

«Yвлəс менд һарвта?» - гиһəд, дарандан өөрдҗ мендлдг.

Yʏднə эркиг барун көлəрн баахн көвʏн алхад,

Цаһана цəəг ааһарн дееҗ бəрəд цацдг.

Цəəһин йөрəл келəд, өлзəтə җирһл дурдад,

Җил болһн байран кеһəд, чансн махан һарһдг.

Тевштə махан йөрəһəд, хөөнə толһаһар дееҗ өргəд,

Керчм өөк һалд хаяд, медəтə залуст мах өгдг.

Әрк, шикр-балтаһан ширə деер тəвəд,

Зеенр зееһəн бəрəд, əркин цацл кедг.

Байрин өдр əклнə, инəдн-шог келцхəнə,

Еӊгсг дууһан дуулна, сəəхн бииһəн биилцхəнə.

Өнр-өсклӊ хальмгуд,

Дʏрклсн җирһлəн магтцхай!

Хөвтə һазрин баһчуд,

Өвкнрин авъясан делгрʏлцхəй!

Цаһан гисн сǝǝхн үг

Цаста Төвдин һазрас

Цаһан Сарин авъясиг

Зуӊква Бурхна һарас

Зая-Пандит авла.

Цаһан гисн сəəхн ʏг

Сəн седклин авъяс,

Цаһан хурһн – йорта белг,

Хавр эклсиг зурмн меддг.

Цаһан тосн, ʏсн-өрмəр

Цаһана цəəһəн чанад,

Окн Теӊгрин Бурхна сəкʏсəр

Олн əмтнд төвкнʏ евəһəд,

Гер-гертəн орлдад,

Боорцг-тоһшан белглəд,

«Yвлəс менд һарвта?» - гиһəд,

Хальмгуд хоорндан мендлəд,

Махан йөрəһəд, һалд өөк хаяд,

Аав-ээҗнрəн тевчəд,

Зеенрт шиирмʏд атхулад,

Бʏкл сардан цаһалад,

Амулӊ җирһл Деедсəс сурад,

Орчлӊгин дөрвн җирһлд багтад,

Өвкнрин заӊ-бəрцəн делгрʏлəд,

Дуулад, биилəд җирһцхəй!

Улан залата өөрднр,

Уралан зʏткҗ йовцхай!

Хаврин тʏрʏн өдрəн

Оньдинд темдглҗ байрлцхай!

Хəəртə баһчудт ʏлгʏр болҗ,

Дʏмбр Төрскəн өргҗʏлҗ,

Җирһлин кишгəн бəрҗ,

Иргчин залачнр болцхай!