Очерк "Крым - Душа моя"

ДЖАНЫМ КЪЫРЫМЫМ

Очерк

Ер узеринде аджайип ярымада бар. Онынъ ады Къырым.

Къырымнынъ табиаты пек гузель. Мында ешиль багъ-багъчалар ве орманлар, юксек къая ве дагълар, салкъын сувлу чокъракълар, кениш челлер, къадимий къобалар, эски джамилер, къадимий шеэр ве койлерни корьмек мумкюн. Къара денъизнинъ сувлары исе, анасыны чапып къучакълагъан бала киби, ярымаданынъ ялыларыны охшай.

Бу дюльбер диярда къырымтатар халкъымыз асыл олды. Эвель заманлардан берли мында баба-деделеримиз яшады, озь топрагъында чалышты, оны яраштырды, эвлятларыны осьтюрди, дуалар окъуды. Бу ерде акъыллы ве ватанпервер инсанлар яшады ве иджат этти. Исмаил Гаспралы, Номан Челебиджихан, Бекир Чобан-заде, Умер Ипчи ве башкъа шаир ве языджылар севимли ватангъа эсерлер багъышладылар. Эсерлерде Къырым дюльберлигинен айретлендилер, онъа садыкъ олгъанлары акъкъында яздылар, къырымтатар халкъны дюньягъа таныттылар.

Миллетимиз чокъ фаджиалы куньлер де корьди, чокъ огъул ве къызларны дженк ёлларында комди, сюргюнликте омюр сюрди, чекишти, амма йыкъылмады. Халкъымыз ватан арзусынен яшап, оннен къавушмагъа ынтылды ве тувгъан топрагъына адым атты.

Къырымтатарлар арасында танылгъан «Ватан – экинджи ананъ» аталар сёзю бар ве онынъ манасы терендир. Ана киби къасевет чеккен, юреги парча-парча олгъан ве йыллар девамында козьяш тёккен Къырым юртумыз озь балаларыны гъурбетликтен беклей эди ве, ниает, сыджакъ къучагъына сарды.

Къырым бизим джанымыз, хазинемиз, деделеримизден къалгъан мирас. Онъа озь севгимизни, садыкълыгъымызны косьтерейик, оны сакълайыкъ!