Презентация "Россияны Игити" 2 класс

Дарсны темасы: Россияны игити.

Абдулхаким Исмайылов Хасавюрт районну Чагъаротар юртунда тувгъан. Мунда охугъан, ишлеген. Заманы гелип, асгерге гете. Эки йылдан Уллу Ватан дав башлангъанда ол разведчиклени бир бёлюгюню командири бола.

Абдулхаким оьзюню ёлдашлары да булан хыйлы уьстюнлюклер гёрсетген, дёрт керен яралангъан. Ол кёп медаллар , орденлер булан савгъатлангъан. Абдулхаким къоччакъ ишлери гьакъында газетлеге язгъанлар.шолардан лап да аслусу 1945-нчи йылны 1-нчи майында болгъан.

Абдулхаким Исмайылов дав ёлдашлары Алексей Ковалёв ва Леонид Горичев булан, немец-фашистлени уллу шагьары Берлинде ерлешген баш къаласы Рейхстаггъа гьужум этип, Уьстюнлюкню байрагъын къакъгъан. Оланы шонда чыкъгъан сураты да бар. Тек шо гюнлерде, ондан сонг да хыйлы йыллар гетип, Абдулхакимни бу къоччакълыгъына тюз багьа берилмей тургъан. Арадан 50 йыллар оьтген сонг, адиллик оьр бола.

Чагъаротарлы къумукъ улан гёрсетген игитлик ахырда оьзюню тийишли ерин тутуп токътай: Абдулхаким Исмайыловгъа Россияны Игити деген сыйлы ат бериле. Уллу савгъат Игитни таба. Бу ишде шо заман Абдулхакимни ёлдашлары булан Берлинде Рейхстаггъа байракъ къагъа туруп чыкъгъан сураты кёп кёмек эте. Халкъарада шо саялы айтадыр: «Бирев де унутулмагъан, бир зат да унутулмагъан», - деп.

Бугюн Абдулхаким Исмайылов бизин арабызда ёкъ. Ол, узакъ оьмюр сюрюп, 2010-нчу йылда гечинди.

Булай игитибиз булан оьктем болмай , биз ким булан оьктем болайыкъ! Игитлеге даимлик макуътав! Уллу абур, уллу сый!

Соравлагъа жаваплар беригиз:

• А. Исмайылов къайсы юртда тувгъан?
• Давда ол ким болгъан?
• Абдулхаким ёлдашлары буланнечик къоччакълыкъ гёрсетген?
• Огъар игит ат къачан берилген?