Ն հնչյուն տառի ուսուցում

Առարկա՝ Այբբենարան Ամսաթիվ՝ 16.11.2022, 17.11.2022

Դասարան՝ 1

Դասվար՝ Դ.Ճարատանյան

Դասի տիպը՝ 1-ին օր՝ հաղորդման դաս, 2-րդ օր՝ ամփոփման դաս

Թեմա՝ Ն հնչյուն տառի ուսուցում

Նպատակ՝ Կսովորեն Ն հնչյուն-տառը, կկարողանան գրել: Կզարգացնեն նախադասությունները քերականորեն Ճիշտ կառուցելու կարողություններ՝ վերարտադրելով թեմատիկ նկարի բովանդակությունը: Աշխատանքներ կկատարեն անձնանունների շուրջ: Կկազմեն էջում տրված բառերի վանկային և հնչյունային գծապատկերները:

Դասի ընթացք.

1. Բանավոր հարցում

2. Նախապատրաստում նոր նյութին

3. Նոր նյութի հաղորդում

4. Լեզվական աշխատանք

5. Ամփոփում

6. Տնայինների հանձնարարում

Խթանում.

Նոր նյութի հաղորդման դաս: Մենք ծով չունենք, մեր ունեցած միակ հարստությունը մեր Սևանա լիճն է: Եկեք մտովի պատկերացնենք, որ ծովում ենք:

Նավապետը իր նավաստիներով ճամփորդում էր նավով: Ճանապարհորդությունը բավականին հետաքրքիր էր: Նավապետը հեռադիտակով դիտում էր շուրջ բոլորը՝ ճայերը շատ մոտ էին երևում, հեռվում դելֆիններն էին ցատկապար բռնել և ահա նավը մոտեցավ Սևանա թերակղզուն: Թերակղզու 3 կողմը շրջապատված էր ջրով, միայն մեկ կողմն էր ցամաք: Թերակղզու վրա գտնվում էր Սևանա վանքը: Նկարիչը կտավը ամրացրել էր մոլբերտին և նկարում էր այս հրաշք տեսարանը:

Սովորեցնել Ն տառի երկտողը.

Նավ եմ, նավ եմ, լողում եմ,

Արևի տակ շողում եմ:

Հնչյունային վերլուծության ենթարկել նավ, նապաստակ բառերը և տալ պատկերացում, որ այս պատկերների ձևը նման է ն-ի գրությանը: Սովորել ընթերցել բառերը: Ընթերցել էջի ներքևի նկարելուկները:

2-րդ օր: Վեց տառ սովորելուց և ամրապնդելուց հետո, աշակերտը փոքրիկ պատմվածք է կարդում Անիի մասին: Ընթերցել էջի նկարելուկները: Պատմել փոքրիկ պատմություն անտառում թաքնված տառերի մասին և գտնել թաքնված անունը: Ավարտին հասցնել էջի աշխատանքները:

Կշռադատում- Երեխանե՛ր, ո՞ր տառը սովորեցինք այսօր: Մեր նպատակը նոր տառի ուսուցումն էր, ինչ եք կարծում հասանք մենք մեր նպատակին:

Տն. աշխ. – Հանձնարարել համապատասխան նյութը պատմել և ընթերցել:

2