--Ուղղական հոլով--Սեռական, Տրական

Հոլովի քերականական կարգը ցույց է տալիս բառի դրվածքը, ասպեկտը խոսքում։ Այդ ասպեկտներն անշուշտ անհամար են․ դրանցից յոթը հայերենում արտահայտվում են հոլովով, իսկ բոլոր հնարավոր մնացածները՝ հոլովով և կապով։

1. Ուղղական հոլով: Սա բառի ուղիղ, անփոփոխ ձևն է, որով դրվում են՝

ենթական – «Արմենը գրում է», «Մի տղա գրում էր»․

բացահայտիչը – «Կարենը՝ որդին, հորից առաջ կանցնի վիրաբուժության բնագավառում»․

կոչականը – «Ողջո՛ւյն, Աննա՛»․

ստորոգելին – «Դա գեղեցիկ ՏՈՒՆ էր»․

երբեմն որոշիչը – «ԲԺԻՇԿ Գեղամյանն ասաց․․․․»։

Ուղղական հոլովով դրված բառը խոսքում կարող է լինել որոշյալ կամ անորոշ առումով՝ ըստ այդմ ունենալով կամ չունենալով հոդ։

2. Սեռական հոլով: Այս հոլովին անդրադարձել ենք մեր նախորդ հրապարակմամբ։ Այն ցույց է տալիս սերում, ծագում, պատկանելիություն, ինչպես նաև ամբողջի և նրա մի մասի հարաբերությունը։ Հավելենք միայն, որ նախադասության մեջ սեռական հոլովով են դրվում՝

հատկացուցիչը – Մարգարի տունը, Գրիգորի որդին, հացի մի մասը․

որոշիչը – տարեդարձի երգ, պատի ժամացույց, միջոցառման պատրաստություն․

բացահայտիչը – «Աշոտի՝ Կարինեի որդու․․․․․»․

ստորոգելին – «Գիրքը ֆիզիկայի է»․

կողմնակի ենթական – «Մինչ Կարենի գալը․․․․»։

3. Տրական հոլով։ Ցույց է տալիս առարկա, որին մոտենում է մեկը, որին տրվում է մի բան, որին հանգում է գործողութունը և այլն։ Տրական հոլովը, ինչպես ուղղականը, կարող է լինել անորոշ կամ որոշյալ առումով։ Անորոշ առման դեպքում այն ձևով նման է սեռականին, սակայն իր արտահայտած իմաստներով էականորեն, մինչև իսկ հակադրության աստիճանի տարբերվում է նրանից և լինում է բայական անդամի լրացում։

Տրական հոլովով դրվում են՝

հանգման անուղղակի խնդիրը – «Արմենակը մոտեցավ տանը»․

մատուցման անուղակի խնդիրը – «Թղթերը հանձնել էր եղբորորդուն»․

նպատակի պարագան – «Իջավ գնումների», «Մոտեցավ բարևելու»․

տեղի պարագան – «Դրված էր սեղանին»․

ժամանակի պարագան – «Տանից դուրս եկավ ծեգին»․

ներգործման անուղղակի խնդիրը – «Գերվեց խոսքերին»

բացահայտիչը – «Մոտեցավ Չալոյին՝ իր հավատարիմ շանը»։